النتاج الفكري للكاتب والشاعر/ رايق البال في الشعر والخواطر والقصص

[اسطورة لن تتكرر]

الليله الأخيره 03-11-2014,





يسعد صباحكم / مساكم
هلا بالجميع ..
لقاء آخر يجمعنا مع قلمي وهلوسة تباغته أحيانا ..


تحاصرني مشاهد هذا المساء الغير عادي
وتتهاوى على مخيلة منهكه في تتابع مثير للدهشه وكأن اتفاق مسبق بينهما ..
يعصف بي الوجع دونما هواده ويتلبسني ...
ايتها الغائبه وراء سراب الامنيات
لا ادري لما كل مساءاتي مرتبطه بصخب حضورك الذي اعشقه
ربما لأنه لا مكان للعقل والمنطق عندما نلتقي ..
لذا دائما يجذبني الحنين اليك ..
في ليلتك الأخيره معي ...
كثفّتي جرعة ادماني بك
ليكون وجعي اكبر وحدث ذلك فعلا
بعد رحيلك المباغت ..
نعم اعترف بأنك كنتي اكثر من رائعه
في رسم سيناريو تلك النهايه المؤلمه ..
نتظاهر دائما بأننا اقوى ونكابر امام من حولنا ولكن عندما نخلو بأنفسنا
يجتاحنا الشوق من الزوايا الأربع وتحاصرنا الذكريات
ومابين سندان الأماني ومطرقة الإنتظار نعيش وضعا مأساويا
بكل ماتحمله هذه الكلمة من معنى ...
ولأنني رجل اعشق الصخب والجنون ولا أأبه
بكل ماهو منطقي وعقلاني رغم جراحاتي
وسقوطي مترنحا من على صهوة طموحاتي
إلا انني لازلت مستمرا في السير بكل ثبات عندما يتوقف الكثير
عند اول نكبه تصادفهم ..
لا اجيد فن مراجعة الحسابات الذي يتقنه البعض
ولا اتعظ بكل ماحدث لي فلا وجود للتراجع في قاموس حياتي مهما كانت النتائج ...
هكذا جبلت ياسيدتي ...
لذا تجدينني ..
رغم ضبابية الرؤيه والموقف ابحث وبدون كلل عن اي نور يأتي من البعيد وان كان خافتا
واحث الخطى اليه لأزرع في نفسي قناديل الفرح ..
هناك ..
حيث للأمل ومضه وللقاء حنين ستجدينني
انتظرك على طاولة بها وردة حمراء تتوسط شمعتين
لعلنا من جديد نلتقي بعد فراق طال امده ..

اخوكم / رايق البال
الاحد
2 / 11 / 2014
12:45 ص

[اسطورة لن تتكرر]

يسعد صباحكم / مساكم
هلا بالجميع ..
نص ع السريع للرايق من باب التواجد وأتمنى ينال رضاكم ...


صباح الشوق والآهات والذكرى
صباح الكّر لهمومي ومأساتي
صباح الفقد والاحلام والمسرى
صباح قلوب تتمنى انكساراتي
صباح الآه توقد بالحشا جمرا
يغّذيها دفا صوتك وهمساتي
صباح العز والتقدير يا كسرى
على إيوان خفّاقي ونبضاتي
صباح الحلم والآمال والصبرا
يغنولك حبيبي الأجمل الآتي
حبيب القلب دام بحالتي ادرى
عليك الله تلملم عثر خطواتي
متى تلفي وتجبر بالقلب كسرا
عقب فرقاك بي تاهت مساراتي
ليا من غبت كم يطرا وكم يطرا
ضجيج الشوق في قلبي ونظراتي
صباحي انت والاشواق بي كثرا
ومسائي انت يا أجمل مساءاتي


اخوكم / رايق البال

[اسطورة لن تتكرر]

يسعد مساكم / صباحكم

لقاء جديد يجمعنا احبتي ونص بسيط للرايق اتمنى ينال رضاكم ...


على فكره ...!
بعدك تذكر العشره ؟
وماضي كان يجمعنا
وحلم(ن) كان يشغلنا
وسوالف بيننا ياما
وجنح الليل يسترنا
وينثر على اللقاء عطره .. على فكره ..!

على فكره .. !
تبي تعرف عن احساسي؟
احبك ولا لك ناسي ؟
وشوقي زاد ولا جفّ ؟
وانته (ف) غيبتك قاسي
تصدق ..
ماقدرت انساك
ولا عيني هوّت إلاّك
مع انه كثير جلاّسي .. على فكره ..!

على فكره ..!
ياما جيتلك ساري
وقلبي للغلا شاري
وظليت انتظر طلّه
لخل(ن) يهتوي خلّه
يقولوا الطير مهما غاب
مصيره يرجع لوكره .. على فكره ..!

على فكره ..!
تراها الدنيا دوّاره
مصير اللي ذبحه الشوق
ودمعه ينسكب (م ) الموق
فجأه تبتسم دنياه
ويظهر للخفوق خفوق
يشاركه الفرح بكره .. على فكره ..!

على فكره ..!
تذّكر كل شي له حد
اذا طوّل جفاك ومدّ
وشفت البعد يحلالك
اخاف انسى الهوى وذكره .. على فكره ..!

اخوكم / رايق البال

[اسطورة لن تتكرر]

يسعد صباحكم / مساكم
هلا بالجميع ..
وللقلم هلوسة تجتاحه بين حين وآخر ..


على أريكة ذكرياته العتيقه للماضي الجميل
إتكأ على عصى الأمل يهشّ بها اسراب حنين
يجتاحه وشوق عارم
يقارعه ويغزوه من جهاته الأربع ..
بينما ..
سماؤه تمطره بوابل من الوجع
وتعصف به دونما هواده ..
وشريط ذكرياته يدور في مخيلته مجسدا
كل مشهد جمعه بها في صدفة قلمّا تكون ..
وعندما ..
مر الكثير من الوقت الذي نزف فيه من ألمه
وأعياه الوجع نهض بتثاقل ومشى في اروقة الماضي
ورائحة عطرها الباريسي تهيمّن على المكان
وتغتال ماتبقى من جلده وتتسرب لمساماته وحواسه
التي تستنشقها بلهفه ووشوشتها وهي تهمس له ( كفاك جنونا)
تزيد من عربدة حنينه
بينما صدى ضحكاتها التي كانت تطلقها كلما كان جنونه
ترتفع وتيرته يتلبّسه وهويعيش معها تلك اللحظات بعيدا
عن كل ماهو منطقي وعقلاني ففي نظره ان الحب
توأم للجنون اللامتناهي ..
وهو في تجواله ذاك وصل اخيرا الى رابية الاماني ..
هنا كان للأمل وقفه ..
رمى بنظره للبعيد البعيد وتناول بضع كسرات
من صبر ليسّد بها رمق حنين ينهشه بضراوه
وهمس بصوت مبحوح :
اتراك ستأتين ... ام سيظل الوضع على ماهو عليه ؟

انتهى ..
اخوكم / رايق البال
الخميس
1 / 1 / 2015
2:30 ص

[اسطورة لن تتكرر]

يسعد صباحكم / مساكم
هلا بالجميع ...
قدمت منذ فتره طويله نصوص عديده لفن المسبّع كما يعرف بالسلطنه وتحديدا بالمنطقه الشرقيه وبعض مناطق الباطنه او الزهيريات كما يطلق عليه في بعض دول الخليج والموال كما يعرف ببعض الدول العربيه مثل مصر وبعض دول الشام كما قدمت شرح وتوضيح عن هذا الفن والموروث الجميل الذي فقط يتكون من 7 ابيات وربما لذلك تم تسميته بالمسبّع ..
وهو فن يعتمد على التلاعب اللفظي بالكلمه بحيث ان الكلمه لها عدة معاني مع انها نفس الكلمه وبنفس عدد حروفها كما ان الثلاث الابيات الاولى تكون على قافيه واحده لنفس الكلمه مع اختلاف معناها بالتأكيد كل مره والابيات الثلاث التي بعدها تكون قافيتها على كلمه اخرى مع اختلاف معناها ايضا اما قافية البيت الأخير فتكون بنفس كلمة قافية الابيات الثلاثه الاولى ..

نصين سبق نشرهما لي منذ فتره طويله هنا واعود مجددا لنشرهما مع التوضيح البسيط بالالوان والعبارات واتمنى ان ينال رضاكم ...

النص الاول :

اوصل لداره ونادي بوصفه و
سمّي
( ناديه بإسمه )

وصلّي على المصطفى ان شفته و
سمّي
(قول بسم الله الرحمن الرحيم)

واحذر شراب العسل مخلوط به
سمّي
( السم الزعاف )

قوله المولّع حشى ماكان لك
سالي
( لم ينساك )

وكيف يسلاك واسمك ياهوى
سالي
( اسم البنت وطبعا مجرد اسم لايمت لي بصله لاتوهجونا بتوقعات غير صحيحه ههههه)

ولا مر يوم(ن) وعنك القلب ما
سالي
( لم يسأل عنك )

واسمع ردوده وقبل توادعه
سمّي
( قول بسم الله الرحمن الرحيم )


النص الثاني :

يزداد شوقي اذا مالليل هلّ
و
جن
( اقبل/ جاء )

واقطع دروب(ن) خشاها كل انس و
جن
( مخلوقات الجن)

ولاهمني فيه من قال المولّع
جن
( فقد عقله )

للحب ناسه وللميدان
خيّاله
( اصحابه وفرسانه )

واللي يحبه خفوقي دوم ب
خياله
( فكره وعقله )

ويفّز قلبي اذا مالاح ب
خياله
( اقبل بشخصه وشكله )

ويزيد شوقي اذا مالليل هلّ و
جن
( اقبل/ جاء )


اخوكم / رايق البال

[اسطورة لن تتكرر]

يسعد صباحكم / مساكم
هلا بالجميع ...
هلوسة اخرى لقلم يأبى الصمت احيانا ...


بينما انا ...
في لجّة افكاري بعيدا عن كل ضوضاء
وكل مايمت للعالم بصله ..
تنهشني الوحده واستعين ببعض الصبر
على مواجهة افواج شوقي لك التي تكتسح كل مساحاتي
واحاول جاهدا الملم ماتبقى مني
وارمم انكساراتي ...
بعد سلسلة من الهزائم النكراء امام جبروت هجرك ...
تنصبين انتي افخاخك من جديد لكي تنتظرني اثناء عودتي
وتتلين تعاويذك لتكثيف جرعة ادماني بك وكأنه لا مجال لي للهروب منك ...
ايتها الأنثى القاطنه خلف السراب رفقا بي ..
لم اعد كالسابق مولعا بالمعارك والغزوات
فما عاد بهذا القلب مكان لغرزة اخرى جديده من الوجع
فلقد اوهنته الندوب ...
ورغم اني استشعر الفرح وارسمه واعلل القلب المنسكب حنينا
بأن القادم اجمل إلا انني في قرارة نفسي
ادرك بأنها مجرد محاولات عبثيه مني
للتجمل ورأب الصدع الكبير ببعض عبارات التمنّي
لأن كل المؤشرات والتنبوءات تقول غير ذلك ...
نعم اعترف بأنك سكنتني للنخاع وادمنتك
وانك بكل ثقه تحتلين ذاكرتي واوردتي
وهذا سر قوتك الي لم استطع تجاوزها رغم كل محاولاتي
للهروب من هكذا مأساة اعيشها ..
لذا ...
ياسيدة افكاري وقلبي ...
بعيدا عن كل ماهو عقلاني ومنطقي اعود اليك ...
مفعم بالشوق مهرولا بقلب طفولي وانا اعزل السلاح
معصوب العين واطلب منك بكل براءه
تضميد جراحاتي المثخنه بينما انتي بكل ثقه
تحتسين اوجاعي وترسمين ابتسامة النصر على ثغرك ..!


اخوكم/ رايق البال
الثلاثاء
1:30 ص
10 /12 / 2014

[اسطورة لن تتكرر]

يسعد مساكم / صباحكم
لكل الأحبه اهدي بوح قلمي والظاهر القريحه هالايام مطنشتني شوي ههههه سبق نشر هالنص هنا في 13 / 12/ 2011 ...

نفسي اسألكْ
وشْ آخرةْ حبي إلكْ ..!؟
راحْ تقتربْ ...
ولا الهوى بعدهْ حبيبي
(م ) اشْغلكْ ...!؟
ولاجرّبتْ مثلي سهرْ
واشواقْ تاخذني وتمرّْ
وليل(ن ) طويلْ
فيه إتْخّيلني مثلْ
مانا ليالي اتْخيّلكْ ..!
لك اعترفْ ...
ان الحزن فيني طغى
والشوق عمره ماطفى
ولا غبت عني ياغلاي
كلها دقايق بس واجيكْ
وانا ابتسملكْ واحتويكْ
واقول لكْ ...
ماقلّتلكْ ..!؟
انه فراقكْ ...
هدّني ...
ماقلّتلكْ ..!؟
يامن هويتْ ...
حسْ بي وخذني للأمان
كافي دلالْ
بسّْك تعالْ
ولاّ وربّي اللي خلقْ
وبقدرتهْ ...
الطفلْ في مهْدهْ نطقْ
لا اذوّقكْ نار الغرامْ
واشّْعلْ فتيلهْ والهيامْ
واحرمّْكْ لذاّت المنامْ
وارقصّْ الشيطانْ لكْ ..!
للموت احبكْ واهْتويكْ
انت الغرام اللي اقول
وانته هوايا والميول
وكلّي إلكْ
يامن انا لك مملكه
وبْخافقي ...
إنت الملكْ ...
انت الملكْ ...
انت الملكْ ...!

اخوكم / رايق البال

[اسطورة لن تتكرر]

يسعد صباحكم / مساكم
هلا بالجميع ...
مجرد هلوسة قلم تنتابه بين فينة واخرى ...


على ترنيمة ناي حزين وسط حشد حافل
من الأشواق تهللّت بشرا وهي تغزو مضجعه
في ليلة سرابية الملامح ..
كان ..
يتضوّر شوقا لأقصوصة حب ماضيه عاشها ..
ويهمس بهدوء ..
(طفل مشاغب هو حبك من الصعب ترويضه )..
في تلك الليله كان الحنين ينهشه بلا هواده
وطيوف الماضي تأتيه من كل فج عميق وتتلبّسه ..
وهو تحت رحمة الإنتظار القاتل كانت بحة صوته تعزف بوهن
لحن الشوق وعينه تشع ببريق الامل وتتجاذبه الذكريات
ولأنه رجل اعتاد صخب الحياة وجنونها يزيد احتياجه لها
فالحياه بدونها رتيبه وممله وهو رجل يعشق الفوضى والجنون ..
وفي لحظته تلك وبعيدا عن كل ماهو حسي ومادي يتجسّد
ذلك الطيف لحقيقة امام ناظريه ..
ربما هي ومضة امل او صحوة حلم راودته
ولكنه يكاد يجزم بأن الطيف تلاشى واضحى مايشاهده واقعا ..
وفجأه ..
سرعان ماتبخر طيفا وحقيقه ..!
قالت له في آخر لقاء جمعهما في ليلة معربدة
بكل ماهو غير عقلاني .. ( ثق سأعود )..
ورحلت ..
ومنذ تلك الليله ورغم عدم شرعية رحيلها
وتنافيه مع العقل والمنطق والظرف إلا انه لايزال
ينتظر برها بالوعد ويعزف كل مساء لحن اللقاء ..
موجع هو الفراق ولايزال هذا القلب يتمنى
لو كسرة من صبر بها يسّد رمق الإحتياج اليها ..
فالليل بدونها موحش بكل
ثوانيه ...
ودقائقه ...
وساعاته ..

اخوكم / رايق البال

السبت
2:30 ص
3 / 5 / 2015

[اسطورة لن تتكرر]

يسعد صباحكم / مساكم

لقاء آخر يجمعنا ايها الأحبه واتمنى نصي المتواضع ينال اعجابكم ...



عندك خبر ..!!؟
في غيبتك ذقت الأمرّ
تاه الفكر .. ضاق الصبر .. وشوقي تعاظم وانتثر ..
ولا جنّ ليلي ياغلاي .. يكبر عناي .. وهمّي وشقاي
واظل انتظر ..
طيفك يمر .. مثل البدر .. يروي صحاري خافقي برشّة مطر ..
عندك خبر .. وفعلاً على بالك أمّر ..!!!؟

عندك خبر ..!!؟
اني تجرعت الغرام .. منّك وقام .. قلب(ن) تولّع بك وهام
يسكب حنين .. ورجوى سنين .. وبك يستعين
يامن انا بك مستهام ..
واظل انتظر ..
طيفك يمر .. مثل البدر .. يروي صحاري خافقي برشّة مطر ..
عندك خبر .. وفعلاً على بالك أمّر ..!!؟

عندك خبر ..!!؟
انك وربّي الوحيد .. وعشق(ن) فريد
اشتاقلك وانته معي .. واشتاقلك وانته بعيد ..
ومنك استحاله لي مفرّ .. وهذا جديد .. ماقد على بالي خطر ....!!
واظل انتظر ..
طيفك يمر .. مثل البدر .. يروي صحاري خافقي برشّة مطر ..
عندك خبر .. وفعلاً على بالك أمرّ ..!!؟

اخوكم / رايق البال

[اسطورة لن تتكرر]

يسعد مساكم / صباحكم
هلا بالجميع ..
عوده متواضعه لقلمي بعد غياب ..


في غيابك ..
اتكوّر من صقيع الحنين وعيني تنظر خلسة للبعيد
علها تلمح طيفا له حضوره البهّي الذي
به سيسري الدفء بأوصالي ..
وتمر الايام بليالها الموحشه
وليس هناك اي جديد ..!
منذ امد طويل وانا اتجرع كل ليله كأس اشتياقي للثماله
وانتي وبكل هدوء تكثفين الجرعه ليوهن هذا القلب اكثر ..
كم هو مؤلم مايسمونه الإنتظار بل ومميت هو ..
عندما نفقد من تحب لظرف ما يخالجنا الشعور بعودته
ورغم ان كل القرائن توضح استحالة تلك العوده إلا
اننا ولأسباب خفيه ننسى المنطق والعقلانيه ونظل
نمارس طقوس الإنتظار ..!
هناك ..
حيث امارس طقوس تولّهي وانا اقبع مستكينا ورياح
الإحتياج تعصف بي كل لحظة وآن ..
أبني اهرامات للأمل رغم ذر رياح النسيان لها إلا انني
لا زلت مستمرا في التعمير ..
ربما هي ومضة امل او تنفسيا حسيا
او لربما هو احتضار روح رغم إدراكها انها على مشارف الهلاك
إلا انها تأبى الاستسلام ..
بل وتزرع للقاء الوردي زهره ..

بقلمي ..
اخوكم / رايق البال
السبت
22 / 8 / 2015
10:30 م

[اسطورة لن تتكرر]

يسعد صباحكم / مساكم
هلا بالجميع ...

بالبدايه اقدم اعتذاري الشديد لتأخري بالرد على اخي الغالي محمد العمران في قصيدته التي شرفني بها وابدع فيها بالتأكيد وكان سبب تأخري الحاله الصحيه التي اعانيها كما اتمنى منه ومن الجميع قبول اعتذاري لبساطة ردي والذي لن يكون في مستوى قصيدة شاعرنا العزيزوالكبير ..
ولقد رأيت ان من الافضل ان اجمع القصيدتين في موضوع واحد لكي يسهل على الجميع القراءه وايضا لكي احتفظ بها لكونها هديه غاليه من آخ غالي تشرفت بمعرفته ..

قصيدة الآخ / محمد العمران والتي عنوانها ( الى رايق البال مع التحيه ) ...




اهداء خاص الي الاخ الحبيب رايق البال ولا نقصان من باقي الاخوة والشعراء
الكرام والاعضاء المحترمين ،،

اوااااه ياوقــــت الـعــنــا والـتـبـهــذااااال ،،،،،،، كلماااااا بــغــيــة يـنـجــلــى زاد هـــمـــه
كـلـمــااا بـغـيــة يـنـجـلـى كــــدر الــحال ،،،، وعــــوّد عــلــى قــلــب الـمـعـنـاااااا وســمــه
جـربـت انــا حـضـى ميامـيـن وشـمــال ،،،،،،، ميرالـبـخـت يـاصــاااااح مـاصــار يـمــه
ناديـت بعـلا صـوت مـنـى عـلـى جــال ،،،،،،، كوووود ان يسـمـع صرخـتـى مــن يـهـمـه
رد الـصـدى بـحـروف صـوتـى ولا قــال،،،،،،،، شسباب حـرمـااااان الـصـدى مــن يـلـمـه
انــــا الـمـعـنـا لابــــس الــهـــم ســربـــال ،،،،،، سبع (ن) على سبع (ن) على سبع ذمه
اســـج بـقــدام الـرجــاء طالب الفااااال ،،،،،،،، واعيد انـــاااا والـيــاس نــفــس الـمـهـمـه
ارقـتـنــى يــاهــم والـنـجــم قــــد مـــــال ،،،،،،،،، وش لك بنـومـى تخـنـقـة فـــى مـسـمـه
ســهــران انــــا مـابـيــن فـنــجــان ودلال،،،،،،،،، وابهار يــبــرى كــــل راس(ن) يـشـمــه
وسهـيـل بــادى دونــه الـكـوكـب الـــزاااال ،،،،،،،،، عيني مـعـك ياسـهـيـل والـقـلـب يـمــه
غزيل(ن) جاف(ن) عــن الـنــاس جـفــاااال ،،،،،،،،،،،، ماياصلة يــاغير خـــالـــه وعـــمـــه
يامستّـر اخــدود(ن) بـهـا حـبـة الـخـال ،،،،،،،،،،،. ستر الـحــلا يـازيــن مـحــد(ن) يـذمــه
فـــى ذمـتــى لـوكــان للـحسن تـمـثــاااال ،،،،،،،،،،، كنت انـحـتـك يـازيــن فـــى راس قـمــه
ولولا الجمل ماصاااار فى الناس جمّال ،،،،،،،،،،،،،، ولولا الامل مـاصــار في الناس هـمــه
وانـــا عـلــى ذاك الامـــل تـابــع الــــلال ،،،،،،،،،،،،. كود ان يـصـدف لــى مـــع الـــلال زمـــه
زمـــة ريـــا واكـفـكـف الـحــال بـالـحال ،،،،،،،،،،،،، ولا نــشـــف ريــقـــى ولا مـــــن مـــذمـــه
قم ثيبني ياصويحبي رايق البااااااال ،،،،،،،،،،،،،،،، مركب غرااااااامي هااايج الموووج عمه
في اللي جفاني في المحبه ولا سااال ،،،،،،،،،،،،،،،،، عني ولو هو قااااال شسباااب ذمه
واقبل معاذيري تري الشوق قتااااال ،،،،،،،،،،،،،،،، ومن كاااان مثلك فاهم (ن) في المهمه





توقيع العمررران


رابط القصيده :

http://omaniaa.co/showthread.php?t=61556


ردي السيط على الآخ العزيز والشاعر الكبير / محمد العمران


حيّاك ياللّي حرفه الذوق يختال

في صمّ قلبي واحتوى القلب همّه

صوتك شجاني وعانق الآآه موّال

والشوق سدد في المعاليق سهمه

يامن لفيت وهزّك الشوق واغتال

احلام قلبك والتفاكيير عتمه

لبيك ياقلب (ن ) شكى ضيقة الحال

والحب رسّخ في حناياه بصمه

نوّخ ركابك وابشر بطيب الامال

والآدمي لا قال وعد(ن) يتمّه

يامحمد العمران يالنايف العال

ابشر بعز(ن) يدحر جيوش ظلمه

لك في حنايا القلب مرتع ومنزال

ولك في عيون الصّب ياصاح قمّه

ياصاحبي بالحب احوال واهوال

وفي ديرة العشاق اسرار جمّه

وللحب سكره وسكرة الحب تغتال

صبر(ن) نعلّق فيه روح(ن) وذمّه

وفي دنيتك ياخوي اشكال واشكال

والبعض لك ترياق والبعض سمّه

وفي الحب ياما عاشوا اجيال واجيال

وكل(ن) على بلواه اينوح همّه

وفي مجلس العشاق صادر ونزّال

والحب من رب المخاليق نعمه

وانا مثيلك في دجى الليل خيّال

وتخالطت افواج حربي وسلمه

ولا عسعس الديجور حلقّت اميال

واسجع بعالي الصوت بحروف اسمه

وياما عليه اسوق صبري ومازال

حبه تسربل في خفوقي ودمّه

وياما اجر الصوت موال موال

علّ وعساه يعود واتوق شمّه

ذكرتني ياخوي بالشامخ الغال

ابو عيون(ن) سود ورموش رسمه

الغالي اللي كل مافيه يختال

خفه ودلع واوصاف ياهييه جمّه

ربي كساه من التواصيف إجمال

وسخّر خفوفي يهتويه ويضمّه

من هو مثيله صاحبي احمر الشال؟

في ضحكته والله مليار نغمه..!

اخوكم / رايق البال

[اسطورة لن تتكرر]

يسعد صباحكم / مساكم
هلا بالجميع ...
من ارشيفي القديم المنشور هنا وبعض المنتديات منذ اعوام واتمنى ينال رضاكم ..



هلا بك باهي الطلّه


هلا بك وردي وفلّه

هلا بالغالي الغالي

هلا بسيد الحسن واهله


هلا بك باهي الطلّه

.......................

هلا باللّي تمنيته

وياما وكم ناديته

وبالأشواق ناجيته

وجمّ الشوق له كلّه


هلا بك باهي الطلّه

.........................

تعال اسكن بخفّاقي

تعال وطفّ اشواقي

بدونك تذبل اوراقي

وقلب المبتلي من له ؟


هلا بك باهي الطلّه

......................

احبك موت لو تدري

وانته لي امل عمري

عظيم الشوق لك يجري

بدم المغرم المدله


هلا بك باهي الطّله


طابت صباحاتكم ...

اخوكم / رايق البال

[اسطورة لن تتكرر]

يسعد صباحكم/ مساكم
هلا بالجميع ...
لقاء آخر يجمعنا وهلوسه قلم تنتابه بين فترة وأخرى ..

ولأنك ..
الأوفى والأصدق والأجمل
لازلت ياسيدتي امارس لعبة الإنتظار كل ليله
رغم ان الشوق ينهشني بلا هواده ..
لازال الحنين كل ليله يقلّب دفتر الذكريات ورقة ورقه
وكل ورقه لها معك حكايات لاتروى ..
في زمن البعض يرتدي فبه الف قناع ويمارس
الاعيب السحره وخفة يدهم ..
لازلت انا ..
ذلك العاشق الغارق في الماضي العتيق
ولم التفت لما الاقيه منهم ..
قد اكون رجل من الماضي السحيق بلا هويه او عنوان
او جاهل لكوني
لم اواكب مايحدث من تغيرات
ولكني مقتنع بما افعله وان كان البعض ينظر له بإستغراب
حيث كثرت القلوب ياسيدتي التي تستوعب العشرات
فكلما زاد العدد
كان ذلك مقياسا للنجاح من وجهة نظرهم ..!
اما انا ..
فلا زلت وسأظل ذلك العاشق العتيق
الذي يتوكأ على عصى الأمل ويهّش
بها اسراب يأس تتسلل لقلبه احيانا ..
يكتب القصائد ويقلّدك إياها عقدا
ويرتشف كل ليله قطرات الشوق ويغمسها في كسرة من حنين
علّه يسّد بها رمق دبيب الشوق بأوصاله ..
هكذا انا ..
للذكريات والأيام الخوالي افتح قلبي
على مصراعيه كل ليله وهي تأبى إلا ان تأتي افواجا
ولاتتركني الا بعد ان يغمى علي مما اكابده ..
هكذا هي لياليّ تمر بدونك وصباحاتي ..
وطيفك الآسر ياسيدتي
لايفتأ من التحليق حولي كل آن ..
لذا ..
وبعدما يسدل اللون الاسود جناحيه
على الكون تبدأ معركتي الشرسه
مع هذا الحب الجامح
وافترش الشوق وألتحف الحنين على امل
ان الغد سيكون اجمل رغم ادراكي
بأن مامن جديد بأي غد ..
ولكنني تعودت ان
ازرع للتفاؤل بقلبي ورده ..!

انتهى ..
طابت صباحاتكم ..
بقلمي ...
اخوكم / رايق البال
الخميس
12 / 11 / 2015
8 ص

[اسطورة لن تتكرر]

يسعد مساكم / صباحكم
هلا بالجميع ..
هذه القصيده تم نشرها لي منذ فتره ببعض الصحف بإسمي الحقيقي طبعا ..
القصيده نالت استحسان المطرب / بخيت احمد محاش الشحري وتواصل معي والتقينا في مسقط وهو طبعا من محافظة ظفار وانا من ولايه اخرى ولكنني اقيم بمسقط بحكم عملي ..
بعد الإتفاق بيننا قام بغنائها في اول تعامل لي معه وطرحها في اشرطه سمعيه ومن ثم قام بإنزالها في اليوتيوب ..
القصيده نشرت بالصحف بعنوان ( دورة الايام ) ولكن بالتسجيل تغير عنوانها الى ( تلاقينا ) ..

تلاقينا ولكن مهتنينا
وضاعت فرحتي مع من هوينا
تمنينا اللقا عنّده يطوّل
ولكن للأسف ماهو بيدينا
وكنا ننتظر لحظة لقاهم
لجل نشرح خفايا مالقينا
من جروح(ن) لها في القلب بصمه
ومن سهد الليالي كم شكينا
وقمنا نسأل الاطلال عنه
ومن احوال عيشتنا بكينا
اذا مالليل البسنا سواده
مع الاشواق لدياره سرينا
وياما وكم كتبنا له قصايد
وفيها كم شرحنا ماخفينا
تعاهدنا على درب المحبه
وفوق العهد اقسمنا ووفينا
ولكن دورة الايام شاءت
تفرقنا وتهدم مابنينا
على رغم التباعد ياخليلي
عليم الله حبك مانسينا
عليك الله ترحم من يودّك
وتبسم له اذا مدّ اليدينا
كفايه ياورد بسّك تعنّد
كفايه يازمن ارضى علينا
طلبتك خافقي حنّن خفوقه
وصبرّني على اللي به ابتلينا
ومن يطلب إلهه مايرّده
تمهل ياقلب صبرك علينا


https://youtu.be/a1aUHJJ_dw0

اخوكم / رايق البال

[اسطورة لن تتكرر]

يسعد صباحكم / مساكم
هلا بالجميع ..
لقاء آخر متجدد يجمعنا وهلوسة قلم تنتابه بين حين وآخر ..

ومضى عام آخر ياسيدتي
عام آخر إنفرط من عقد السنين
عام آخر انسلخ من عمري
وانتي ..
لازلتي هناك
بعيدة عني قلبا وقالبا ..
وانا ..
اعتكف في صومعتي اتجرّع الحنين
الذي يكثّف كل ليلة جرعته
واترقبك كل آن ..
عام آخر مثقل بالحنين ولوعة الإشتياق ..
كل مايجمعني بك اصبح طيف ذكريات
تحوم في ذاكرتي المنهكه
وعطر باريسي لازلت اشم نفحاته حتى
الآن منذ آخر يوم كنا فيه معاً وتمتمات عشق
قلتيها ذات ليله حالمه ..
يقال بأن ( الإنسان تحكمه ظروفه ) ...
ورغم إيماني المطلق بهذه المقوله إلا انه
لابد وان تكون هناك ..
فسحة من فراغ بها يستطيع التواصل من رغب ..
ولكن ..
هاهي الشهور تمضي والسنين ..
فالزمن لا تتوقف عقارب ثوانيه ودقائقه وساعاته
عند حدث معين ..
وانا ..
لا جديد في عامي الجديد سوى
ان عمر الإنتظار ازداد سنة اخرى ..!
اي قدرة تحمل يملكها هذا القلب الواهن
ليصمد كل هذه المده ..!
وبكل حب ..
يزرع الفرح وينثره على من حوله ببذخ
دونما انتظار مقابل ..
وعندما يخلو بنفسه كل ليله
يبعثره الحنين شظايا ..
ليعاود كل صباح ينشر البسمه
وكأن شيئاً لم يكن ..!
وانتي سيدتي
أي قلب تملكين ليصمد
بقسوه كل هذه المده ..!
عندما رحلتي ذات ليله ..
قلتي سأعود قريبا ..
ومنذ تلك اللحظه وانا وقلبي
ننتظر تلك العوده ونعّد العده لإستقبال
افواج فرح تحلّق في سماواتنا لتدّب الحياه بنا ..
ولكن ..
طال انتظارنا كثيرا سيدتي ..
ترى ..
هل من عوده ام سيظل الوضع على ماهو عليه ..!؟

اخوكم / رايق البال
الجمعه
1 /1 / 2016
الساعه 12:01 ص

[اسطورة لن تتكرر]

يسعد مساكم / صباحكم
نص بسيط على السريع من باب التواجد ليس إلا ..


وتبقى لك معي ذكرى
تهز الخافق المشقى
وتنثرني غناوي ليل
وناي وحشرجة انفاس
وفكره باللقا سكرى
وتبقى لي معك ذكرى ..!

وتبقى سيد اقداري
على دربه انا ساري
واناديله ..
تعال اعلمك وش صار
وكم في غيبتك انهار
خفوق اللي وحشته حيل
ودونك حالته كسرا
وتبقى لي معك ذكرى ..!

حبيبي وملهم اشواقي
وموتي وسر ترياقي
وربي ماقدرت اسلا
وكل ماهاجت شجوني
الملم وحشة ظنوني
واتمتم يانفس صبرا
وتبقى لي معك ذكرى ..!

طابت مساءاتكم ..
اخوكم / رايق البال

[اسطورة لن تتكرر]

يسعد صباحكم / مساكم
هلا بالجميع ...
من ارشيفي القديم واتمنى ينال رضاكم ..



تصدّق ودّي بس افهم

مصيري يابعد كلّي

شعورك قوله لا تكتم

ياوردي انته وفلّي

احبك ياعسى تفهم

بأنك واحتي وظلّي

وانّه عاشقك مغرم

وانّك صاحبي وخلّي

احبك والذي يعلم

خفايا روح معتلّي

بدونك دنيتي تعتم

بدونك صاحبي من لي؟

رجيتك صاحبي ترحم

عيون(ن) دمعها هلّي

وقلب(ن) ذاب واستسلم

وشوق (ن) لاهبه يصلي

ولو ما احكي لك ترجم

خفوقي كم وكم مبلي

تحبني ولا بس ترسم

شعورك يالغلا قلّي

عشان استوعب وافهم

وانسى ياعسى وعلِ

طابت صباحاتكم ...
اخوكم / رايق البال

[اسطورة لن تتكرر]

يسعد صباحكم / مساكم
هلا بالجميع ..
هلوسة قلم تنتابه بين حين وآخر ..


ذات ليلة ماطره بزخات الحنين
ارتدى معطف الصبر واوصد باب قلبه ورحل الى المجهول ..
كانت تصارعه افواج الإشتياق وتغيرعليه
من كل فج عميق ورغم ذلك
لم تفلح في الإجهاز على قرار رحيله ..
بل ظل واثق الخطى في سيره لهدفه الذي رسمه في مخيلته ..
ليس بالرجل السهل هو ولا ممن يبكي على اللبن المسكوب
فلقد خاض حروبا عده حتى وان اثخنته الجراح ببعضها
لم يكن يعبأ او يأبه بها بل يعاود بإستماته
الوقوف على قدميه وشن الغاره تلو الأخرى ..
انه ببساطه احد ربابنة البحر المتمرسين في فهم موج
البحور وتقلباتها وتضاريس مساراتها ..
لذا اصبح متيقّنا ..
من خلال مامر به
بأن من يحبك لن يتركك حتى في احلك الظروف ..
ولأنه عانى الأمرّين في سنين انتظاره لذلك الحلم
الذي من الواضح
عدم تحقيقه إقتنع اخيرا بأن من رحل لن يعود
حتى وان عاد لن يكون كما عهده به ..
لذا ..
قرر هو ايضا الرحيل علّه يجد في مدينة اخرى
مايروي ضمأ انتظار تلك السنين العجاف ..
نعم كان قرار الرحيل ليس بالأمر الهيّن
ولكنه ..
بعد قراءه متأنيه ومستقبليه
ودراسه مستفيضه للأمر ..
رحل بكل هدوء
هناك ..
على رابية يكسوها الظلام يقبع شبح انسان
تسربل بالسواد يتنفّس الصعداء اخيرا ويفتح
بكل شوق قلبه وصدره على مصراعيه للمستقبل الباسم
بعدما خرج من شرنقة كان حبيسا بها لسنوات عده ..
ذلك القابع كان يردد بصوت ملؤه التفاؤل والثقه والهدوء
والإيمان المطلق ..
(
غدا سيكون اجمل
)
بقلمي ..
اخوكم / رايق البال
الاثنين
الساعه : 2 ص
15 / 2 / 2016

[اسطورة لن تتكرر]

يسعد صباحكم / مساكم
هلا بالجميع ...
من ارشيفي القديم واتمنى ينال رضاكم ..

وحشتك يالغلا ولأ ..
خذتّك دنيتك عني؟

وربّك ماقوى يسلى

خفوق(ن) سالبهْ مني

متى مامرّ به هلاّ

خيالك وانتشى يغنّي

هلا بوضحكة(ن) خجلى

هلا بشوق(ن) يمرمرني

هلا بونظرة(ن) تحلى

تلملمني .. وتنثرني

حبيبي لا حشى وكلاّ

لغيركْ خافقي ايحّني

احبك ياشذا الفلاّ

ياحب(ن) آآه ذوبّني

غرامك فالحشا حلاّ

وروحي انته وفنيّ

احبك امنيّه وخلاّ

احبك منيّ وعنيّ

حبيبي ياعسى وعلا

تعوّد لي .. وتذكرني

بدونك دنيتي ثكلى

ووقت(ن) خاب به ظني

طابت صباحاتكم ..

اخوكم / رايق البال

[اسطورة لن تتكرر]

يسعد صباحكم / مساكم
هلا بالجميع ..
مقطوعه بسيطه راح احاول ان شاء الله اكمالها عما قريب ان سمحت الظروف ..


يارب لطفك تقبّل صادق التوبه
واغفر لعبد(ن) لباس الذنب كاسنه
اغفر لعبد(ن) شقته كثرة ذنوبه
من زود بلواه دمع العين جارنه
غرّه شبابه نسى الايام محسوبه
وانه يسائل على كل مابدر منّه
يارب رحمه بعبد(ن) تاهت دروبه
يامن لك الملك والغفران والمنّه
عبدك ينادي بليل(ن) حالك(ن) ثوبه
ومن دق بابك حشى ماخيّبت ظنّه

طابت صباحاتكم ...
اخوكم / رايق البال

[اسطورة لن تتكرر]

هلا بالجميع ..
نص ع السريع من باب التواجد ..



وتجمعنا حكاوي ليل
وريحة عطرك الفاخر
وصوتك .. ضحكتك .. همسك
وتنهيده ..
واشياء كثير ماتحكى
وادندن بأول حروفك
واسرح بآخر حروفك
وباقي حروفك الاخرى
اشبّعها غنا وتقبيل
وتجمعنا حكاوي ليل ..

وتدري بي ..
انا لامرني طيفك
عظيم الشوق بي نوّخ
ونار الآه بي تصرخ
واناديلك ..
والملم مابقى فيني
واترّقب تناديني
وتنثر شعرك الاسود
واتووه فعالمه واغييب
عن العالم .. عن الدنيا
وانسى طعنة سنيني
وتجمعنا حكاوي ليل ..

واهمسلك ..
هلا ياحلم ايامي
هلا يا كل احلامي
تعبت انطر
تعبت اصبر
ابا اتقهوى اللقا واشرب
متى تمدد فناجيلك ؟
وتجمعنا حكاوي ليل ..


طابت صباحاتكم ...
اخوكم / رايق البال

[اسطورة لن تتكرر]

هلا بالجميع ..

بالبدايه الف شكر للشاعرين الكبيرين / سعيد مصبح الغافري وناصر الضامري ( شموس الحق ) على امتاعنا بهكذا نصوص ..
بأمانه قبل ساعه زمن اطلعت على نصيهما الرائعين وانا اشيك على الرواق من خلف الكواليس رغم اني في اجازه حاليا ههههه ..
ورغم اعترافي بأن ( رحم الله امرء عرف قدر نفسه ) الا ان النص الاول للأخ / سعيد الغافري ومجاراته من قبل الآخ / شموس الحق استمتعت بهما اي استمتاع ..
لذا حاولت من خلال هذا النص البسيط والمتواضع التسلل الى رقي ما كتباه وعذرا للجميع على بساطة وتواضع ماكتبت على عجاله ..
كما انني ارتأيت ان اجمع النصين الذين اشرت لهما هنا لسهولة الاطلاع ..
النص الاول / للاستاذ والاديب الكبير سعيد الغافري
( يطنشني انا الانثى )
رابط النص

http://omaniaa.co/showthread.php?t=97219

النص الثاني / مجاراة الشاعر الرائع والاستاذ شموس الحق
( ملهمتي )

http://omaniaa.co/showthread.php?t=97462

النص الثالث / لرايق البال
( للحب ذكرى )


وفي ركني القصيّ انا
اتابع ذلك المشهد
ويمرق في مخيلّتي
غرامٌ بالجوى يرعد
ونار الشوق تكويني
وقلبي بالهوى عربد
احاول لملمة نفسٍ
تعاندني ولا ترتد
انا مجنون عاشقةٍ
لأسري جيشها تحشد
تكرّ تفرّ في قلبي
وشيطان الهوى يولد
تباغتني على غرّه
برمشٍ يرعد ويزبد
وهمسٍ كم يبعثرني
وغنجٍ يتبعه يسند
واسقط عندها ارضاَ
لوعييً ياملأ افقد
وتضحك عندها جذلى
لفتنه كم بها تعّتد
وتدنو وهي منتشيه
وتهمس لم ولن تصمد
انا ماضيك .. حاضرك
انا لك حبك الاوحد
وتعلو ثغرها بسمه
لنصرٍ للملأ جسّد
بأني دونها تائه
غريبٌ .. متعبٌ .. اوحد
واني دونها ابدو
بقانون الهوى مرتّد
وان هواها يكسوني
ويغلبني ولي يصفد
احاول جمع اشتاتي
واخمد .. مالذي اخمد ؟
انادي الصبر في وهنٍ
وعني يبعد ويبعد
واصرخ عندها مهلاً
حنانيكِ على المُجهد
انا الكاهن بصومعتك
انا لسواك كم مُلَحِد
واعلنها الى موتي
احبك والذي يُعْبد
وان الشوق في قلبي
محالٌ ناره تخمد

طابت صباحاتكم ..
اخوكم / رايق البال

[اسطورة لن تتكرر]

هلا بالجميع
مجرد هلوسة قلم ليس إلا ...


هناك ...
حيث الخط الفاصل بين العالم المرئي واللاّمرئي
والمحسوس واللاّمحسوس ...
وبعيدا عن الصخب ظرفا وزمنا ومكانا
وبعيدا ايضا ...
عن كل ماهو مادي بكل صوره واشكاله وانواعه ...
اكتفى بالتخاطر الروحي عن بعد ..
ومع النفس كانت له وقفه وأي وقفه ..!
في صومعته تلك برابية الأماني
كان هناك قراءة متأنيه للأحداث
بكل ابعادها وتداعياتها
وكان ايضا للأمل ومضه ...
ومابين الأمل والتمنّي تتأرجح الأحلام العذريه
التي صيغت منذ امد ...
هي ربما استراحة للمحارب الساموراي قبيل اقدامه
على تطبيق طقوس انتماؤه لهذه الفئه
من المحاربين ..
في زمن فقدت فيه البراءه سمتها وتقلّد
وشاح الفخر من لايستحقه شرعا وقانونا ..
وتغيرت كل الحسابات نتيجة اسباب
بعيده كل البعد ..
عن كل ماهو منطقي وعقلاني ..!
كل تلك الأحداث التي بعضها جاء
على حين غرّه وبعضها كان متوقعا ...
بنت سورا رفيعا بينه وبين
ماكان يتوقعه من جميل المنى ..
فلقد تشبّع بالوجع من عالمه الصاخب
والغارق في سرياليته ونزف الكثير
من الألم ..
اطلق تنهيدته الأخيره بعد قراءته تلك
وقفّل راجعا ادراجه دون ان
ينبس بشفه ومضى
يمخر عباب السراب ..!

انتهى ..

اخوكم / رايق البال

[اسطورة لن تتكرر]

هلا بالجميع ...
من جديد نلتقي مع هذا الفن التراثي الجميل واللي سبق وقدمت عنه عدة نصوص ..
وهالفن كما سبق واسلفت محليا تشتهر به المنطقه الشرقيه وتحديدا محافظة صور كما ايضا تشتهر به بعض مناطق الباطنه مثل السويق وصحم وصحار ... وهو فن معروف خليجيا وخاصه بالكويت والبحرين ويطلق عليه مسبع او زهيريات كما انه معروف بالامارات اما السعوديه وقطر فشهرته اقل مقارنة بالدول والمناطق اللي ذكرتها ... اما عربيا مثل مصر وعدة دول اخرى وخاصه الشام يعرف بإسم ( موال ) وهناك مسمى آخر له ببعض الدول العربيه ولكن للأسف لا اذكره حاليا .. وهذا يعني ان الدول العربيه تلتقي في العديد من الفنون والتراثيات وان اختلفت الاسماء فكلنا عرب وتاريخنا واحد وحضارتنا وتراثنا كذلك .. هالفن من شروطه انه فقط يتكون من 7 ابيات او مقاطع وتكون الثلاثه الابيات الاولى على قافيه واحده وبنفس الكلمه ولكن لكل كلمه معنى مختلف .. اما الابيات او المقاطع الثلاثه اللي بعدها فتكون على قافيه مختلفه ولكن تحمل نفس الكلمه وايضا لكل كلمه معنى مختلف اما قافية البيت او المقطع السابع فتعود لقافية الابيات او المقاطع الثلاثه الاولى وهو مايعرف بالتلاعب اللفظي للكلمه يعني للكلمه معاني عديده رغم انها تحمل نفس الحروف ..
راح اقدم حاليا نصين مع شرح لقافية البيت او المقطع والتي توضح التلاعب اللفظي بها ..


النص الأول :


ياناعم الصوت وبالخدين حبّة





خال



( حبة الخال )
ياكل اهلي واجدادي وعّم و





خال



( آخ الأم )
شوقي ذبحني وانته الشوق منه





خال



( غير مشتاق )
مامال قلبه وربّي رايقك ما





مال



( لم يميل لغيرك)
وكيف عنك يميّل وانته كنز و





مال



( الثروه الكبيره )
ولا جنّ ليله تغنّى بالسهر يا





مال



( لحن غنائي معروف )
وانته كما انته مريح (ن) مهتنيّ و





خال



( غير مشتاق )


النص الثاني :

تكفى اتصل بي ولو بس فالشهر





مّره



( مره وحده )
واذكر وليف(ن) شرابه الحنظل و





مّره



( الشراب المرّ )
ودرب(ن) جمعكم خفوقه يتبعه و





مّره



( يمشي فيه )
علّ وعسى يلتقيبك ياكحيل





العين



( العين فيها كحل )
ياللي مكانك تعلّى في ربوع





العين



( مدينة العين بدولة الامارات العربيه المتحده )
فديت اسم(ن) بدا بأول حروفه





العين



( حرف من حروف اللغه االعربيه)
وراح ونساني ولا فكر يجي





مرّه



( مره وحده )

اتمنى ان اكون وفقت في الشرح وماقدمته من نصوص كما انوّه بأن حرف العين ومدينة العين جاء ذكرهما لكون البيت يتطلب ذلك .. يعني بإختصار بلاش منها التوقعات اللي بالي بالك لاتورطونا بعد ^^ ..


طابت مساءاتكم ..

اخوكم / رايق البال

[اسطورة لن تتكرر]

لا بالجميع ..
نص على السريع من باب التواجد وعذرا لبساطته ..



ومرّني ..

لا هزّتك ذكرى الليال
اللي بها ذقنا الوصال
وعشنا سوى
احلى تفاصيل الجمال
في ليلة ( ن)
فيها تناثر كل شي
وانته وانا والحب
يكمل انسنا ..

ومرّني ..


ياصاحبي
نفسي اسألك
اشتقت لي ؟
حنيّت لأيامي معك ؟
اما انا واللي خلق ذيك العيون
كلّي انا انده عليك
مشتاقلك
محتاجلك
وانطر هطولك يامزون

ومرّني ..


ياصاحبي
خلني عن العالم اغيب
وانسى مساءات التعب
وانسى الأسى
وجرح(ن) تخثّر والتهب
قرب تعال
كلي انتظار انك بعد غيبه تجي
تنده علي
تسأل علي
واعيش في كنفك ليال ..

ومرني ..


طابت صباحاتكم ..
اخوكم / رايق البا

[اسطورة لن تتكرر]

هلا بالجميع ..
اتمنى ان تروق لكم هذه المصافحه مني بهذا النص ..



تعال اعلمك حاجه ..
انا مثلك صعب القى
يبو همسه ونظرة شوق
وضحكه بالحلى والذوق
تزلزل مابقى فيني
واهمسلك واناجيلك
انا كلك على بعضك
ورب الكون احتاجه

تعال اعلمك حاجه ..



تعال اعلمك حاجه ..
تسلسل بالجوى حبك
وتاهت خطوتي بدربك
انا ماكنت ابي اغرم
ولا اوله ولا اشتاق
ولا اسهر واغنيلك
ولكن جابتك الاقدار
بدربي نار وهّاجه

تعال اعلمك حاجه ..



تعال اعلمك حاجه
احبك وادري لي تشتاق
وتتذكر جنوني بك
وضحكاتي وهمساتي
واشياء كثير بالخفاق
صعب تحكى وتناديلك
متى تلفي ونتواجه

تعال اعلمك حاجه ..


اخوكم / رايق البال

[اسطورة لن تتكرر]

هلا بالجميع ..
نص للرايق من باب التواجد اتمنى ينال رضاكم ...



ماتغيرنا ولكن ..

افتقدت الشوق فيك
يوم انا انده عليك
وبالمحبه احتويك
كان كلّي لك ينادي
يووووه وينك انته ؟
عن عيوني
عن جروحي
عن جنوني
عن عنادي
الله يرضالي عليك

ماتغيرنا ولكن ...


قلتلك ياما احبك
وقلت لي ياما هويتك
وكم رسمنا من اماني
ولا ضوى الليل بوشاحه
كنت لي شمعة زماني
واختلفنا بالنهايه
والهوى اعلن رحيله
وضيّع الخافق دليله
يوووه من يقول احنا افترقنا ؟
وانت عندي كل ليله
تهمس بحبك عشاني

ماتغيرنا ولكن ...


ياحبيب القلب انته
والغلا والشوق انته
انت بس وحدك ملاكي
وانت ترياقي وهلاكي
غني لي بصوتك حبيبي
خلّني انسى مكاني
وانسى ايامي وزماني
واصرخ بصوتي احبك
منهو مثلك بس انته
يحتوي كامل كياني

ماتغيرنا ولكن ...


زانت ايامكم ...
اخوكم / رايق البال

[اسطورة لن تتكرر]

هلا بالجميع ..
من ارشيفي القديم واتمنى ينال رضاكم ..



وحشتكْ يالغلا ولاّ

خذتّك دنيتك عني ؟

وربّك ماقوى يسلا

خفوق(ن) سالبهْ مني

متى مامرّ به هلاّ

خيالك وانتشى يغنّي

هلا بوضحكة(ن) خجلى

هلا بشوق(ن) يمرمرني

هلا بونظرة(ن) تحلى

تلملمني .. وتنثرني

حبيبي لا حشى وكلاّ

لغيركْ خافقي ايحّني

احبك ياشذا الفلاّ

ياحب(ن) آه ذوبّني

غرامك فالحشا حلاّ

وروحي انته وفنيّ

احبك امنيّه وخلاّ

احبك منيّ وعنيّ

حبيبي ياعسى وعلا

تعوّد لي .. وتذكرني

بدونك دنيتي ثكلى

ووقت(ن) خاب به ظني

زانت ايامكم ...

اخوكم / رايق البال

[اسطورة لن تتكرر]

هلا بالجميع ..
عودة لقلمي وهلوسته التي تنتابه بين كل فتره ..


وعلى سبيل التمني

مسائي انت ..

مسائي انت يامن يبعثرني شظايا ويطوقني طيفه
من الجهات الأربع
ويزرع في صحراء قلبي ورده تذوب حنينا اليه
وشوقا لقطرة يرتشفها ليروي بها عطش السنين العجاف ..
اليك يامن لقائي بك كان صدفه وأي صدفة تلك كانت ..!
لازلت بكل هوس اسمع وشوشة همسك الحالمه تطاردني
رغم احجيات غيابك اللامنتهي ..
و ..

فلاش باك ..

التقينا ذات يوم وتفيأنا ظلال الحب ورسمنا الكثير من
الامنيات الجميله ومارسنا الكثير من الجنون ..
لازلت اتذكر ذلك الصخب الذي كنا عشناه واشتاق اليه ..
ياله من صخب وجنون كان محلقا بنا للبعيد ..

والآن ..

وبعد غيابك وسرابية وجودك اجد قلبي
واهنة نبضاته وتزيد وطأة معاناته
دونما بصيص امل يلوح من بعيد لعودتك ..
نعم باهتة هي ايامي بدونك بل وموحشه وكئيبه
واليك يأخذني القلب ويهز جذع حنيني
فأتهاوى شوقا اليك واتساقط في اغماءة طويله ..
وعندما اصحو يلفحني الانتظار المقيت
لحضورك السرابي ..

سيدتي ..

من ابجديات الحب انه عطاء بل وانصهار وجداني
فالتومأن السياميان التفريق بينهما يعني الموت ..
لست ادري الى متى سيصمد هذا القلب
في لهيب انتظاره لك ..
إلا انه ورغم ايمانه بأن من رحل قد لايعود
لازال يرسم البسمه ويزرع للأمل ورده
ويدندن بصوت هامس ..

غدا سيعود من رحل ..
غدا سيكون اجمل ..


انتهى ..
اخوكم / رايق البال
الجمعه
28 / 4 / 2017

[اسطورة لن تتكرر]

هلا بالجميع ..
مصافحه سريعه وعذرا للغياب ..
كل عام وانتوا بألف خير بمناسبة قدوم عيد الاضحى المبارك الذي تفصلنا عنه ايام معدوده فقط ..



( ما اظن يسلى بهالغيبه وينساني
يمكّنه اشتاق .. لكن استحى يرجع )
اما انا لاضواني الليل يلقاني
لازلت انا فيه ذاك العاشق المولع
لازلت انا فيه ذاك المغرم العاني
ومازال حبه بقلبي يسطع ويسطع
واشتاق له موت ذاك المبعد الجاني
اللي حروفه بوسط الجوف تتربّع
وياما لدربه عظيم الشوق وداني
وياما وياما وياما باللقا اطمع
وياما اناديه في ليلي ويقراني
وياما وياما دبيب الشوق بي يسجع
ورغم التياعي وآهاتي واشجاني
ادري وربي مصيره يعطف ويرجع
اللي وجوده يضخّ بدم شرياني
هو بلسم الروح والخفاق والمربع
لبيه ياللي طيوفه دوم تنصاني
لاعسعس الليل والدنيا بدت تهجع
للموت احبه وادري فيه يهواني
لكن الاقدار للاحباب كم تمنع

طابت مساءاتكم ...

اخوكم / رايق البال

[اسطورة لن تتكرر]

هلا بالجميع ..
نص من فتره بسيطه كتبته واتمنى ان يروق لكم ..



ومر العيد

وانت بعيد
ويسألني الخفوق اللي
ضناه الشوق والتنهيد
غريبه ذا التناسي منه
وانته مثلما انته
تردد للامل تجديد
ومر العيد

....


ومر العيد

وانا انصب خيام الحب
واهدي لوعة (ن)بالقلب
واهمس للجرح باكر
بيرجع للخفوق الصب
واردد للامل تجديد
ومر العيد

....


ومر العيد

ولاصوتك نده وينك
وانا ادور عناوينك
وطيفك ماذكر لي يوم
وانا الملتاع لك كلي
وصاين عشرة سنينك
واردد للامل تجديد
ومر العيد

طابت صباحاتكم ..
اخوكم / رايق البال

[اسطورة لن تتكرر]

هلا بالجميع ..

بعد غياب عن فن المسًبع او الزهيريات كما يطلق عليه اعود مجددا بنص جديد علما بأنني سبق وقدمت هنا عدة نصوص عن هذا الفن كما وضحته وشرحته ايضا بشكل سريع ..
وللتوضيح مرة أخرى أقول بأن هذا الفن مشهور جدا بالسلطنه وتحديدا بالمنطقه الشرقيه وبعض مناطق الباطنه كما انه مشهوربشكل كبير خليجيا وخاصة في الكويت والبحرين وبنسبه بسيطه بالامارات وقطر والسعوديه ويطلق عليه زهيريات او مسبع كما ان هذا الفن معروف بمصر ودول الشام باسم المواويل وهو مايوضح بأننا كعرب نلتقي في أشياء كثيره وان اختلفت المسميات ..
فن المسبع وربما سمي بهذا الاسم نظرا لكونه يتألف من 7 اشطر يعتمد على التلاعب اللفظي للكلمه ومن شروطه ان تكون مفردة الاشطر الثلاثه الأولى تحمل نفس الكلمه وان كانت تختلف في معناها في تلاعب لفظي بها كما سنرى ادناه بالنص ..
وينطبق هذا الامر أيضا على الاشطر الثلاثه الاخرى كما وضحته أعلاه اما بالنسبه للشطر السابع والأخير لابد وان تكون المفردة تعود لنفس مفردة الاشطر الثلاثه الأولى ..

النص :

ياناعم العود ياللي من الهوى سالي



مامر يوم(ن) وعنك الصب ما سالي



وكيف اسلاك واسمك يالغلا سالي



يوم التقينا سوا انته وانا الاثنين



والحب طبطب على كل من بالهوى اثنين



وفجأه افترقنا وكانت ليلة الاثنين



ياطاير الشوق سلملي على سالي



التوضيح :



سالي

بالشطر الأول : مرتاح


سالي

بالشطر الثاني : اسألك عنك




سالي

بالشطر الثالث : اسم البنت وطبعا مجرد اسم



الاثنين

بالشطر الرابع : انا وانت ( عدد )



اثنين

بالشطر الخامس : يرمز أيضا للعدد



الاثنين

بالشطر السادس : يوم الاثنين


سالي



بالشطر السابع والأخير : اسم البنت

طابت مساءاتكم ..

اخوكم / رايق البال

[اسطورة لن تتكرر]

هلا بالجميع ..
مصافحه سريعه وعذرا لبساطة الكلمه




وتدري بي

استحاله انساك
وكيف انسى؟
وانته موطني والفيّ
وانته للعيون الضّي
وانته للحياه الميّ
وكيف انسى ؟
وهذا الخافق الملهوف
يصّيح للأبد اهواك

وتدري بي





وتدري بي

اذا مالليل بي عسعس
الملم كل اشيائي
وابعثر كل اجزائي
واصوّت لك
الا يالمبعد القاسي
الا ياكل هلي وناسي
تعال نطيش
ونهجر ديرة الاحزان
وتهمس لي احبك موت
واهمسلك علي بشويش

وتدري بي



طابت مساءاتكم ..

اخوكم / رايق البال

[اسطورة لن تتكرر]

هلا بالجميع ..
عذرا للغياب ونص بسيط على السريع من باب التواجد ..


على فكره ..

طبعك ذا غريب امره ..!
بديت تغيب
وتتقاسى
وتتعذر
وتتناسى
وتوعد باللقا بكره
وياما انتظر بكره
على فكره ..!


على فكره ..

طبعك ذا غريب امره ..!
بديت كثير تتغلى
ونهج الصد يتجلى
وتتوهم احب غيرك
وتتعمد فتقصيرك
وتنكر صافي العشره
على فكره ..!


على فكره ..

طبعك ذا غريب امره ..!
بديت تميل للترحال
وصمتك طال
والحيره
وبان اليوم تأثيره
وبيدك ياعديل الروح
دفنت الحب في قبره
على فكره ..!

طابت صباحاتكم ..
اخوكم / رايق البال

[اسطورة لن تتكرر]

هلا بالجميع ..
بالبدايه الف شكر لكل الاخوه والاخوات على مايقدموه من معزوفات شجيه من القصائد الجميله والراقيه ..
والشكر مني موصول لطاقم الرواق بكافة اقسامه على جهودهم الكبيره في رفعة الرواق وتألقه وعذرا من الجميع لقلة تواجدي بالفتره الاخيره ..
مصافحه بسيطه مني وعذرا للغياب ..


وعدنا اغراب
بدنيا مالها اصحاب
تلاشت كل امانينا
وتاهت كل خطاوينا
وتسألني عيون الصب
وينه بو قلب حباب ؟
من الجاني فهالحاله
وعن خله وصد الابواب؟
من اللي كان للفرقى
يدور اتفه الاسباب؟
وعدنا اغراب ..!

وعدنا اغراب
بدنيا مالها اصحاب
وليل (ن) كان يجمعنا
غدت عينه تناظرنا
كأنا اغراب ..!
وماعاد الصبر ينفع
ولا عاد الندا يسمع
ونوخ بالجوى هم (ن)
كساني بالالم جلباب
وعدنا اغراب ..!

طابت مساءاتكم ..
اخوكم / رايق البال

[اسطورة لن تتكرر]

هلا بالجميع ..
نص بسيط بالفصحى من باب التواجد
أتمنى ينال رضاكم ..


ليتنا كنا صغارا
كانت الاحلام اصفى
والأماني والليالي
ياصديقي كانت اوفى
كم ركضنا في مروج
وزرعناها اماني
كم قطفنا يارفيقي
ثمرها قبل الأوان

وكبرنا ياصديقي
والحلم اضحى يعاني
وغدا كل جميل
ينأى عني في ثواني
وبدت دقات قلبي
كم تعاني ما اعاني
وشجون النفس تهمس
ليتنا كنا صغارا
نرتشف احلى الاماني ..!

طابت مساءاتكم ..
اخوكم / رايق البال

[اسطورة لن تتكرر]

هلا بالجميع ..
عوده بعد غياب لقلمي وهلوسته ..


مرهق هذا المساء
بكل مافيه من دقائق وساعات
كل المساءات سيدتي تشبهك في طقوس الحنين الذي يسكنني ويجنح بي اليك ولكنه هذه المره اكثر وطأه ..

يزاحمني دائما ضجيج الأمنيات والاشواق
ويتلبسني صوتك المبحوح
وطيفك من خلف سراب البعد اراه يتجسد امامي
بكل الاحداث التي مرت وخاصة الاخير منها ..
كان لقاءا عاصفا بكل محتواه وتفاصيله
وربما لكوني غير مستوعب لتلك الاحداث المباغته
التي لازالت تمر امامي كمشاهد شريط سينمائي
اجدني أعيش حلم اللقاء واصدقه ..!

ومابين انتظاراتي الممله
واحلامي السراب
يقبع كابوس رحيلك
وتجمعني بك احلام اليقظه
ومشاهد لقاءاتنا تمر امام ناظري
بكل ماتحتويه من جنون وطقوس
بعيده عن العقلانيه ..
تلك العقلانيه التي يتشدق بها الكثير ولايمارسونها ..!
لازالت ضحكاتك ترن في اذني
وعبق عطرك الباريسي
يملأ المكان وكل جوارحي
ولازالت بك تجمعني اشياء أخرى
لاتقال ولا تحكى ..
يالهذا العشق السرمدي
الذي لك وبك يكبر ويكبر

نعم اعترف بأن يومي بكل ساعاته ودقائقه وثوانيه
يمضي في رتم ممل ومؤلم
ورغم ذلك لازلت احلم بيوم
اسمع فيه وشوشة صوتك الحالم
واعيشك واقعا
متجسدا امامي
في اجمل صوره وتفاصيله ..

انتهى
اخوكم / رايق البال

[اسطورة لن تتكرر]

هلا بالجميع ..
من باب التواجد نص بسيط اتمنى ان يروق لكم ..



انا ادري به
مهما غاب عن وكره
مصيره يحن
مصيره يعود
ويتذكر مواجيبه
ويرجع كله متلهف
لذاك المنتظر طله
وسيفه للقا سله
ونار الشوق تسري به
انا ادري به ..!

انا ادري به
محال العشره ينساها
ولا يبدل ولا يغير
بإيمانه وفحواها
وترجع لي ليالينا
وهمس(ن) كان يحوينا
وكل(ن) يهتني بخله
انا ادري به ..!

انا ادري به
حبيبي والغلا كله
وعنوان الوفا وأهله
ومهما باعدت الأيام
وتناءت حالي الاحلام
يظل الحب يجمعنا
بأنغامه وأساليبه
انا ادري به ..!

طابت صباحاتكم ..
اخوكم / رايق البال

[اسطورة لن تتكرر]

هلا بالجميع ..

من جديد نلتقي ونص على السريع أتمنى ان ينال رضاكم ..



تغلّى والغلا منك


وربي لايق(ن) زاهي


تجلى بالوفا لنّك


سليل الأصل والجاهِ


جمالك ، مبسمك ، سنّك


كلامك ، عقلك الراهي


وصالك ، جفوتك ، ظنّك


ورمش (ن) آمر(ن) ناهِ


الا ياحارمي منك


الا يالساهي اللاهي


طلبتك دام ناصنّك


تخفف حرقة الآهِ


ونوّخ بالذي عنك


محال ايشوف (ل) اشباهي


حشى ماخاب به ظنك


محب (ن) يطعمك شاهي


وقلب(ن) دوم عاطنك


مقام(ن) عالي(ن) راهي


طابت صباحاتكم ..

اخوكم / رايق البال

[اسطورة لن تتكرر]

لن تمسها النار ان شاء الله / بقلمي 30-12-2014

يسعد مساكم / صباحكم
هلا بالجميع ..

لقاء آخر يجمعنا وقصه حدثت في احدى الدول العربيه وتحديدا مصر ..
من المعروف ان رجال الدين المسيحي وحتى العامه يلبسون الصليب او يوشمون به ايديهم او اي مكان آخر بأجسامهم وهالشي انا لاحظته بالفعل اثناء سفراتي لمصر لقضاء اجازتي فيها بعض الاحيان ..
راح احكي لكم قصه حقيقيه حصلت بمصر من خلال سردها بقلمي البسيط وهي تدل دلاله كبيره بأن هناك الكثير من الناس في عالمنا العربي والغربي بعضهم مسلم ولكن من الصعب ان يجهروا بذلك خوفا على حياتهم وحياة اسرهم بحكم مناصبهم ومراكزهم وسياسات الدول اللي هم فيها ..الخ ..
يوم من الايام ركب رجل مسلم في القطار علشان يروح منطقه معينه ولما جلس على كرسيه كان جالس بالكرسي اللي جنبه راكب من نفس جنسيته ..
كان هالراكب رجل وقور بحكم سنه وهدوءه ولحيته الكثيفه والكبيره اللي زادته طبعا وقار وحكمه وهيبه ..
وكان يتدلى الصليب على صدره من خلال سلسله كبيره على عنقه مما يوضح انه احد رجال الدين المسيحي الكبار وله مركز ورتبه كبيره بالكنيسه لكونه قسيس ..
جلس الرجل المسلم جنبه وتبادلوا السلام بشكل عادي ..
فجأه ..
التفت الرجل المسلم لحامل الصليب وقال له : من المؤسف ان تتمرغ هذه اللحيه الكبيره في النار ..
سكت رجل الدين المسيحي شوي وعقبها رد عليه بكل هدوء وطمأنينه : لن تمسها النار
ان شاء الله
..
ساد الهدوء بينهما وبعد شوي وقف القطار ونزل الرجل المسلم من القطار لكونه وصل للمحطه اللي يبي ينزل فيها اما الرجل المسيحي ظل بالقطار لأنه ماوصل للمحطه اللي عند بيته ..
بالليل حاول الرجل المسلم ينام بس ماقدر وانشغل تفكيره بهذاك الرجل وتساؤلات كثيره مرت على باله ..
جلس يسأل نفسه .. شو يعني لن تمسها النار ..!؟ ليش قال هالعباره وهو رجل دين مسيحي ..!!؟ ليش ماسألته شو يقصد بها ؟ ليش ما اخذت عنوانه واسمه .. الخ من تساؤلات حاول يتوصل لإجابه مقنعه بس ماقدر ..
ولأن الله عالم بكل شيئ ولأن الرجل المسلم كان قلبه وتفكيره مشغول باللي صار بينه وبين هذاك الرجل .. بعد نومه جاه بالحلم شخص غير واضحه معالمه واعطاه عنوان بيت الرجل المسيحي بأي منطقه واي شارع وعماره وشقه ..!
لما صحى من النوم الصبح وبعد تأديته صلاة الفجر تحرك للعنوان اللي الله اهداه له بالحلم وهو يتسائل ياترى صحيح اللي حلمته ؟ طيب لو صحيح شو راح تكون ردة فعله وهو يشوفني قدام بيته ..!؟ اخاف اروح ويطلع الحلم مجرد اضغاث احلام الخ ..
ركب تاكسي واعطاه العنوان ووصل بالفعل ..
وقف قدام الشقه محتار .. ادق الجرس ولا لأ؟ ربما هي اضغاث احلام كانت ..!
اخاف يفهموني غلط واتورط ..!
بعدها قرر يدق الجرس ..
دق الجرس ..
ثواني وانفتح الباب .. موقف مذهل .. صدمه لكلا الرجلين .. الرجل المسلم استغرب ان العنوان صح ورجل الدين المسيحي استغرب اشلون هذا وصل لبيته ..!!
بعد زوال الصدمه شوي وكل واحد فيهم تمالك اعصابه ..
قال الرجل المسيحي للمسلم بكل طيبه وهدوء : تفضل بالدخول ..
دخل وهو حائر ومندهش والخجل يكسوه ..
قام الرجل المسيحي واحضر له شاي وهو يرحب به ويبتسم رغم انه بنفسه مستغرب مثله ومندهش من هذا اللقاء الغير العادي ..
بعدما شرب الشاي قال له المسيحي : كيف عرفت عنوان بيتي ؟ لو انت نازل معي بنفس المحطه كان قلت ربما تتبعت خطواتي بس انت نازل قبلي ..!
رد المسلم : بكل امانه السالفه غريبه وربما ماراح تصدقها ..
رد المسيحي : لا قول .. راح اصدقك اكيد ..
المسلم : بصراحه امس من وصلت البيت وبعدما تعشيت وجيت انام ماقدرت انام بسرعه ..
انشغل بالي وقلبي كثير باللقاء اللي جمعني بك واكثر شي عبارة (
ان شاء الله
) اللي قلتها ..
ولأن هالموضوع شغلني كثير نمت من التعب وحلمت بشخص جاني بالنوم وعطاني عنوان بيتك بالكامل ..
ولما صحيت الصبح اول شي سويته بعد صلاة الفجر ركبت تاكسي وجيت رغم ان على بالي ربما هي اضغاث احلام او شي من هالقبيل بس قلت خليني اقطع الشك باليقين واجيك ..! وبقية التفاصيل تعرفها طبعا من فتحت لي الباب ..
استغرب الرجل المسيحي وابتسم وقال له بكل هدوء وطمأنينه : انا رجل مسلم وزوجتي وبناتي واولادي مسلمين والقرآن معنا بكل وقت بالبيت ولكن لظروف اقوى مني صرت اظهر للناس اني رجل دين مسيحي واضطر لتعليق الصليب بصدري واروح الكنيسه لكوني قسيس فيها ولو احد عرف اني مسلم راح يقتلوني ويقتلوا كل افراد عائلتي .. ولعلمك الكثير مثلي بالعالم لأسباب كثيره لايستطيعوا الجهر بإسلامهم رغم انهم مسلمين والله يعلم بصدقهم وحسن اسلامهم ..
هنا سكت الرجل الرجل المسيحي عن الكلام والمسلم يسمعه بكل ذهول ودهشه ..
فجأه ..
قام الرجل المسلم واحتضن اخوه بالاسلام وكل منهم عيونه تدمع من الفرحه ..
انتهى .. بقلمي

اخوكم / رايق البال

[اسطورة لن تتكرر]

يسعد مساكم / صباحكم
هلا بالجميع ...

قصه قصيره من زمان قريتها تدل على عظمة الاسلام وكثير اعجبتني وراح اكتفي بسردها بقلمي البسيط واتمنى تنال استحسانكم ..
من المعروف ان لعاب الكلب ( اعزكم الله ) نجس وقد امر رسولنا الكريم بأن اي اناء يلعق فيه الكلب لابد من غسله بالتراب 7 مرات حتى نضمن خلوه من النجاسه والامراض ..
يوم من الايام اجتمع 7 دكاتره من كبار دكاترة الالمان في المستشفى اللي يشتغلوا فيه ودار بينهم حديث حول تجربة ان يغسل الاناء بأقوى المطهرات المعروفه على مستوى العالم وفحصه بعد ذلك بدقه بالمجهر للتأكد من خلّوه من الامراض ..
احضروا كلب وقدموا له اكل بالصحن ومن خلص اكله شالوا الصحن غسلوه بالماي ومن بعدها بالمطهرات الموجوده معهم وفحصوه بالمجهر ..
كانت النتيجه انه لازالت بقايا من لعابه بالصحن ..!
ساعتها قالوا راح نجرب اقوى مطهر بالعالم تم انتاجه وبالفعل جربوا ..
بعد الفحص بدقه كانت النتيجه اللي صدمتهم بأنه لازال هناك بقايا للعاب رغم كل ذلك الغسيل والتنظيف والتطهير له ..!
ولأن الغرب وخاصة علماؤهم والناس المثقفه فيه معظمهم قارئين للقرآن الكريم وللأحاديث النبويه الشريفه من باب العلم بالشي رغم عدم اسلام بعضهم لأسباب عديده بالطبع ..
فجأه واحد منهم قال وبسخريه : لنجرب ونرى ماقاله محمد ..! وضحك ..
شاركه زملاؤه الضحك بالطبع وهم على يقين من عدم نجاح مافكروا به ..
اعادوا التجربه من جديد وبعدما اكل الكلب ما قدم له بالصحن ..
اخذوا الصحن وراحوا لحديقة المستشفى نظرا لتوفر التراب هناك ..
غمسوا الصحن فالتراب 7 مرات ثم عادوا للمعمل واجروا الفحص عليه ..
النتجيه كانت صادمه .. مذهله لهم وظل كل واحد فيهم يطالع الثاني وهو في قمة اندهاشه لأن النتيجه كانت لاوجود ولو لجزء بسيط من اللعاب بالصحن ..!!
ونظرا لرغبتهم في التأكد بشكل افضل قرروا اعادة التجربه من جديد ..
وفعلا اعادوا وكانت النتيجه كالسابق ( 0 % ) حيث
لاوجود ولو لجزء بسيط من اللعاب بالصحن ..!
دقايق مرت وهم بين خوف ودهشه وذهول ..
فجأه استطاع اللي قدم هالفكره يطلع من هالموقف الرهيب ..
بلع ريقه وقال بكل هدوء وسكينه وخشوع : اشهد ان لا اله الا الله وان محمدا رسول الله ..!
سمعه كل من معه بالغرفه من زملاؤه وكل واحد فيهم نطق بالشهاده وراه واعلنوا اسلامهم ولله الحمد ..
انتهى .. بقلمي
اخوكم / رايق البال

[اسطورة لن تتكرر]

يسعد مساكم / صباحكم
هلا بالجميع ..

عوده اخرى لقلمي وطرح يغلب عليه الطابع الكوميدي من خلال القصص اللي اطرحها بين فتره والثانيه عن بعض الاحداث اللي عايشتها ..


الله يسلمكم زمان وانا بالصف السادس الابتدائي كان معنا طالب ماشاء الله
عليه طويل وضخم لكونه اكبر مننا فالسن لدرجة ان الطلاب ينادونه بالوحش ..
هالطالب كان اسمه احمد وكثير كان مشاغب ويضرب الطلاب وطبعا احنا اصغر منه لكونه كان راسب سنتين في صفه وانتقل معنا ..
كنت الوحيد اللي دايم هو مركز عليه مايمر يوم مايضربني فيه ههههههه وكلما شافني لازم فجأه يجيني بوكس منه او شوته انا وحظي عاد لدرجة ان بقية الطلاب كانوا يقولوا له .. حرام عليك ليش تضربه دايم ..!!
وكان يرد عليهم بكل ثقه .. مزاجي كذي .. بضربه يعني بضربه ..!
ربما كان لصغر سني وحجم جسمي سبب كبير في انه متسلط علي هههههه ..
يوم من الايام وكنا اذكر بالفسحه بس انا ماطلعت من الصف قلت اذاكر شوي لأن بالحصه الرابعه كان علينا امتحان وبالصف معي حدود 4 طلاب نفس الشي كانوا يذاكروا ..
فجأه دخل صاحبنا واول ماشافني قام يركض وراي بالصف يبي يضربني وانا اركض عشان اشرد عنه لحد ماحاصرني ووقفت ووراي جدار الفصل وانا خايف منه والطلبه اللي بالصف يحاولوا فيه يخليني بحالي وهو مصّر يضربني ..
مسك بيده اليسار رقبتي وجهز إيده اليمين عشان يضربني بوكس بكل قوته ..
انا كنت في وضع صعب لأني مو قادر اهرب لأن ظهري ملاصق الجدار ولا قادر افك ايده من رقبتي ..
شوي وانا اطالعه يرفع ايده اليمين عشان يضربني بوكس بكامل قوته وانا عيني على قبضة ايده اللي اشوفها تقرب من وجهي بسررعه وافكر اشلون اتخلص من هالموقف لأن الضربه راح تكون قويه جدا واحتمال تجي بعيني او اسناني ومعناها خلاص على عيني او اسناني السلام عاد لو جت الضربه فيهم هههههه ..
وانا اشوف البوكس جاي بكل قوته وعلى بعد سنتيمترات مني مدري والله كيف صارت هالحركه مني فجأه بس اكيد الهام ورحمه من الله لي ..
نزلت بسرعه بكامل جسمي لتحت بثواني فقط قبل لاتوصلني ضربته ..
إلا واسمع قوة الضربه بالجدار طاااخ وصرخته بكل قوه وهو يتألم لأنه هو تفاجأ بالحركه ومامداه يتصرف خلاص سبق السيف العدل مثلما يقولوا هههههه ..
آآآآآآآه انكسرت ايدي واااي بمووت وقام يصيح والدموع ماليه وجهه من قوة الضربه والألم ..
طلع من الصف وهو يصيح وبنفس الوقت يهددني ماعليك .. خليني بس ارجع وايدي تخف ان ماوريتك شغلك ولا بتشوف .. والله بقتلك ... الخ من عبارات تفرح الخاطر وتسعد القلب الحزين هههههه وانا ساكت ما اتكلم ..
شوي وانتهت الفسحه وبدأ الاختبار ومن خلص الدوام قلت لواحد من الطلبه ساكن قريب بيتنا واسمه عبدالله ..
انا : بكره خلاص انا مابداوم عبادي اخاف هذا يذبحني لو جيت ..
عبدالله : لاتخاف منه اصلا اظن ماراح يجي لأنه وايد تعوّر بإيده ..
اليوم الثاني انا بصراحه مادوامت ووعلى المغرب رحت بيت زميلي وسألته ..
انا : هاا .. كيف داوم احمدوه الصياح ؟ هههههه
عبادي : الصياح عاد سمّيته الحين ههههههه .. لا ماداوم واليوم ابوه جانا المدرسه وقال للمدرس ان ولده احمد طاح وانكسرت ايده وسووا له جبس بالمستشفى واحتمال ماراح يداوم الا بالامتحانات النهائيه اللي راح تكون بعد شهر تقريبا ..
انا : ايوا الصياح ليش ماسمعته كيف يبّغ ويرغي يوم تعور بإيده هههههه ..! طاح هااا .. طاح ..!!؟ وبعد يكذب على ابوه عشان مايضربه ..! قال طاح قال مو كنّه كان يبي يضربني ويكسرني انا المسكين .. يستاهل اللي جاه ..
اليوم الثاني رحت المدرسه واحمد طبعا ماداوم وارتحنا من مشاغباته وعقبها اعطونا اجازه قبل الاختبارات النهائيه ..
بعد انتهاء الاجازه داومنا كلنا عشان نختبر وكنت طول الطريق خايف لأنه معناه احمد راح يداوم واكيد ناويلي على نيه ولا اجمل هههههه ..
دخلنا الصف إلا واشوف احمد ايده من الاصابع لحد الكوع مجبّسه ..
مريت جنبه وطبعا ماله داعي اوضح نظرات الشوق اللي شفتها بعيونه لما شافني ههههه ولا ذاك الهمس اللي اسمعه .. انكسرت ايدي بسببك .. خليهم بس يطلعوه من ايدي وشوف شو بسويلك .. ياويلك مني .. الخ من عبارات الواحد يرتاح نفسيا لما يسمعها اكيد هههههه ..
انتهت الاختبارات وعطونا موعد لإستلام الشهادات ..
لما حان يوم استلام الشهادات قلت لصاحبي عبدالله ..
انا : عبوود .. جيب شهادتي معاك بكره انا مابروح المدرسه ..
عبوود : ليش ..؟
انا : شو ليش بعد ..!؟ اخاف احمدوه ايده خفت وشالوا الجبس وعاد تعرفه انت اكيد بيكسرني من يشوفني ..
عبوود : صح والله عندك حق ههههه .. خلاص ولايهمك انا بجيبها لك ..
راح اليوم الثاني صاحبي واستلم شهادتي وشهادته وشافه احمد وعلى طول سأله لما شافه ..
احمد : وين صاحبك عيل ؟ اشوفه ماوصل للحين عشان يستلم شهادته ..!
عبدالله : راحوا البلد هو واهله خلاص وقال لي استلم شهادته عنه ..
احمد : اهاا .. راحوا البلد هاا..؟ زين زين .. مصيره يجي واشوفه ماعليه ..
رجع عبدالله من المدرسه واعطاني الشهاده وخبرني باللي حصل ..
انا : شفت كيف انه يدورني دواره ..! كان معي حق لما قلتلك انت استلمها عني الشهاده ولا كان خلاص متكسر جسمي الحين ..
عبدالله : صح والله ههههه .. انت لو شفت عيونه كيف يدور عليك كان الشرر يتطاير منهم نعم هههههه ..
ضحكت انا وقلت : شفت كيف ..!؟.. الحمد لله اني مارحت ههههه ..
انتهى .. بقلمي

اخوكم / رايق البال

[اسطورة لن تتكرر]

يسعد مساكم / صباحكم
هلا بالجميع ...

كثير نسمع بأنه لاتوجد جريمه كامله وان لابد من وجود خطأ ما يحدث وتظهر الحقيقه ورغم إيماننا بذلك إلا ان الحياه اثبتت بأن آلاف الجرائم تحدث يوميا ولم يتم التوصل للجناه لأسباب عديده ...
اليوم راح احكي لكم قصه وهالقصه حصلت في دوله عربيه عام 1930 حسبما اتذكر ...
سرد القصه وكتابة السيناريو وتصوير الاحداث والاخراج بقلمي المتواضع ..
الله يسلمكم مره بنت ومعاها 3 رجال شكلوا تنظيم عصابي وعملوا العجب في السرقات الكبيره ..
اتفقوا ان البنت تنتحل شخصية اميره ذات غنى وجمال وشخصبه استقراطيه والرجال الثلاثه اللي معاها واحد سائق والإثنين حراس شخصيين لها ...
وخطتهم بدأت بإستئجار سياره فارهه وبعدين تركب فيها الاميره ومعها الحارسين الشخصيين والسائق ويروحوا لأكبر محل ذهب ومجوهرات ..
ينزل الحراس الشخصين ويدخلوا على صاحب المحل ويقولوا له : سمو الاميره راح تدخل محلك الحين تختار مجوهرات وذهب لها ..
طبعا صاحب المحل يفرح كثير لأن اللي راح تشتري اميره مو انسانه عاديه وطبعا راح يكسب الآلاف من هالشراء ..
يفتح السائق لها باب السياره وتنزل بكل كبرياء وشموخ والحراسين الشخصين محيطين بها والسائق بسرعه يركض للمحل يفتح لها الباب وطبعا كل هذا يحدث امام عين صاحب المحل اللي يزيد انبهاره ههههه ..
وبسرعه يقربوا لها افخم كرسي وتجلس عليه وصاحب المحل يختار اثمن واجمل ماعنده من ذهب ومجوهرات ويجيبهم للأميره عشان تختار اللي تبيه ..
تختار الاميره طبعا الكثير مما غلى وزنه وسهل حمله وتقوم من كرسيها وتكتب لصاحب المحل شيك بالمبلغ لا وتزيد فيه شوي اكراما له هههههه . وبسرعه اللي معاها يفتحون لها الباب وصاحب المحل يودعها لحد باب السياره وهو فرحان من هالمكسب الرهيب اللي فجأه حصل عليه ..
ولما يروح اليوم الثاني يصرف الشيك يطلع انه بدون رصيد وعاد هو وحظه تحمل الصدمه ولا مات هههههه ..
استمرت هالعصابه على هالأسلوب سرقوا محلات كثير وكانوا يغيروا اماكن سكنهم بالفنادق وبعد بأماكن السرقات وكل يوم بمنطقه من البلد ... بدأت الصحافه تكتب والشكاوي تنهال على الشرطه وهي تحاول تحاصر هذا الأمر وتمسكهم لأن الذهب والمجوهرات المسروق بالملايين كان ..
اخيرا اجتمعت العصابه واتفقوا على القيام بأخر واكبر سرقه لأن الوضع خلاص صار خطير ...
تنكّر واحد منهم بلياس الشرطه وراح لأكبر محل مجوهرات ودخل وسلم على صاحب المحل وقال له : معك الضابط فلان .. طبعا سمعت انت عن عصابة الأميره اللي للأسف الشديد نهبت الكثير من المحلات ولم يتم التوصل لها ..
رد صاحب المحل : ايوا سمعت هالسالفه اصلا عامله بلبله في البلد والكل خايف منها ويتكلم ..
رد الضابط صاحبنا : اهااا .. عليك نور ماشاء الله عليك اسميك طلعت ذيب نعم وراح تسهل مهمتي وايد انته ..
صاحب المحل استغرب وسأله : اشلون يعني .. مافهمت قصدك ؟ وضّح لي اكثر ..
هنا عاد صاحبنا رسم الجديه على وجهه واخذه على جنب وهو يهمس له وقال : عندنا معلومات مؤكده ان هالاميره هي وعصابتها راح تجيك بكره الساعه كذا .. وطبعا انت سمعت عن اسلوبها انها تختار اغلى واثمن المجوهرات .. الخ ..
رد صاحب المحل : ايوا سمعت عن هالموضوع ..
هنا قال له صاحبنا : اهاا .. الحين عاد بقولك شو تسوي .. لما تجيك هالاميره خلي نفسك ماعندك خبر بأي شي واعطيها اللي تبيه .. احنا متابعين للموقف تطمن ولعلمك هي وعصابتها ساكنه فندق كذا .. والحين بروح عنك بس ارجوك خليك ملتزم بالخطه لاتخرب علينا خطتنا واحنا من نمسكها تعال لي المركز الفلاني عشان تستلم مجوهراتك وذهبك وراح نعطيك جائزه نتيجة تعاونك هذا مع رجال الأمن وراح تشتهر والصحافه تكتب عن بطولتك ههههههه ..
فرح صاحب المحل وتطمن ان اخيرا راح يمسكون هالعصابه وكمان راح يشتهر ..
في اليوم الموعود جت العصابه بس هالمره صاحبنا الضابط ماكان عندهم .. اختارت الاميره زي العاده اللي تبيه وبعدها قالت لصاحب المحل : انا مقيمه في فندق كذا ياريت تجيني هناك بعد ساعه ومعاك مجموعه اخرى عشان اختار بشكل افضل لأني شوي مستعجله حاليا وعاد لما تجي بعطيك المبلغ اللي تبيه وفوقه مبلغ هديه مني .. صاحب المحل قال لها : حاضر سمو الاميره ولايهمك راح اكون عندك بالموعد اللي ذكرتيه ..
طلعت الاميره وصاحب المحل يودعها بكل احترام وهو متطمن خاصة وان سكنها طلع نفس اللي قال عليه صاحبنا الضابط ..
وصل صاحب المحل فنفس الموعد للفندق وشاف الضابط يتمشى بالحديقه وابتسم كل منهما للثاني هههههه ...
طلع للأميره جناحها واعطاها المجموعه الجديده من اللي جابهم .. اختارت الاميره كل اللي جابهم وقالت له : الحين بكتب لك شيك بالمبلغ وفوقه مبلغ بسيط هديه لك مني .. ولحد ما اجهز لك الشيك اشرب هالعصير وارتاح ..شرب صاحبنا العصير وراح ف سابع نومه ههههه .. شوي إلا والضابط صاحبنا داخل الفندق ويقول لمدير الفندق : بسرعه قول لي الاميره ساكنه بأي جناح ؟ رد مدير الفندق : خير شو حاصل ؟
رد الضابط : بعدين بتعرف نايمين فالعسل انتوا ماعندكم خبر بشي مو كأنكم بالبلد عايشين ..!!
طلع بسرعه هالضابط للجناح وفجأه نزل ومعاه الاميره ومعها السائق وحارسها الشخصي مقيدين وهو يكفخهم ويقول لهم قدام كل المتواجدين ومن ضمنهم مدير الفندق : ع بالكم راح تظلوا دوم تنصبون ع الناس هاااه ؟ ماعليكم انا بوريكم شغلكم .. اعدام فيكم ماراح يكفيني ... وفجأه التفت لمدير الفندق وقال له : جهز فواتيرك وتعال لي المركز الفلاني بعد 3 ساعات لأن تعرف راح اكون مشغول بالتحقيق معاهم وتجهيز الأدله ...
تطمّن مدير الفندق وقام هو وكل المتواجدين بالفندق يشجعوه ويقولوا له : اسميك ذيب نعم .. صلبهم .. الخ .. ( والله اللي يسمع هالكلام راح يفتكر الرايق معهم ذيك الساعه هههههه ) ..
طلع الضابط وقدامه العصابه وركبوا السياره وتحركوا ...
وهم بالطريق فك قيودهم وغيروا ملابسهم وعلى طول للمطار لأن باقي على اقلاع الطائره يادوب ساعه لأن التذاكر خلاص كانت جاهزه والحجز من يومين كانوا مرتبينه هههههه .. خلصوا اجراءات السفر بسرعه واقلعت الطائره ..
بعد اقلاع الطائره بساعه صحى صاحب محل المجوهرات من نومه والتفت حوله ولما ماشاف احد قام يصرخ ونزل بسرعه وهو يصرخ : وينهم ؟ راحت مجوهراتي سرقتهم الاميره واللي معاها .. الخ تلّقاه مدير الفندق وابتسم له يهدّيه وقال له : خلاص تطمن مسكوها العصابه وبعد شوي بروح المركز عند الضابط فلان استلم فلوسي بس شوي اخلص حساب الفواتير وبنفس الوقت اعطيه مجال للتحقيق لأنه قال لي تعال بعد 3 ساعات ..
فرح صاحب محل المجوهرات وتطمن وقال له : اعرفه هالضابط والله انه نشمي ونفس الشي قال لي اجيه المركز عشان استلم مجوهراتي ..
رد مدير الفندق : خلاص عيل بنروح مع بعض ..
شوي وتحركوا وراحوا للمركز اللي قال لهم عليه صاحبنا الضابط ..
دخلوا المركز وهم فرحانين وشافوا احد الضباط جالس بالإستعلامات .. سلموا
عليه وقالوا : لو سمحت نبي الضابط فلان ..
الضابط استغرب من هالإسم وقال لهم : هالإسم مامر علي وماعندنا ضابط بهذا الإسم ..!!
مدير الفندق وصاحب محل المجوهرات ردوا بنفس اللحظه : اشلون ماعندكم هالضابط البطل واحنا من شوي شايفينه ومسك الاميره وبهذلها هي والعصابه وقال لنا نجيه هنا عشان ناخذ حقنا وهي تترحل للسجن بعد التحقيق ..!
الضابط أكد لهم بـأن هالإسم مو موجود معهم وقال لهم : اصلا احنا خلاص على وشك نمسكهم وحتى صورهم معانا .. لحظات بس بوريكم صورهم ..اول ماشافوا الصور إلا وصاحبنا الضابط كان من ضمنهم هههههه ..
هنا عاد بصراحه ما اذكر شو اللي حصل لهم من الصدمه ماتوا ولا جتهم نوبه ولا شو بالضبط هههههه ..!!!
انتهى ... بقلمي

اخوكم / رايق البال

ملاحظه : نشرت هنا لي في 7 / 7 / 2013

[اسطورة لن تتكرر]

يسعد صباحكم / مساكم
هلا بالجميع ..

نلتقي مرة اخرى ايها الاحبه وقصه بقلمي يغلب عليها الطابع الكوميدي ربما لكوني لا اميل كثيرا للتراجيدي والكوميديا السوداء وغيرها من انواع القصص ..
في احد القرى كان هناك يعيش شاب ..
هالشاب كان صايع ضايع لا صلاه ولا عباده ولا شغله ولا مشغله ..
لحد يوم من الايام قرر يرحل عن قريته على امل يشوف قريه يستقر فيها وتتحسن اوضاعه وتتعدل ..
ومن قريه لقريه ومن بلد لبلد لحد ماوصل لقريه كان ناسها بسطاء للغايه وعددهم قليل وكلهم اميين ..
لما وصل مدخل القريه التقاه شخص وعزمه للغدا ببيته لما عرف انه غريب وهو يقدم له واجب الضيافه سأله صاحبنا بكل عفويه : مالاحظت بقريتكم مسجد ..! انتوا وين تصلوا ؟
تنهد الرجل وهز راسه بأسى وقال : للاسف احنا ناس جهله واميّين ومانعرف نصلي ولا نعرف آيه من القرآن ..!
هنا عاد صاحبنا اظهر الجديه على وجهه ومعالم الغضب وقال : يعني شوو ؟ شو هالكلام اللي اسمعه منك ؟ لا حول ولا قوة الا بالله العلي العظيم .. هذي صلاه وعباده مايصير هالكلام ..!
الرجل انحرج وقام يبوس راسه على باله انه شيخ جليل وعالم وقور هههههه ويستسمح منه ويقول : اعذرنا الشيخ والله احنا ماودنا نكون كذي بس ترانا مانعرف شي والحمد لله اللي جابك لقريتنا عشان تعلمنا اصول الدين وتكون امام تصلي بنا وراح نتكفل بأكلك وشربك وسكنك ... ارجوك وافق عشان اروح ابشر اهل القريه .
صاحبنا تورط وهز راسه وهو يقول بخاطره : ياربي شو هالورطه اللي انا تورطتها ..!؟ انا بروحي ما اعرف اصلي ولا حافظ آيه من القرآن هههههه .. شسوي الحين بهالموقف ..؟
هو يكلم نفسه والرجل يطالعه وينتظر رده بفارغ الصبر ..
بعد شوي عدّل صاحبنا من جلسته وقال بكل هدوء : والله ياخي هذي مسؤوليه كبيره ولكن راح اقبلها وان شاء الله اوفق فيها وانا انسان ادوّر الاجر وعسى الله يتقبل مني ..
الرجل فرح وقام يبوس راسه مره وهو يجلّه ويقدره وطلع بسرعه وبشر اهل القريه وخبرهم باللي صار ..
فرحوا اهل القريه وجوا كلهم يسلموا على هالعالم الجليل ويشكروه على هالجميل اللي راح يسويه وصاحبنا يتكلم بهدوء ووقار بأنه يبغى بس الاجر ..
وبعد السلام وعبارات الشكر اللي انهالت على صاحبنا قال لهم بكل ثقه وهدوء ان الصلاه راح تبدأ من بكره لأنه اليوم واصل ومرهق من الدرب .. وكان هو طبعا يبي يجلس مع نفسه ويرتب الموضوع يخاف يتورط ههههه ..
لما حانت الصلاه باليوم الثاني وقف قدامهم كإمام وهم خلفه وقام يقول اي كلام يخطر بباله وبآخر الكلام يقول الله اكبر واهل البلد يرددوا وراه مساكين على بالهم هذي هي الصلاه ..
استمر على هالوضع عدة ايام وفجأه لمعت بعقله فكره جهنميه وقال الحين اهل القريه دام مايعرفوا شي وعلى بالهم اللي اقوله هو آيات قرآنيه ليش ما استغل الوضع؟ تعبت كل يوم نفس الاكل تقريبا ولابد اتصرف فهالموضوع ..
لما حانت الصلاه وقف كالعاده امام لهم وقام يقول .. ( ايها الناس اطعموا اليوم معلمّكم الدجاج وبعض الفواكه .. الله اكبر ..) ..
بعد الصلاه جاب له غداه الشخص اللي عليه الدور وتفاجأ ان غداه هالمره نفس اللي حدده لما كان يصلي بهم ..
فرح صاحبنا وقال ياليتني من الاول كذي سويت كان كل يوم غداي غير وعشاي غير ههههه ..
استمر شهور على هالوضع كل يوم يحدد لهم اللي يبي ياكله وهم مساكين يسووه له ..
لحد يوم من الايام كان يصلي بهم الظهر وقال ( اليوم اطعموا معلمّكم السمك واللحم وفاكهة من الموز والرمان .. الله اكبر ) ..
فجأه ..
سمع صوت شخص من آخر الصف يتحمحم ويقول : سبحان الله ..
دار راسه صاحبنا لأن هذا معناه حد فاهم موجود من ضمن اهل القريه او شخص غريب وصل القريه وعارف كيف الصلاه والقرآن ..
فكر بسرعه وهمس بقلبه ياربي شو هالورطه ؟ شسوي الحين لو طلع هالشخص فاهم؟ راح انكشف وانفضح اكيد .. وهو يفكر بسرعه فجأه جته فكره وقال بقلبه .. لقيتها لقيتهاا .. راح اعيد القراءه مره ثانيه بنفس الكلام ولو كرر كلامه وتحمحم معناه شكّي في محله ولازم اتصرف بسرعه ولو ماقال شي معناه الوضع عادي وماعلي خوف ..

كرر اللي قاله وهو قلبه يرجف من الخوف واذنه على آخر الصف يبي يشوف ردة فعل هذاك الشخص ..
تحمحم الرجل هذاك مره ثانيه وقال : سبحان الله ..
هنا عاد تأكد صاحبنا ان هالرجل فاهم ولازم يتصرف بسرعه عشان ماينكشف ..
وبسرعه جته فكره جهنميه وقال راح انفذها وعسى بس يفهمها ..
قال بكل خشوع وهدوء ( يا ايها المتحمحمون لا تتكلمون لكم رزق مما يعطون من ثيران بلا قرون .. الله اكبر ) ..
قالها وقلبه تزيد رجفته من الخوف يبي بشوف شو راح يكون موقف هذاك الرجل وردة فعله ..
فجأه سكت الرجل والشيخ صاحبنا ارتاح وتنفس الصعداء على قولتهم بعدما تطمّن ان الرجل فهم قصده هههههه وانتهت الصلاه وقاموا يسلموا على بعض ولما التقت عين الرجل بعين الشيخ الجليل كل واحد فيهم تبسّم لصاحبه وغمز بعينه هههههه ..
صاحبنا قال لأهل القريه اليوم غدا هالشخص الغريب معي ..
رد اللي عليه الدور : تمام شيخنا ولايهمك وضيفك ضيفنا كلنا ..
راحوا اهل القريه كل واحد لبيته والشيخ والرجل مع بعض راحوا ..
قال صاحبنا للرجل : والله انك فعلت خير لما سكت ولا كنت بتورط ..
رد الرجل : تراني فهمت قصدك عشان كذي سكت مع انه دار راسي من الكلام اللي تقوله بالصلاه..! خبرني شو سالفة هالقريه واهلها ؟ وشو هالصلاه الغريبه؟
رد صاحبنا : انا بعد دار راسي لما سمعتك تتحمحم وتقول سبحان الله وقلت ف خاطري ياربي من وين هذا طلع لي بعد ..!؟ انا صار لي سنين ومنين ضاحك على هذولا وبالاخير يجي هذا ويكشفني وانفضح ..! ويطلّعني من النعيم اللي انا عايش فيه ههههه ..! وقلت خليني اسوي هالحركه لعل وعسى يفهم ويسكت والحمد لله انك فهمت الحركه وسكت ولا كان ياويلي منهم ههههه ولد الحلال هذولا ثيران وبصراحه انا واحد صايع ضايع وهم على بالهم اني عالم وشيخ جليل وعاد انا من شفت كذي وضعهم قلت شو مكلفني اتعب عمري ؟ خليني معهم مرتاح .. ماكل شارب نايم من ظهر هالثيران لا واحدد اللي ابيه بعد ههههه ..
ضحك الرجل وقال : اهاا .. كذي السالفه عيل ؟ وانا اقول ليش كذي يقول لما يصلي بهم ههههه؟ ..
ضحك صاحبنا ورد عليه : الحين عاد دام تعارفنا وتفاهمنا .. شو رأيك اخبرهم بأني اخترتك نائب لي؟ وانت شايف كيف انا مرتاح واموري طيبه هههههه ..
ابتسم الرجل وقال : افا عليك تم .. حد يرفس النعمه بريوله ههههه ..!
صاحبنا ضحك ورد عليه وقال : خلاص عيل ولايهمك .. راح ارتب الموضوع اليوم ان شاء الله ..
قبل الصلاه قال الشيخ لأهل القريه اليوم بعد الصلاه لاتروحوا اريد اكلمكم بموضوع مهم ..
ردوا عليه تم شيخنا ولايهمك انت تأمر امر ..
بعد الصلاه وكل واحد من اهل القريه ينتظر بفارغ الصبر كلام الشيخ ..
تنحنح الشيخ وعدّل من جلسته وقال بكل هدوء ووقار : يا اخوان الانسان تحكمه ظروفه وانا اليوم معكم وقايم بواجبي ..
قاطعوه اهل القريه وردوا بصوت واحد : احنا نشهد والله ان لولاك انته كنا في ظلام نعيش ..
رد الشيخ بوقاره المعهود وهدوءه وقال : جزاكم الله خير .. الموضوع اللي اريد اكلمكم فيه هو اني انسان اولا واخيرا .. جايز امرض او اموت او ارحل او اي شي يصير وحرام بعد كل الجهد اللي بذلته ترجعوا للجهاله وعصر الظلام .. عشان كذي راح اخلي هالرجل الغريب نائب لي ويكون بدالي لو صار لي شي لاسمح الله وتطمنوا انا اختبرته وماشاء الله عليه طلع رجل تقي وورع وحافظ القرآن صم مثلي طبعا .. شو قلتوا ؟
ردوا اهل القريه : الله يعطيك طولة العمر وعسانا ماننحرم منك شيخنا .. ومن بعد كلامك احنا مالنا كلمه .. كلمتك على قدام وجزاك الله خير دوم تفكر بمصلحتنا .. وقاموا يبوسوا راسه ويشكروه وهو يردد استغفر الله .. استغفر الله ماله داعي الشكر يا اخوان انا منكم وفيكم وانا انسان ادوّر الاجر ..
كل هالاحداث تصير قدام هذاك الرجل وهو ساكت ويهز راسه ويقول بقلبه ( حسبي الله على ابليسك اسميك داهيه نعم ماينقدر عليك هههههه ) ...
وعاش صاحبنا ونائبه في القريه معززين مكرمين المده اللي كانت لهم بالحياه ..
انتهى ..
بقلمي
اخوكم / رايق البال

[اسطورة لن تتكرر]

يسعد صباحكم / مساكم
هلا بالجميع ..

لقاء آخر يجمعنا ايها الاحبه وقصه بسيطه بقلمي اتمنى تنال استحسانكم ..
الله يسلمكم زمان وانا بالصف الخامس الابتدائي كان اصعب واكره ماده معي الرياضيات واتوقع الكل مثلي ههههه ..
والله من كثر ما اكتب عن مقالبي اتوقع الكل راح يفتكر الرايق راعي مشاكل ههههههه ..
كان يدرسنا هالماده استاذ مصري وكثير عصبي ويضرب بدون تفاهم عشان كذي ربما كرهت هالماده اكثر ..
معظم حصصه معنا بالصف كانت بالرابعه او الاخيره لذلك عشان اهرب من حصته جلست افكر شو اسوي ياربي .. شو اسوي؟
فجأه ..
جتني فكره جهنميه وطبقتها ..
بالمدرسه معنا مصلى للصلاه ومفتوح من جوانبه الاربع ..
بديت بتنفيذ فكرتي بعدما ترسخت بذهني على طول ..
انتظرت لحد رن جرس نهاية الحصه الثالثه وبسرعه طلعت قبل لا يدخل مدرس الرياضيات ورحت المصلى ..
وظليت على هالحال اطلع بسرعه بعد انتهاء الحصه الثالثه مباشرة لو كان هو معنا الحصه الرابعه وقبل الاخيره لو حصته الاخيره بصفنا ..
استمر هالوضع كل يوم لحد يوم من الايام الاستاذ افتقدني وسأل الطلاب ..
الاستاذ : امال الواد اللي بالكرسي الاخير فين؟ اصلي مشفتوش من مده هنا ..!
الطلاب : رايح يصلي استاذ ..
الاستاذ : بقه كده .. طيب
لما رجعت الصف بعد نهاية حصته خبروني الشباب ..
الشباب : ياويلك يا (فلان ) استاذ الرياضيات اليوم سأل عنك
انا : قولوا والله ؟ شو قلتوا له الله ياخذ ابليسكم ؟
الشباب : قلنا له انك رايح تصلي
انا : اهاا جزاكم الله خير بصراحه .. بس شو كانت ردة فعله لما كذي قلتوا له ؟
الشباب : سكت شوي وبعدين قال بقه كده .. طيّب
انا : اهاا .. الله يستر لأن كلامه مايطمّن خاصه لما قال طيّب ..
مرن كم يوم وانا على نفس الموال لحد يوم من الايام الاستاذ الظاهر نفذ صبره ..
سأل الطلبه مره ثانيه : لسه الواد ده بيصلي زي عوايده ؟
الطلاب : ايوا استاذ ..
الاستاذ : فين بقه قلتوا لي ؟
الطلاب : بمصلي المدرسه استاذ
الاستاذ : بقه كده .. طب حلوا المسأله دي لحد ما ارجع لكم تاني ..
الطلاب : تمام استاذ ..
طلع الاستاذ من الصف وانا اشوفه من المصلى متجه لي وطبعا هالزياره المفاجئه والسعيده انا انتظرها واتوقعها تصير بأي يوم هههههه ..
قلت فنفسي ياربي شو هالورطه ؟ الحين هذا شو جابه هنا وشو راح اقوله ..!؟
قرب الاستاذ مني وانا ولا كأني شايفنه وقمت اركع واسجد وادعي ساعه .. اصلي التراويح نعم مو الضحى او الظهر هههههه ..
وقف الاستاذ فتره ينتظرني اخلص وانا بالعكس يزيد ركوعي وسجودي ولا كأني حاس به وشايفنه ..
نفذ صبره اخيرا وقال لي بصوت عالي : لما تخلص صلاتك ياحاج ابقى تعال اوضة ( غرفة ) المدرسين منت طبعا مش حتخلص صلاه الا بعد ماتخلص حصتي انا عارف ..!
انا سكت طبعا وظليت على وضعي وهو راح ..
ياربي شو اسوي الحين؟ مضروب اليوم يعني مضروب ههههه .. بس الافضل اروح له غرفة المدرسين ع الاقل لو ظربني هناك ماراح يضربني وايد لأن المدرسين اللي بالغرفه راح يتدخلوا ويهدوّه اما بالصف بيتولاني ومحد بيقدر يقول له شي ..
بعدما رن الجرس وانتهت حصته وراح غرفة المدرسين رحت عنده ووقفت قدامه بكل هدوء ..
الاستاذ : خلصت صلاتك ياحاج؟
انا بكل براءه : ايوا استاذ والحمد لله ..
الاستاذ : الحمد لله .. إلا قول لي ياواد هو انته صلاتك والتهجد بتاعك مايجيش يعني الا بحصصي انا ...!
انا بكل براءه : شو يعني استاذ ؟ مافهمت قصدك
الاستاذ : والنبي ..! هو انت حتعملهم علي ياواد وعايز تأكلّني الاوانطه ولا ايه ..! كان غيرك اشطر يابابا ..
انا : استاذ انا كنت اصلي وانت شفتني بنفسك .. يعني ماهربت من المدرسه ..
الاستاذ : واللهّي ..!؟ طب آسفين ياسيدنا الشيخ اصلي افتكرتك بالغلط هربت ..!
انا : لا استاذ كله ولا الهروب من المدرسه ..
الاستاذ وصبره خلاص نفذ وعصبيته طلعت : شوف يااد متحاولش تعمل الشويتين دول بتوعك عليّ انت فاهم ؟ قسما عظما ان ماشفتكش من بكره حاضر بحصصي سواء الرابعه او الاخيره حوريك نجوم الليل فعز الظهر .. قال بصلي قال ..! علينا برضه الكلام ده ..! فاهم ياد ولا افهمك اكتر بالعصايه اللي شايفها قدامي دي ..؟
انا : فاهم استاذ حاضر ولايهمك ..
رجعت الصف وعاد الطلاب ينتظروني على احر من الجمر هههههه يبوا يعرفون شو كانت نهاية هاللقاء التاريخي بيني وبين مدرس الرياضيات ههههه ..
خبرتهم باللي صار كله وكلهم قالوا .. بصراحه معه حق .. انت عاد وايد مصختها حشى صلاتك ماتصير الا بحصصه هو بس ..! تستاهل اللي جاك ..
انا : استاهل هاا استاهل .. ماعليكم بسيطه ..
الشباب : ايوا تستاهل .. اشمعنى احنا كل يوم الضرب فينا يعني ؟
انا : كله منكم الله ياخذ ابليسكم حسدتوني على الراحه .. الحين عاد شو اللي بيفكّني منه .. ارتحتوا الحين ؟
الشباب : ايوا ارتحنا ههههه ..
من يومها واضبت على حضور حصصه وطبعا ماله داعي اوضح اثار هذاك الحضور على إيدي هههههه ..
الغريبه اني لما نجحت وانتقلت للصف للسادس اصبحت اشطر طالب بالصف بمادة الرياضيات تحديدا ولحد هاللحظه ما اعرف السبب والله بكل امانه هههههه ربما لأن المدرس تغير بواحد غيره مع انه نفس الشي مثله مصري ..! سبحان الله ..
انتهى ..
طابت لياليكم ...

بقلمي /
اخوكم / رايق البال

[اسطورة لن تتكرر]

يسعد صباحكم / مساكم
هلا بالجميع ...

للمره الاولى اتطرق للكتابه الروائيه ولإتجاه آخر ايضا حيث يغلب على القصص التي اكتبها الطابع الكوميدي دائما بينما في روايتي هذه اتجه بعض الشيئ للغموض والرعب وهي احداث حقيقيه حصلت بالفعل ..
بطل قصتنا شاب يعيش في بيت فخم سواء من ناحية اثاثه او حجمه وموقعه وفي منطقه هادئه للغايه حيث يقيم معه بعض افراد اسرته ..
ورغم اتساع البيت بالغرف العديده الا ان من يقطنه عائله صغيره لا تتجاوز
5 افراد ..
جدول يومه عادي للغايه ووقته موزع مابين عمله صباحا واللقاء بأصحابه ليلا والسهر معهم ..
ايام حياته تمضي بشكل روتيني تقريبا حيث بعد انتهاء دوام عمله يهرع للبيت وبعد تناوله الغداء ينام وبعدما يصحو يخرج للقاء اصحابه ..
هكذا كانت تمضي حياته ..
الا انه حدث شي ما في حياته وبشكل مفاجئ ذات ليله ...!
شيئ سمع عن بعض احداث حصلت بسببه للبعض وقرأ عنها ولكن لم يعش تلك الاحداث على ارض الواقع بل لم يتوقعها تحدث معه ..!
لذا كانت هناك تساؤلات عديده في نفسه بعدما عاش بعض تلك الاحداث التي كان يسمع عنها ولكن لم يعرف الاجابه عنها حتى الآن ..
في احدى الليالي وبعد قضاءه سهرته مع اصحابه كالعاده عاد وكانت الساعه تقارب 12 من منتصف الليل ..
اوقف سيارته واطفأ محركها ونزل وفتح الباب الخارجي للبيت الذي يقطن فيه مع تلك العائله ودلف وبينما هو يمد خطواته للمدخل الرئيسي رأى ضيفا غير عادي ينتظره على درجات الباب المؤدي للصاله ......!

يتبع ( 2 )
بقلمي ..
اخوكم / رايق البال

[اسطورة لن تتكرر]

د صباحكم / مساكم
هلا بالجميع ..

من جديد نلتقي وقصه من قلمي قد تكون مختلفه هذه المره لكونها بعيده عن الجانب الكوميدي كما تعودت ...

اعتذر من الجميع بالبدايه لكون احداثها مؤلمه جدا ومؤثره للغايه
..
في منطقه ما كان يعيش اخوان اثنين غير اشقاء كل واحد فيهم تقريبا عمره 70 وربما اكثر وتوفوا قبل 7 او 6 سنوات ..
يعيشوا هالاخوين مع بعض في مزرعه قريبه من الملعب اللي كنا نلعب فيه كوره وكنت وانا رايح الملعب العب كوره مع الشباب امر بجانب مزرعتهم لانه هو الطريق الوحيد وربما القريب للملعب ..
واحد منهم كان منظره وتصرفه مرعب بكل ماتحمله هالكلمه من معنى سواء من الناحيه الشكليه او السلوكيه وكان لما يشوفني يتكلم بكلام غير مفهوم ويهذي والثاني وضعه شوي افضل ..
كنت وانا امر اسلم عليهم وانا اركض عشان الحق الشباب قبل لا يبدوا اللعب ..
وكان اللي شكله ووضعه افضل من اخوه يرد السلام ويسالني ..
الرجل : كيف حالك ولدي .. وكيف صحة ابوك وامك؟
انا : الحمد لله عمي كلهم بخير ..
الرجل : تعال تقهوى معنا
انا : مشكور عمي مستعجل الشباب ينتظروني ..
كان هذا الحوار الروتيني الدايم يجمعني به وبصراحه لعدة مرات كان ودي البّي دعوته بس اخاف لان منظر اخوه وتصرفاته غير طبيعيه ..
ولأن عقدة الخوف منهم وصلت حدها عندي ..
سألت والدتي ( رحمها الله ورحم والدي ) في يوم ما عن سر ذلك الرجل وخبرتها بكل شي احسه لما اطالعه وكيف ان نظراته وتصرفاته مرعبه ..
تنهدت والدتي ( رحمها الله) وقالت لي ..
- لهالرجل قصه ياولدي ..
انا وبكل لهفه : ايش هي قصته ؟
والدتي : هذا الرجل في شبابه كان كثير عاق لوالديه وخاصه امه الله يرحمها ويعاملهم بشكل سيئ جدا ..
انا : كيف يعني .. مافهمت ؟
والدتي : ياولدي هذا الرجل من ضمن اللي سواه بأمه انه بعد وفاتها (وكانت وفاتها في عز الشتاء وفي ليله قارسة البروده ) واثناء قيام الحريم بعملية التغسيل لها نادنه وقالت له وحده منهن قدام الكل ..
كلنا نعرف اللي سويته في امك وابوك في حياتهم من عقوق وتقصير بس ع الاقل الحين احسن ولو مره في امك وهي ميته دام ماسويت هالشي وهي حيه ..
رد عليها بكل برود : ايش اسوي يعني؟
الحريم : الماي على وشك يخلص .. روح الفلج هات لنا شوية ماي عشان نخلص تغسيلها والرجال يشلوها للمقبره ..
وكملت والدتي وهي تحبس دموعها ..
- تدري ايش رد عليهن؟
انا : لا .. بس اكيد راح يركض يجيب ماي
والدتي : لا ياولدي .. رد عليهن بكل برود وقسوة قلب (
ايش رأيكن بعد اسخن الماي عن تبرد وانتن تغسلنها خاصه اليوم برد وايد
) ..
كانت الاجابه صادمه .. مذهله .. مؤلمه للجميع ..
لما شافن الحريم هذا رده سكتن عنه وراحن مجموعه منهن وجابن ماي وانتهت عملية التغسيل وبعد ذلك دفنها بالمقبره ..
بعد وفاتها بعدة ايام اصيب هذا الابن بإنتكاسه مفاجئه حيث اصيب بشلل شبه كامل ولوثه عقليه واصبح كالاطفال في تصرفاته وكالمجانين يهذي بكلام غير مفهوم ولولا وجود اخوه معه مات من الجوع والعطش لان محد عنده يسال عليه ويتكفل به ..
بسم الله الرحمن ((
وَقَضَىٰ رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَانًا إِمَّا يَبْلُغَنَّ عِندَكَ الْكِبَرَ أَحَدُهُمَا أَوْ كِلَاهُمَا فَلَا تَقُل لَّهُمَا أُفٍّ وَلَا تَنْهَرْهُمَا وَقُل لَّهُمَا قَوْلًا كَرِيمًا (23) وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُل رَّبِّ ارْحَمْهُمَا كَمَا رَبَّيَانِي صَغِيرًا (http://quran.ksu.edu.sa/tafseer/tabary/sura17-aya24.html)
(24 (http://quran.ksu.edu.sa/tafseer/tabary/sura17-aya24.html)
)) ..


صدق الله العظيم ..
انتهى .. بقلمي
اخوكم / رايق البال

[اسطورة لن تتكرر]

يسعد مساكم / صباحكم
هلا بالجميع ..
عوده جديده لقلمي وقصه واقعيه حصلت زمان ..

كان احد الاشخاص يعمل في احدى الجهات العسكريه زمان بوظيفة جندي مثل كثير من الشباب العماني ..
هالشخص كان وايد يتغيب عن عمله وملفه كله محاضر تحقيق وخصميات من الراتب وفوق هذا كان - الله يهديه - خمار زمار ( الله يعزكم ) ولا صلاه ولا عباده ههههه ..
الكل كان عارف اخلاقياته واسلوبه وياما نصحوه ولكن لا حياة لمن تنادي ..
لحد يوم من الايام فجأه هالجندي راح لمكتب الضابط المسؤول عنه وقدم طلب اجازة حج ..!
الضابط لما شاف طلبه انصدم لانه عارف اخلاقياته وحياته كيف عايش والشباب ربعه بعد انصدموا وكل واحد فيهم يردد .. معقوله فلان يروح الحج ؟ هذا صلاه مايصليها اشلون يحج عاد ههههه بس بالاخير الضابط وافق رغم انه مو مقتنع داخليا بس قال سبحان الله يمكن الله هداه وناوي يتوب ..
عطوه اجازه حج وطلع اجازته وهو فرحان ..
مرت الايام وانتهت اجازة الحج وداوم هالمره بدون تأخير ..
لما داوم كان حالق شعر راسه ع الاخر ومربي لحيه ومسباح ف ايده وكل شوي يهلل ويكبر ويستغفر ..
اعطى لكل واحد من ربعه مسباح ومصحف ومن ضمنهم الضابط المسؤول عنه ..
بعد اننهاء الدوام نام مع ربعه بالسكن كالعاده والكل منصدم ويهز راسه ويقول معقوله فلان تغير لهالدرجه . ! سبحان الله ..
ناموا ولما قرب اذان الفجر انتظروا ربعه صاحبهم الحاج يقوم ويصلي بهم بس الحاج ولا على باله وشخيره من مسافة كيلو ينسمع ههههههه وربعه يصحوه .. اووه الحاج قوم صلي بنا او على الاقل صلي والحاج ابد ولا على باله وفسابع نومه ..
ربعه قالوا يمكن تعبان من السفر بنخليه اليوم يرتاح واكيد بكره من يسترد نشاطه الوضع راح يكون غير ..
اليوم الثاني تكرر نفس الشي الحاج الصلاه مايمر صوبها ابد هههههه ربعه خلوه وماهان عليهم يخبروا الضابط عنه ..
مرت الايام لحد ليله من الليالي كان هذاك الضابط سهران في البار ( والعياذ بالله ) الا شوي ويشوف صاحبنا داخل وطلب شراب ..
الضابط انصدم بس سكت وخلى نفسه كأنه ماشايفنه ..
صاحبنا شرب وارتاح ورجع السكن ونام ولا كأنه صاير شي ..
اليوم الثاني الضابط طلبه بمكتبه واول ماوصل سأله ..
الضابط : هلا فلان .. كيفك؟
صاحبنا : الحمد لله سيدي بالف خير
الضابط : الحمد لله .. ماشاء الله وايد تغيرت تصدق من رحت الحج . ! صلاه وعباده وهدوء الله يزيدك من فضله ..
صاحبنا : الحمد لله سيدي .. الواحد ترا لازم شوي يحاسب عمره ويعقل والطيش مب دايم عاد الواحد يستمر فيه ..
الضابط : عندك حق والله .. ماشاء الله عليك يافلان حكم تقول نعم حكم .. امس الساعه 9 بالليل وين كنت ؟
صاحبنا وهو مرتبك : انا ..!؟ بالسكن اسولف مع الشباب .. لالا طلعت اتمشى شوي .. لا تذكرت صح كنت نايم بعدما صليت العشا ..
الضابط : ماشاء الله الف اجابه اشوفك قلت ..! .. عيل من اللي بالبار كان الساعه 9 ؟
هنا صاحبنا اصفر لونه وتلعثم ودار راسه وماعرف يرد ..
الضابط وبكل حزم : روح جيب لي جواز سفرك الحين ؟
صاحبنا : الحين ؟ ليش سيدي ؟
الضابط وهو معصب : ايوا الحين وبدون ماتناقشني بعد .. رايح الحج هاا رايح الحج ..!
راح صاحبنا وجاب جوازه واعطاه الضابط ..
مسك الضابط الجواز وقام يقلب اوراقه الا ويشوف الختم عليه من تاريخ بدء اجازة هالجندي ( مسقط / تايلند / مسقط ) هههههههه ..
خلى الجواز على مكتبه ونظر لصاحبنا وصرخ فيه وهو معصب وقال : تايلند هاا..! تايلند..!؟ اشوف الكعبه هناك صارت .. ! تقص علينا ونصدقك على بالنا الله هداك وبالاخير يتضح انك رايح تايلند يامفتري ..! سجن شهرين وانهاء خدمه ..
صاحبنا : والله سيدي سامحني الشيطان ضحك علي واوعدك ما اكررها ..
الضابط : الشيطان قص عليك هاا ؟ خليه ينفعك الحين ..
وظل يحاول صاحبنا مع الضابط بس الضابط طنشته وبالفعل تم سجنه شهرين وانهيت خدماته ..
انتهى ..
بقلمي ..
اخوكم / رايق البال

[اسطورة لن تتكرر]

هلا بالجميع ..

عوده اخرى لقلمي وقصه من النوع الكوميدي كما تعودت حيث لا اميل للقصص ذات الطابع التراجيدي ربما لكونها لاتتناسب مع شخصيتي ..
ادري معظمكم دش عشان يعرف من سوسو ههههه وتعمدت اكتب هالعنوان عشان الكل يدش ^^ ..

طبعا القصه واقعيه بس غيرت فالاسم المستعار ..


قبل اسبوعين تقريبا وانا اتجهز بعد المغرب عشان اروح مع الشباب للمقهى اللي تعودنا نجلس فيه ..
جاني اتصال من واحد من الشباب اللي للاسف من شهور ماشفته ..
صاحبي : هلا يسعد مساك .. وينك يالقاطع ؟
انا : موجود والله وادري مقصر فيك وفي كثير ناس بعد
صاحبي : لاحشاك والله عن القصور بس ترا مشاغل والله والدنيا تلاهي صارت ..
انا : بالفعل كلامك صحيح ..
عيني ياعيني على الناس المشغوله ههههه ماتنلام ترا صرت تاجر انست الحين ومحد يقدر يحصلك يالحمارههههه
صاحبي : اي تاجر ولد الحلال خليها على الله بس هههه بس زين فتحت هالموضوع ..
شو رأيك نتعشى مع بعض؟
انا : تمام ولايهمك بس بتصل قبلها بالشباب اعتذر منهم
صاحبي : تم عيل خلاص انتظرك بمطعم ..... الساعه 9
انا : تمام ولايهمك اعتمد
انتهت مكالمتي معه واتصلت بالشباب اعتذر منهم ..
في الوقت المحدد رحت المطعم وحصلت صاحبي سابقني واول ماوصلت ناداني ورحت وجلست معه ..
بعد السلام والدردشه الخفيفه طلبنا عشا واحنا ننتظر العشا لين يوصل ..
سألته : شخبارك مع تجارة الانست ؟
هو : انت مانسيت بعدك ههههه انت عارف اني دشيت بإسم ولد بس اللي صار ماحصلت حد يشتري يادوب كم واحد بس ويسألوني عن البضاعه والسعر وبعدين مايتواصلوا معي مره ثانيه للاسف ..!
انا : اها .. وبعدين ؟
هو : وبعدين الله يسلمك التقيت بواحد من الربع وسولفنا في امور كثيره ومن ضمنها خبرته عن مشروعي وضحك لما قلتله سجلت بمعرف ولد وقال لي انت مافيك عقل اصلا ..
سجل بمعرف بنت افضل وعطاني عدة نصايح اسويها وبالفعل سويت اللي طلبه مني ..
انا : والله ؟ وبعدين ؟
صاحبي : وبعدين الله يسلمك نجحت نجاح ولا اروع هههههه
انا : اوهووو .. لالا مو معقول كلامك هههه وضح لي ياخي ..
وصل العشا وقمنا نتعشى ونكمل سوالفنا ..
صاحبي : الله يسلمك سجلت من جديد بإسم بنت واخترت اسم سوسو وحطيت صوره بنت نسختها من النت عشان تكون اللعبه صح ههههه
انا : الله ياخذ ابليسك على هالفكره الجهنميه هههه كمل وبعدين شو صار؟
صاحبي : قول شو اللي ماصار اصلا ههههه شو عدد المتواصلين وخاصه من الشباب شي ماراح تصدقه ولايخطر على بالك ههههه تصدق عددهم تجاوز ال 300 وانا اول 5 مو لاقي هههه ..
انا : ادري فيهم والله يبوا سبب نعم الله ياخذ ابليسهم بس هههه كمل ..
صاحبي : اول شي سويته طلعت رقم جديد وحطيت رقمي ونفذت كل تعليمات صاحبي اللي نصحني بها ومن ضمنها الغاء المكالمات والمسجات النصيه وخليت الواتس بس شغال ..
انا : ليش تلغي المكالمات .. غريبه ياخي ..!؟
هو : لا غريبه ولاشي بس نفترض احد منهم اتصل وخاصه الشباب وسمع صوتي اللي كنه صوت بعير شو ساعتها راح اسوي؟ ههههه
انا : اها .. صح والله معك حق فاتتني هذي اما انك ذيب نعم ههههه كمل شوقتني شو صار بعدين معاك ؟
صاحبي : الله يسلمك اللي صار كلما صحيت الصبح اشوف ولا 200 رساله على الواتس وتحديدا من الشباب ..
اللي كاتب صباح الحب واللي كاتب صباح الشوق واللي كاتب صباح السعاده سوسو واللي كاتب لك وحشه الغلا واللي كاتب فديتك سوسو .. الخ وانا اقرأ وميت من الضحك عليهم والله هههه .. وقام يوريني مسجاتهم ..
اللي راسل قلب واللي راسل ورده واللي راسل صورته وتحتها بشوي انا اسف سوسو بالغلط رسلت صورتي ههههه بالغلط ها بالغلط ..! علينا هالسوالف ههههه لا والبعض يدلعوه يقولوا له هلا وغلا السووس ههههه ..
قلت له ودموع عيني تنزل من كثر الضحك : الله ياخذ ابليسك مت من الضحك والله حتى ماقدرا اكل زين هههههه وبعدين ؟ كمل لاه ..
صاحبي : قمت اتعامل مع الجنسين بس بالواتس ولما يطلبوا شي اقولهم لو قدرت اطلع بجي بنفسي ولو ماقدرت برسل اخوي ..
عاد الشباب يتضايقوا لما اقول برسل اخوي ههههه بس احاول اهديهم عشان ما اخسرهم لاه ههههه ...
الغريبه البعض منهم ورغم اني اقول لهم برسل لك الاغراض على العنوان اللي رسلتوه خاصه اللي ولاياتهم بعيده عن مسقط يرفضوا ويقولوا لا بروحنا بنجي اصلا معنا اشغال بمسقط ههههه وانا عارف انه لا اشغال معهم ولاشي بس ترا السالفه فيها بنت لازم بيتعنوا وبيمسكوا خط عادي معهم ههههه ..
انا : انت تقول لي ..!؟ هههههه طبعا بيجوا بس لو قايلهم واحد من الربع تعالوا بيطلعوا مية عذر عشان مايجوا معه اعرفهم ههههه ..
صاحبي : شفت كيف هههه تصدق البعض منهم والله العظيم عرض علي يدعمني بفلوس عشان اكبر تجارتي واوسعها والبعض عرض يرسل رصيد بس كلهم والله رفضت اخذ منهم شي ..
صحيح انا لعبتها بهالشكل بس مش ممكن تسمح لي اخلاقياتي اخذ فلوس منهم لأن اللي يهمني بس ابيع اللي اتاجر به مو عشان اتعرف بفلان او فلانه ..
تصدق اني حظرت اكثر من 240 رقم لأن البعض منهم قام يقل ادبه علي للاسف يمكن عشان على بالهم انا بنت وكل واحد فيهم يبي يسولف معها ..
انا : ياربي .. بصراحه شي مذهل اللي قلته وعمري ماتوقعته ..
طيب هذا صاحبي وانا واثق من اخلاقياته وتربيته بس ياترى كم سوسو بكل مواقع التواصل الاجتماعي وراها شاب ..!؟
انتهت قصة صاحبي وانتهى العشا معه واعترف اني انصدمت باللي عرفته عن هالعالم المجهول كليا بالنسبه لي ..
طابت مساءاتكم ..

انتهى ... بقلمي
اخوكم / رايق البال

[اسطورة لن تتكرر]

هلا بالجميع ...
نلتقي مرة اخرى وقصه يغلب عليها طابع الفانتازيا كما يطلق على مثل هذه النوعيه من القصص ربما ..
القصه عباره عن حلم لأحدهم زار مخيلته ذات ليله ..
قبل يومين مر هذا الحلم به وهو نايم حيث حلم بأن هناك مشروع كبير سوف يتم اقامته عن قريب ..
هالمشروع راح يمر على عدة بيوت واماكن لأخوه واخوات يعرفهم ..
ولأنه تم تعيينه مدير لهالمشروع قال في نفسه ليش ما اجمع كل الاخوه والاخوات اللي اعرفهم واعطيهم بعض النصايح عشان تكون استفادتهم اكثر من هالخير اللي جاي بسبب هالمشروع ..
قام ورسل لكل الاخوه والاخوات اللي يعرفهم رسايل بأنه راح يجتمع معهم للأهميه وحدد لكل فريق يوم معين بحيث يكون الاحد الساعه 9 صباحا مع فريق الشباب اللي يعرفهم ولمدة ساعه ويوم الاثنين الساعه 9 صباحا مع فريق الاخوات اللي يعرفهن ولمدة ساعتين لأنه عارف استحاله يقدر يخلص لو كانت المده ساعه وزين بعد تكفيهن ساعتين من لعيانهن هههههه ..
مكان الاجتماع عباره عن مسرح صغير يتوسطه كرسي وطبعا قدام المسرح كراسي وطاولات عشان يجلسوا عليها الاشخاص ..

( الاسماء اللي سيتم ذكرها ليست حقيقيه وانما مستعاره )

الاحد ( الساعه 9 صباحا )
وصل للموقع على 8 ونص تقريبا ..
شوي وبدوا الشباب يوصلوا واكتمل العدد على 9 وربع ..
هو : هلا شباب .. شخباركم ؟
الجميع : الحمد لله وانت كيفك يالذيب ؟
هو : الحمد لله ههههه .. جمعتكم اليوم عشان اخبركم بأنه فيه مشروع كبير راح يمر على بيوتكم وقلت فنفسي دام اني مدير المشروع راح انصحكم شوو تسووا عشان تكون استفادتكم اكثر ..
الجميع : تسلم والله ماقصرت
احمد : بصراحه فعلت خير .. نعم اني مفلس وادور البيسه دواره هههههه
عبد الكريم : عيل جتك الهبششه احمدووه هههههه
صلاح : يالله اني نعم ودي اسافر اغير جوو ياخي وزين بتجي هالهبشه عشان نكشح مع الشباب شوي نسافر صوب ذيك الديار ..
سالم : نعم انها جت بوقتها شباب ههههه الشيمه بسرعه ابدأ اجتماعك ورانا اشغال يالحبيب ..
هو : الموضوع عباره عن ...... عشان كذي لازم تسووا ..... عشان تكون الفائده اكثر من هالخير اللي جاي عندكم هههههه
الجميع : تم ولايهمك اعتمد
انتهى الاجتماع بعد نص ساعه تقريبا وقبل نهاية الموعد المحدد بربع ساعه ..

الاثنين ( 9 صباحا )
وصل للموقع على 8 ونص ..
الساعه 9:15 وصلن هنادي وريم وابتسام
الساعه 9:30 وصلت ندى
الساعه 9:37 وصلن اسراء وشجن وعبير
الساعه 9:45 وصلت منال
الساعه 10 وصلت رحاب
اكتمل العدد على الساعه 10 ونص ..
رحب فيهن وقال : هلا بالاخوات .. كيفكن ؟
هنادي : الحمد لله وانت كيفك؟ الشيمه خلص اجتماعك بسرعه نبا نروح للخياط نفصل للعيد وورانا بعد طبخ وتنظيف بيت واشغال وايد ..
رحاب : صح والله .. زين ذكرتيني بالخياط هنووّده كانت ناسيه والله ..
هنادي : واجبنا حبيبتي فديتك انا هههه صح منووله خلاص جهزتي ملابس العيد ؟
منال : لا جهزت ولاشي تعبت من كثر ما ألفّ على هالخياطين ولا واحد فيهم وافق اونه ماما كلاس واجييييد زهمه كله حرمه يجيب ملابس منشان انا ..
رحاب : مافيهم خير اعرفهم .. بفلوسنا بعد ويذلونا
هنادي : صدقتي والله حبي نعم بفلوسنا ويذلونا بعدهم ..
هو بكل هدوء وسعة بال : خلصتن لعيانكن عشان ابدأ ولا لأ ؟
عبير : حشى بياكلنا اكل نعم هفففف مامدانا نتكلم كلمتين ..!
اسراء : صح والله مامدانا نتكلم كلمتين .. وانته شو كاظنك ها ؟ خليك ريلكس الدنيا ترا ماطايره ..
شجن : ولاسياره بعد ولا سفينه هههههه حلووه صح بنات ؟
الجميع : حلوووه موووت شجووونه هههههه خلاص بنسكت ابدأ عن تقول بعد احنا سبب تأخيرك ..
هو : انا شو اللي وهجني بس فيكن واطلبكن للإجتماع ههههه المهم الموضوع عباره عن مشروع كبير راح يمر بيوت كل اللي طلبتهم وطلبتهن لهالاجتماع ..
ولأني مدير هالمشروع وعارف خوافيه قلت فنفسي اخبركم شوو تسووا بالضبط عشان تستفيدوا بشكل اكبر من هالخير اللي جاي لكم على الاقل تذكروني بالخير هههههه..
سعاد : تسلم والله ماقصرت جزاك الله خير
ندى : يبالك بعد ماتخبرنا رغم كل هالعشره اللي بينا هذا اللي ناقص بعد ..! اصلا غصبا عليك تخبرنا
ريم : نعم انه غصبا عليك مو بكيفك ههههه ولا تبانا يعني نعصب عليك ونحرمك من الميراث يبو كشه ؟
هدى : اقولكن بنات كيف صالون ..... معاملته ؟ ياخي الصالون اللي اتعامل معه وايد رفع اسعاره الحين كنه من زين شغلهم عاد ..!
جمانه : على طاري الصالون بنات بعلمكن حركه ههههه كنت لما اروح انقش حنا بالصالون وايد اجلس انتظر دوري رغم اني احيان اوصل من وقت والاحظ بنات يوصلن بعدي ويتقدمن ولما حد من البنات يحتج تقولهن راعية الصالون هذي اونه حاجزه من امس ..!
ندى : صح وايد نشوف هالحركه .. وبعدين ؟ كملي حبي
جمانه : مره وانا احاسبها زدتها ريالين وقلت لها هالمبلغ هديه مني وياربي كيف فرحت ههههه عاد الحين تقابلني بذيك الابتسامه الحلوه لما اروح بأي وقت وتخليني قبل اللي واصلات قبلي ولما حد فيهن يحتج تقولهن هذي حاجزه من امس ..! شفتن كيف الحركه هههههه
الجميع : واااي منها التوووبه ياربي نعم .. مشكوره حبي فعلتي خير بصراحه لما خبرتينا عن هالحركه الختيييره والفززييعه بعد هههههه ..
هو : حرام عليكن عاد اعطني فرصه شوي اتكلم واشرح عن الموضوع ..
ابتسام : وانته ليش ساكت ومن ماسكنك اصلا عن تتكلم ..!؟ ياربي نعم منك حشى شوي شوي علينا مب كذي ؟ خلاص بنسكت هات ماعندك يافتى من نيووز قصدي اخبار هههههه
هدى : والحين بالله عليك هذولا مالقوا غيرك انته يالمينون تمسك هالمشروع الكبير هههههه
شجن : صح والله مالقوا غيرك انت يعني هههههه
هو : الله ياخذ ابليسكن بس ههههه الموضوع يا اخوات عباره عن .......... ولازم تسووا كذا وكذا عشان تكون استفادتن اكثر .. فهمتن ؟
منال : واااي بنات جانا الخير وهذي زغرودة فرح كللللوووووششششش كلوووشششششش كللللوووششششششش ..
هدى : نعم انه جانا الخير الحمد لله كللللوووشششش ههههه ذيك اليوم كنت ماره السوق وشفت عقد يالله كيف طاحت عيني فيه للحين اشوفه قدامي والله وكلما تذكرته احس قلبي يعورني ..
منال : موتك الذهب انتي نعرفك ترا هههههه
هدى : عينك ام العصاقيل
ابتسام : شوف من الحين اقولك .. انا ارضي اباها من فوق واااايد واسعه ومن الوسط ضيقه شوي ومن تحت عريضه واااايد ..
هو : هذا فستان ولا دراعه ابتسام هههههه
ابتسام : عينك .. ينكت بعده ههههه
عبير : وانا ارضي اباها تطل على الوادي واااااي المنظر راح يكون رهيييب وخوووراافي لما الوادي ينزل ..
نجوى : ياااه نفسي اسافر فرنسا بنات
هو : ان شاء الله الخير راح يعم الكل
سعاد : بنات خلاص دام فهمنا كل شي بنروح ورانا اشغال وعاد الساعه 12 ونص وبعدنا ماطبخنا ..
رحاب : ماتنلامي ترا ريلك عصبي نعرفه ههههه
سعاد : عصبي عينك ام عقصين
عبير : فديت ريلي انا اللي بس لو اقوله تعبانه على طول يقول لي لاتطبخي بجيب اكل من المطعم لي ولك ..
ابتسام : عيل يارب يتزوج عليك عشان تحسي يالدبه
عبير : فال الله ولا فالك ابتسامووووه ههههه
سعاد : اعذرنا ولد الحلال وايد ازعجناك وايد بس تدري بنات لاه ههههه وبكل امانه ماقصرت باللي خبرتنا به وجزاك الله الف خير ..
الجميع : صح والله اعذرنا وايد ربشنا وازعجناك ههههه بس انت عزيز وغالي والله واحنا بعد معك نفس الشي ولا ماكنت طلبتنا وفهمتنا شوو نسوي عشان نستفيد من هالمشروع الهام ..
انتهى الاجتماع على الساعه 1 ونص بعدما شكره الجميع واعتذرن منه على الربشه اللي سونها بالاجتماع ...
( انتهى )
بقلمي ...
اخوكم / رايق البال

[اسطورة لن تتكرر]

هلا بالجميع ..

قصه واقعيه في مدينتي تعود لأكثر من 100 عام ..
كان والدي ووالدتي - رحمهما الله - يقصان لي الكثير من القصص وانا طفل صغير وتحديدا والدتي لكون والدي كثير السفر ..
تلك القصص يقصها عليهما بدورهم اباؤهم وامهاتهم فهي متوارثه اب عن جد ..
من ضمن تلك القصص ما سأقصه الآن ..
منذ اكثر من 100 عام لم تكن مدينتي كما هي الآن وهذا الامر ينطبق على كل مدن السلطنه بل ومدن العالم اجمع سواء العربي او الغربي ..
كان في مدينتي تاجر هندي من الطائفه الهندوسيه ويطلق عليه لقب ( بانيان ) وهو لقب يطلق على الهنود الذين يدينون بهذه الديانه ..
ويعود تواجد البانيان بالسلطنه لما يقارب 150 او 200 عام والذين من ضمنهن الآن عائلة كيمجي رمداس ودرامسي نانسي ..
وكما هو معروف ان تواجد عائلة البانيان بالسلطنه كان ابان حكم السيد تركي بن سعيد رحمه الله وهم اكثر طوائف الهندوس نجاحا في التجاره ويقال بأن الامام ناصر بن مرشد استعان بأحدهم عند الهجوم على البرتغال بقلعة مطرح وكان البانيان كتجار يتواجدون في مطرح وبعض ولايات السلطنه وخاصة البحريه مثل الباطنه وصور ..
نعود لقصتنا من جديد ..
ذلك البانيان محبوبا عند كل اهالي مدينتي حيث كان يراعيهم في الاسعار ويثق فيهم ويصبر عليهم اذا نقص عليهم مبلغ ما اثناء عملية الشراء منه ..
كان يعمل لديه ابنه واخيه بذلك المحل الذي يملكه حيث يبيع فيه الاقمشه الرجاليه والنسائيه من حرير وصوف وقطن كما انه ايضا يبيع المواد الغذائيه من ارز ودقيق وسكر ... الخ ..
الجميع يقصد محله سواء سكان مدينتي او المدن الأخرى التابعه لها نظرا لتواجد كل شيئ تقريبا في محله خاصة ان تلك الايام المتطلبات كانت بسيطه وليس كما هي الآن اضافة الى حسن تعامله المعروف عنه بشهادة الجميع ..
في يوم ما جاءه رجل من مدينة اخرى وهي المره الاولى التي يدخل فيها المحل ..
اشترى بعض البضائع التي يحتاج لها وكانت العمله في تلك الايام القروش الفضيه وليس كما هو الآن ..
بعدما اكمل شراء مايحتاجه همّ بدفع الحساب إلا ان المبلغ المطلوب كان اكبر مما يتوفر لديه في تلك اللحظه ..
ارتبك الرجل واحتار فليس بالمدينه احد يعرفه ليضمنه عند صاحب المحل اضافة الى انه من الصعب ان يعود لبلده دون شراء كل مايحتاج له كما ان بلده تبعد اكثر من 70 كيلو وتلك الايام لم يكن هناك مواصلات سوى الجمال والحمير ( اعزكم الله ) وهي رحله جدا شاقه عليه ومتعبه ..
وهو في لجّ تفكيره قطع عليه البانيان حبل تفكيره وقال له : ادرك تماما مايدور بعقلك من تساؤلات كما انني اعرف صعوبة الوضع والموقف .. ولكن لدي حل مناسب لك ولي ايضا ..
رد الرجل بكل فرح والبشر يملأ اساريره : ماهو الحل ؟ فأنا على استعداد لكل ماتريد لأن المهم عندي ان اعود لبلدي بكل ماقمت بشراؤه منك ..
رد عليه البانيان بكل هدوء :
اعطني شعرة من لحيتك كضمان لعودتك

وسوف اضعها في علبة واكتب في ورقه صغيره اسمك بالكامل وكم الدين الذي عليك والمده التي تريدها للوفاء بدينك ..
كان ابن واخ البانيان يستمعان لذلك الحديث العجيب وهما فاغرا الدهشه مما يسمعان ..
نظر الرجل للبانيان وقال بهدوء : ان ماتطلبه عظيما وكبيرا وليس من السهل الموافقة عليه ولكني سأعطيك شعرة واحده من لحيتي وسأعود بعد انقضاء 6 اشهر لدفع ماتبقى علي من دين لك واستلمها منك وإياك والتفريط بها ..
وافق التاجر وسلمه بضاعته كلها دونما نقصان وعندها نتف الرجل شعرة واحده من لحيته واعطاها له وهو متألم وحزين من هذا الموقف الصعب الذي اجبرته الظروف ان يكون تحت وطأته ..
فتح التاجر علبة صغيره ووضع الشعره داخلها ومعها ورقه صغيره تحمل اسم الرجل بالكامل وكم يبلغ دينه والمده المطلوبه لذلك ..
خرج الرجل محملاّ الاغراض التي يحتاجها وودعه التاجر على امل اللقاء به حسب الموعد المتفق عليه ..
مرت الايام والاشهر ولم يعد الرجل وكان ابن التاجر واخيه يقولان له .. الم ننهيك عن هذا ؟ كيف تثق بإنسان غريب ومقابل شعره تسلمه بضائع بهذه القيمه ؟ صدقنا لن يعود اليك مرة اخرى ..
التاجر يستمع لكلامهما ويرد عليهما بكل هدوء وهو مبتسم : صدقاني سيعود فأنتما تجهلان العمانيين واخلاقياتهم ..
بعد مرور عام كامل تقريبا وبينما كان التاجر وابنه واخيه منهمكين في عملهم بالبيع وتحضير للمشتريات ومراجعة الفواتير ..
فجأه سمعوا صوتا يقول بكل هدوء : السلام عليكم ورحمة الله وبركاته
التفتوا لمصدر الصوت وهالهم المنظر خاصة ابن التاجر واخيه ..
كان صاحب الصوت هو ذلك الرجل الذي اضطر لرهن شعرة واحدة من لحيته ..
ابتسم التاجر ورد عليه السلام والتفت لإبنه واخيه وقال لهما مبتسما وبكل ثقه وهدوء :
الم اقل لكما سيعود ..!

ثم رجع للرجل وسأله : اين كنت يارجل لقد تأخرت عن موعدنا كثيرا ؟
اجابه الرجل : اعتذر لذلك ولكني مررت بظروف صعبه ومنها وفاة والدي وزوجتي وظروف اخرى عائليه ولم استطع الحضور والآن وبعدما رتبت اوضاعي بالبلد عدت اليك لدفع الدين الذي علي واستلام الرهن الخاص بي منك ..
كان الموقف عظيما ومدهشا ومذهلا لإبن التاجر واخيه وكل من تواجد بذلك المحل في تلك اللحظه ..
اي رجل هذا الذي يتكبد عناء المسير ومشقة الطريق ويأتي للوفاء بدينه والذي هو عباره عن شعرة واحده من لحيته ..!
واي تاجر هذا الذي وثق فيه بكل هذه البساطه وكان الرهن في نظر الكثير غير منطقي بل ويعد ربما ضربا من الجنون ..!
وفي وسط رهبة ذلك الموقف وعظمته احضر التاجر العلبه وفتحها امامه وسلمه تلك الشعره فتناولها بكل شوق وتقدير وامتنان وفرح ودفع ماعليه وهو يشكره ويثني عليه وانصرف بكل هدوء امام ذهول كل من كان موجودا ..
تذكرت هذه القصه وانا اعبر الشارع المقابل لذلك المحل قبل فتره بسيطه وكان معي بالسياره اختي حيث قالت لي .. هذا محل البانيان التي كانت والدتنا - رحمها الله - تحدثك عنه ..
ورغم ان الآن بمدينتي محلات كبيره وضخمه كاللولو وكارفور وغيرهما الا ان ذلك المحل لازال كما هو بنفس موقعه وحجمه وهيكله القديم بوسط السوق ولازال له مرتاديه ومحبيه حتى الآن ..!
طبعا الموجودين حاليا بذلك المحل الصغير هم احفاد احفاد احفاد ذلك التاجر ..
رحم الله زمنا كان فيه الوفاء والثقه والحب يغمر القلوب الطيبه والصافيه بغض النظر عن ديانتها ..

زانت ايامكم ..

انتهى .. بقلمي
اخوكم / رايق البال

[اسطورة لن تتكرر]

بالجميع ..
من جديد نلتقي وقصه اخرى بقلمي اتمنى ان تنال اعجابكم ..

لما كنت بالاول الثانوي كان بالصف معنا واحد من الشباب كثير مهتم بالدراسه والمذاكره لدرجة لما تكون معنا حصه للرياضه هو الوحيد اللي مايرضى يروح يلعب معنا ويستغل الوقت بالمذاكره والتحضير للدرس القادم واحيان يطلب الغاء حصة الرياضه على اعتبار انها مهدره للوقت اما انا وبعض شلة الانس اللي معي ولا على بالنا سالفة المذاكره ههههه ..
صاحبنا هذا مثلما ذكرت جدّي كثير ونادر يبتسم ويشاركنا اما احنا ماشاء الله علينا عين العدو بارده علينا طبعا ههههه ..
بكل امانه كان اشطر طالب بالصف ودايم يناقش الاساتذه ودرجاته ممتازه مو مثلنا احنا يادوب نسبة النجاح بس وبالغصب بعد ..
كنت متزعّم بعض الشله اللي بالصف واللي طبعا مثلي لا مذاكره ولاشي وعاطين الدنيا طاف ..
مرت الايام والاشهر وبدت الامتحانات النهائيه ..
اختفى صاحبنا نهائيا عنا اثناء الاجازه وكان يسهر للفجر ومايطلع من البيت وكل كتبه حاطنها قدامه وكل شوي يراجع كتاب ..
اما انا وشلة الانس يادوب نقرا الكتاب دقايق والعصر بالملعب وبالليل ندور فيلم على قنوات ( ام بي سي ) نسهر عليه ههههه ..
كنا متوقعين نجاحه وبتفوق بعد وبنفس الوقت عارفين انفسنا استحاله نوصل لو لنصف درجاته ونسبة نجاحه ..
بدت الاختبارات واحنا مثلما كنا عليه وهو زاد وكثّف من المراجعه والسهر على الكتب ..
انتهت الاختبارات وطبعا الجميع متوقع النتايج وخاصه اللي تخص صاحبنا لأن الكل عارف الجهد اللي كان يبذله ..
بس اللي حصل كان صدمه للجميع ..
طلعت نتائج الاختبارات وكلنا نجحنا وان كان نجاحنا يعني مو ذاك الزود بس المهم نجحنا ههههه اما صاحبنا كان معه دور ثاني في مادتين ..!
انصدم واحنا معاه انصدمنا والله لأن من الصعب توقع هالشي له على ذيك المراجعه منه اللي كلنا نعرفها ..
حصل له انهيار عصبي وكان يردد كيف هذولا نجحوا وانا لا ؟ نفسي اعرف كيف هالشي صار..!؟
الحين انا الكل يعرف كيف كنت حارم نفسي من كثير اشياء ومركز تركيز على المذاكره وهذولا اللي عاطين الدنيا طاف ينجحوا وانا ارسب بمادتين ..!!؟
بكل صراحه معه حق لأن بالفعل شي لايمكن استيعابه ..
للأسف الشديد بالصف الثاني الثانوي افترقنا لأني رحت لمدرسه اخرى وان كان التواصل لازال ولله الحمد مع معظم من كنا ندرس معهم واحيان لما نلتقي به نجلس نقوله شفت كيف الدنيا احنا ننجح وانت تاخذ دور ثاني خليك مثلنا افضل صدقنا ههههه طبعا كان يعصب علينا لأنه جديته اللي اكثر من اللازم لازالت تفرض نفسها على شخصيته ..
انتهى ..
بقلمي ..
اخوكم / رايق البال

[اسطورة لن تتكرر]

هلا بالجميع ..
عوده اخرى لقلمي وقصه تبعد عن النهج الكوميدي الذي تعودته ..
قصه قد تبدو غريبه ومرعبه في نفس الوقت ولكنها واقعيه وحدثت منذ فتره طويله كما رواها لنا عمي رحمه الله ..
لدنيا مزرعه صعيره في احدى مناطق ولايتي وبهالمزرعه كان جدي رحمه الله قام ببناء مسجد صغير بها ليصلي فيه اصحاب المزارع القريبه من مزرعتنا وايضا بعض سكان الحاره الذين بيوتهم قريبه من المزرعه ..
بين مزرعتنا وبقية المزارع سكك تفصل بين كل مزرعه واخرى وهالسكك طبعا طويله اما من ناحية العرض تقريبا عرضها متر ونص او مترين بالكثير ..
لما تدخل المزرعه كان المسجد يكون مباشرة بعد الباب على ايدك اليمين وبالقرب منه ثور كبير الحجم يملكه جدي ومربوط بنخله قريبه من المسجد ..
عندما يأتي الناس للصلاه كان ذلك الثور يجلس كالعاده بكل هدوء إلا شخص واحد عندما يأتي للصلاه فجأه تعتري ذلك الثور حالة هيجان قويه ويبدأ بالرفس والنفخ ونطح النخله بكل قوته وينظر للرجل بشراسه وكأنه يرغب في ان يفك أسره بأقصى سرعه ليقضي عليه ..
ذلك الامر الغريب استرعى عناية الكل اذ أن جميع من يأتوا للصلاه ويدخلوا المسجد او يخرجوا منه بعد تأديتهم الصلاه يكون ذلك الثور في قمة هدوءه ماعدا ذلك الرجل عندما يأتي يحدث لذلك الثور ما اسلفت ذكره سواء جاء بمفرده او مع بعض الاشخاص ..
الوضع كان غريب جدا لهم ولم يعرفوا سببا منطقيا ذلك ..
ظل الوضع على هذا الحال لفتره طويله حتى أتى يوم وبينما ذلك الرجل يمشي في اتجاه المسجد ليصلي وعندما وصل منتصف السكه والثور طبعا كالعاده يشاهده فجأه قص الحبل المربوط به بالنخله وخرج مسرعا من باب المزرعه واصبحا وجها لوجه بالسكه وفي نفس اللحظه خرج المصلين من المسجد وشاهدوا ذلك الموقف المرعب والمخيف وكلا منهم لايعرف كيف يتصرف ..
الرجل وقف مواجها للثور بكل هدوء لأنه ايقن ليس لديه مجال للهروب او الرجوع للخلف بعدما اصبح في منتصف السكه ولا يمكنه القفز لجدار المزرعه الثانيه او مزرعتنا ..
الثور ينظر للرجل وهو امامه كفرصة ثمينه يبدو انه انتظرها طويلا ..
بعد ثواني من تبادل النظرات انطلق الثور بأقصى سرعته بإتجاه الرجل الذي كان صامدا في وقفته وينتظره بكل رباطة جأش وعندما اقترب منه لينطحه بكل قوته امسك الرجل في نفس اللحظه بكل قوته بقرني الثور وهو ينزلهما للأسفل بعنف مما جعل فم واسنان الثور يرتطمون بالارض بقوه وظل ممسكا بهما لفتره طويله ولم يفلت له حتى تأكد ان قوى الثورخارت نهائيا ..
الموقف كان مرعب وجدا مخيف وغريب في نفس الوقت ومن الصعب وصفه ..
بعدما ادرك الرجل ان الثور خارت قواه ولايستطيع النهوض تركه ودخل يصلي وخرج وكأنه لم يحدث شيئ ..
يقول عمي رحمه الله بعد تلك الحادثه كنا نشاهد ذلك الثور عندما يرى ذلك الرجل قادما للصلاه ينظر للأسفل ولايرفع بصره عليه ويجلس بكل هدوء وانكسار الى ان يخرج من المسجد..!
هل كان ذلك خوفا منه ام خجلا مما حصل له ؟ ام كان ذلك انكسار ام ماذا بالضبط ..!؟ بكل امانه وصدق لست ادري ..
طابت مساءاتكم ..

انتهى ..
بقلمي ..
اخوكم / رايق البال

[اسطورة لن تتكرر]

مساء الشوق والذكرى
هلا بالجميع ..
من جديد نلتقي ايها الاحبه واتمنى ان تروق لكم هذه الدندنه لقلمي ..


مساء الشوق والذكرى
مساء اللي علي يطرى
مسائي ذكريات وليل
وحلم ( ن) غامض التأويل
مسائي من رحل عني
ولا مره عليه اطرى ..!

مسا التنهيد والمسرى
مسا كل شي جمعنا بيوم
مسا حب(ن) ملكني دوم
ورغم البعد والتهميش
اتمتم ياوله صبرا ..!

مسا ينثر شذا العطرا
مساء دروب سرناها
وحكاوي ليل قلناها
ودنيا زاهيه كانت
ومن عقبه غدت قفرا ..!

طابت مساءاتكم ..
اخوكم / رايق البال

[اسطورة لن تتكرر]

ك ( نيرون ) كان رحيلك
هلا بالجميع ..

من جديد نلتقي ايها الاحبه وهلوسة قلم تنتابه بين فينة واخرى

رغم عدم واقعيتها ..


سيدتي

كما احرق (نيرون) مدينته هكذا انتِ احرقتي كل ما بذاكرتي

سوى هيمنتك ..!

لقد جسدتٍ مأساة روما بي بكل اقتدار

اعترف ..

وانا بكامل قواي العقليه والنفسيه بأنه مرهق جدا غيابك ..

تعبت من فك رموز وطلاسم هذا الرحيل اللا نهاية له ..

في كل صباح ارفع مرساتي وافرد اشرعة الشوق وامخر عباب الامنيات علني اصل الى

شواطئك السراب ..

وفي كل ليله وبعدما يسدل الظلام اجنحته تنهشني الوحده والذكريات كوحش كاسر

وتحولني لأشلاء وكم ينثر هذا القلب اشواقه وينزف حنينه كحمائم سلام يطلقها عل

احداها يحالف الحظ بوصلتها وتجدك فيهوي فؤادي اليك .


نعم اعترف بأنني رجل صعب المراس ، لايأبه بالمستحيل ، رجل مجنون بمشاعره في زمن

يتشدق فيه الكثير بالعقلانيه ولايمارسونها على ارض الواقع ..

ورغم كل انكساراتي الا انني انهض من رحم العدم كطائر العنقاء الخرافي فلا اعرف لغة

الإستسلام ابدا ..


الحب من وجهة نظري هو انسلاخ عن كل ماهو مادي وعقلي ودخول في حالة اللاوعي زمنا

ومكانا وظرفا ...

اي حب هذا بدون شطحات جنون يمارس في كل طقوسه ..!؟


سيدتي ..



بعيدا عن ضجيج هذا العالم وصخبه لازلت
بكل الوجوه افتش عنك ، واراك في كل درب

سرناه سويا ، وبكل اغنيه وضحكه جمعتنا معا ذات يوم .

كان لقاءنا الاخير عاصفا في كل شيئ ولكن لم اتوقعه ان يكون الاخير فعهدي بكل لقاءاتنا ان

تكون عاصفه دائما ..!

قيل قديما ان المستحيلات ثلاثه ( الغول والعنقاء والخل الوفي) واضيف عليهم بعد كل مامر

بي بأن رحيلك رابعهم لامحاله .

طابت مساءاتكم ..

اخوكم / رايق البال

[رايق البال]

هلا بالجميع ..
هذا رابط مدونتي التي بها جميع اعمالي الفكريه ( قصص / روايات / قصائد / خواطر ) حيث شملت هذه المدونه جميع اعمالي الفكريه التي ادرجتها هنا ..



(... â‌¤ كان لي عندك حكايه â‌¤ ...)
رابط المدونه :

https://www.omaniaa.co/showthread.php?t=67459

[رايق البال]

هلا بالجميع ..
اخر ماكتبت
قصيدة / مسا السكر

https://www.omaniaa.co/showthread.php?t=171064


هلا بالجميع ..
منذ فتره لم نلتقي هنا
محاوله بسيطه اتمنى ان تنال رضاكم ..


مسا السّكر
يا احلى من السكّر
مسا الاحساس
وليل وقمره وهوجاس
مسا الذكرى
وشوق ( ن) دوم يعصف بي
مساك الدنيا بأكملها
ياروح الروح بل اكثر


مسا السكّر
وانته في عيوني ضيّ
وفي جفوة زماني فيّ
مساء الشوق ياروحي
يابلسم دامي جروحي
حبيبي والوفا انته
وقلبي والغلا انته
تصدق عاد ؟
اموت برقّتك واسكر
مسا السّكر

طابت مساءاتكم ..
اخوكم/ رايق البال

[رايق البال]

هلا بالجميع ..
اخر ماكتبت هنا
خاطره / قد يأتي بها الحلم طيفا

https://www.omaniaa.co/showthread.php?t=171066



هلا بالجميع ..


عوده بعد غياب لقلم وهلوسته التي لاتمت للواقع بصله ..



( سلملي عليه
قوله اني بسلّم عليه
بوّس لي عينيه
قوله اني بوّس عينيه
انت ياللي بتفهم عليه
سلّملي عليه .. سلّم ) فيروز



مختلف ذاك المساء


في ليلة شتوية صاخبه وغامضة ايضا في احداثها


لقاؤنا كان عاصفا كالمعتاد


بعدها ..


بدأ الغموض يلف كل مساءاتي


نعم اختلفنا كثيرا سيدتي


وافترقنا كثيرا ايضا


ولكن ..


كنا نعود لبعضنا وكأن شيئا لم يحدث


ألا هذه المره ..!


منذ رحيلك الغامض ذاك


وانا اتجرع كل ليله للثماله اقدارمرهقه لا طاقة لي بها


سئمت من الحياة البوهيميه والتشرد والضياع


تعبت من الإبحار بحثا عنك ..


ايتها الساكنة خلف سراب الأمنيات
لا زال هذا القلب الشغوف يمارس كل ليله نفس الطقوس التي تعرفينها ..
اراك في فنجان قهوتي وانا احتسيه كل ليله
واسمع صوتك الهامس وانا وسط ضجيج هذا العالم
يحاصرني حبك من الجهات الأربع وكأنما خلت
الدنيا الا منك ..!


حنانيك سيدتي ..


فما عاد هذا القلب يحتمل المزيد من الأسى


كل ما اذكره في لقاء مساؤنا المنكوب ذاك


ان حالة من اللاوعي تلبستني وغدوت
غير مدرك لما يدور حولي ..


ارهقني جدا ذلك الرحيل القسري


ومن المدهش حقا انني وبكل طمأنينه ..


ورغم سوداوية المشهد والواقع


لا زلت اربت على قلبي واهمس له


من يدري .. قد يأتي بها الحلم طيفا ذات مساء



انتهى ..



طابت مساءاتكم ..


اخوكم / رايق البال