ترى طعنة قريبك لو صلت يا شينها بركان

[هجرس الروح]

خسارة كل شي اقفا ومات الورد والريحان

وصار الجرح الأول فالحياة يشابه الثاني

خسارة كل غيمه في السما ماتروي العطشان

خسارة يا الغيوم الصفر وش جبتي على شاني

أنا من يوم ميلادي وأنا عارف أنا الخسران

ولكن حكمة الله فالحياة ارضى بما جاني

أنا اللي جيت للدنيا كذا ماجيتها ولهان

لقيت إني على جمر السنين الحمر وحداني

أنا والهم والوحده على طول السنين اخوان

على الحلوه على المره على صوتي الحاني

انا جرحي حفظته في دروج السر والكتمان

وفجر داخلي عالم يحاول يقطع لساني

انا اللي كان صدري للخيول الجامحه ميدان

وانا اللي طيبتي كانت شعور للهمس وجداني

انا اللي كنت غافل لين جتني طعنة الشريان

نزفت العمر كله لين ضاعت قوة ايماني

ترى طعنة قريبك لو صلت يا شينها بركان

وانا اللي طاح صدري في يدي وانهزمت اغصاني

تغير كل شي سرمدي وانعدمت الالوان

وصار اللون الاسود من هنا اسمي وعنواني

انا المجرم وانا اللي ماقتلت بداخلي انسان

قتلت الحب والطيبه بعد ماشفت نقصاني

انا الحاكم وانا الظالم وانا عالم من الحرمان

ومن يدخل محيط الحزن يبشرني ويلقاني

انا اللي خافقي مسجون واحساسي هو السجان

وضاع العمر مني وماقدرت اقبض على الجاني

انا عالم غريب وعالمي مايسكنه النسيان

عجزت انسى وجروحي والزمن يسعى لنسياني

كفايه ماكتبته ومن هم عمري على الجدران

كتبت آخر قصيده بالدم ف صدر حرماني