من وين اجيب غوازي عشان اتزوج !!

[ملهم]

السلام عليكم ورحمة الله وبركاته

صباح الخير اخواني واخواتي الاعزاء

أيـــــــــــــــــــــــــــــــــــن يذهب راتب شباب؟؟


بنبلش وراح ندخل في موضوع تو انا مستغرب من بعض شباب يشتغل ويمسك راتب كل شهر ليش ما يحوشوا من راتب شي يعني كل شهر يقضيوا على راتب كله ما معقوله كذا وما يصير كذا بكره بيبغيوا اهلك يزوجوك بنت الحلال وبكره بتبغا تبني منزل او تشتري ارض من وين بتجيب اذا ما مسكت معاشك من اول شي

يعني تحصل واحد معاشه بنقول 500 ريال او 600 ريال او 800 ريال
وما عنده فلوس حال زواجه ولا عنده ارض ولا عنده شي كيف كذاك !!

يعني يشتغل ويكد وفي الاخير رصيده في بنك 500 بيسة فقط

لا داخل جمعية ولا مسوي حال عمره شي حال المستقبل مو هذي الحاله !!


وفي الاخير جالس بعد والغم ينتضر صندوق زواج !!

ويوم تقول فلانه ليش ما متزوج يقول بعدني ما افكر اتزوج وهم يكذبوا قول ما عندي فلوس كنت العبهن اخيط مع الخياط العبيداني دشداشة مال 50 ريال واشتري عطر امواج مال 70 ريال ونعال مال 40 ريال ويوم ينزل اجدد تلفون اشتريه على طول

وعندي موستانج تطلع صوت عشان احوط فيها

الحياة ما كذا يا شباب لازم الواحد يخطط لي المستقبل وانتوا عارفين يجي يوم بعد يوم وكل شي يجي غالي والحياة صارت صعبه

اهم شي اتمنالكم التوفيق والنجاح

اترك لكم حرية في نقاش الجاد وراح ان شاء الله اتابع نقاش عندكم ..

[ندى***]

كلام سليم ٢٠٠/٢٠٠

الله يحفظ عقلك من الحسد

و لو الشباب كلهم يفكروا كذا كانت امووووورهم ف السليم

[Najl.y]

احسنت ملهم نصيحة جيدة
نتمنى التوفيق للجميع

[صمت الشفاه]

كلامك واقعي جدا
والبعض من سيارة لسيارة وماشيه حيااته

ربي يهدي الجمييع

شقرا سيد ملهم

[منى حمدون]

ما كل الشباب ينطبق عليهم السيناريو...

في الطالح وفي الصالح ..والرزين والمستهتر .. الشاري والبايع ..

في اللي تكفيه 200 وفي ناس 1000 وما يكفيهم

[Najl.y]

ما كل الشباب ينطبق عليهم السيناريو...

في الطالح وفي الصالح ..والرزين والمستهتر .. الشاري والبايع ..

في اللي تكفيه 200 وفي ناس 1000 وما يكفيهم

صحيح اصابع اليد ما تتساوى

[يحيائي10]

شكرا للموضوع ملهم

نعم وللأسف الشديد بعض الشباب تغريهم المظاهر الخداعه تجدهم يلهثون وراء الموضه من خلال تغيير هواتفهم وشراء الكثير من الاكسسوارا التي لا لزمه لها سواء ان يقال عني كذا واعمل كذا مجرد تحسن مظهر خارجي ربما سيتأثر سلبا قبل ان يكتمل الشكر ويكون رابته في الحظيظ

لما سيارات رياضيه او موستاج ؟؟ يكفي نفله او دوسة بترول في على الفاضي ربما تكلفه (جلن بترول)
لما اشتري دشداشه بسعر فوق العشرين ريال ومحلات كثيرة تفصل الدشداشة ربما باقل من عشرة ريالات وانا منهم
لما اغير هاتفي من موديلا الى آخر او زجاجه عطر بخمسين ريال .... هذا بطر نعمه وبذخ

علينا بالتوفير قدر الامكان والاهتمام بالاشياء الاهم
السيارة نعم مهمة ولكن في البداية اشتري على قد حالك ومش لازم من ا لوكاله
فكر كيف تجمع المال للزواج السعيد
فكر كيف توفر لبناء منزل الحياة والماوى الاسري




الف شكر اخي

[هنائية وأفتخر]

عااادي ابيع البيت والسياره ويتزوج لاه
ملهموووه اذا انت م عندك فلوس احسن اسكت

[مجنونك ما يخونك]

شكرا لك على الموضوع الجميل و المفيد ♥

جزاك الله الف خير على كل ما تقدمه لسبلة العمانية ♥

ننتظر إبداعاتك الجميلة بفارغ الصبر

[علي الشعيلي]

مشكووور ع طرح عزيزي

خالي ماشي ما طاعت تتصابى من كل صووووب
لا معنا موستانج ولا شي بس ما طاعت تتصابى هههه
كله غالي

[عسل بس مالح]

اخي ملهم ماكل الشباب كذا يلعبو بعضهم يصرفوا ع اهلهم ويكون الاهل عائلة كبيره فيطر ينفق كل راتبه يساعد اهله ومصاريفه فمسقط من اجارات واكل وبترول
فلازم مايبقى شي من الراتب

[تغآريد]

نصيحة جميلة

شكرا لك

[عذووووبه]

في شباب ماتقدر تحوش يصرفوا
على أهلهم ....

[مائة بيسة]

يحاول يقتصد بس مايحرم هم حاله....
http://www.majaless.com/up/get-1-2012-c1lfd55x.jpg

[الشيخه الفلانيه]

كلإم صححيح ,
بس نوبه الواحد يبا يرفهه علئ عمره :) "
و عقب اذا قرر يتزوج يسير بنك مسقط و كذا ,

[تباشيرالأمل]

السلام عليكم
لافض فوك ملهم
كلامك سليم لويطبقونه
الشباب كان هم بخير
جميل يكون لدى الشباب تخطيط
لمستقبلهم ونظره بعيدة المدى
وليس للحاضر فقط
التوسط لي كل شيء أساس النجاح
شكرالك

[وريث العز]

ملهم انا معك في كل كلمه قلتها بس في ناس ينخلقوا وهم اصلا يديروا اسره اذا احد من اسرتك قال لك جيبلي حاجه تقدر تقول لا؟
طبعا زووج مهم وهو نصف دين يعني الي ما متزوج لحد الان ما عرف ويش هي الحياه
واشوف انه المبالغه في المهور وتكاليف زواج مزودينها حبتين
شكرا لطرح الجميل

[devil_eyes]

ماحد مايحب يلغب بفلوسه..!
الشاب صار يلعب، ويستانس، ويوم يبا يتزوج، يروح لأقرب بنك ويأخذ قرض وخلصت سالفته ^_^


شووقرن فااجدات على الموضوع

[أسير الحب1]

مشكور ملهم...

فلوس شي بس البنت المناسبة ما حصلتهاااا:cool:

وبعدين سدحت موضوعك ودقيتها شرده..... ما يصير كذاك لازم ترد على المداخلات لااااه

تحيه من القلب يا صديقي

[ذكرى تائهة]

الله يعينكم وووووالله ....... الحياة عص ههههه

[مضيق هرمز]

هههههه انا بصراحة شدتني " غوازي "
وربك كريم

[بـــن ظـــآآهـــــــر]

كلامك صحيح اخي ملهم
وهذا هو الواقع مع الاسف من قبل البعض

[بورتريه الوحدة]

ههههه صدقت نعم ..
بس ما كل الشباب نفس الحال عندهم

ربي يعينكم

[غـــزلااان]

فعــــــــــلا أخــــــــــــي ملهــــــــم هــــذا واقـــع بعـــض الشبــــاب
لا بأس أن يهتـــــــــــم بمظهـــــره ولكــــن دون مبالغـــــــــــــــة
فلابــــــد أن تكـــون لـــديه نظــرة مستقبليــــــــــــة ..
فالسمــــــــــــاء لا تمطــــــــــــر ذهبــــــــــــــا ..

ليتهــــــــــــم يستمعــــــــــون إلــى نصيحتــــــــــــــك


يعني يشتغل ويكد وفي الاخير رصيده في بنك 500 بيسة فقط


ههههههههههه أرى أنـــك بالغــــت كثيــــرا فــي الرصيــــــد المتبقــــــــي


ودي وتقـــــــــديري لك أخــــــــــــي ملهـــم

[ملهم]

شكرا لكم على ردودكم الطيبه بارك الله فيكم جميعا اخواني واخواتي الاعزاء

تحياتي لكم
وكل عام وانتم بالف خير

[لولوه نادره]

هههههههههههه انا غبت ورجعت وانت بعدك كذاك..
موضوع مررره فنان..بعدهم لغم يضحكو ع بنات الناس
بتزوجش بس تو اجهز ومآشي منه!!

اغلب الشباب للأسف يتزوجو بسن متأخر ل هآلسبب
الادخآر يسوي وآآجد..لكن الفشره نوبه تسوي

تقبل مروري..لولوه نادره:rolleyes: