عفوية طفل

[حنــان]

السلام عليكم و رحمة الله
.
.
.
اول شي اتمنى لكم نهاية اسبوع سعيدة :)
.
.
بخبركم قصه يمكن بعضكم يعرفها ..

الأب عازم ناس في البيت و لما جا وقت العشا.. دخل عليهم الطفل يقول لا تخلصوا الأكل لأن أنا و أمي بعدنا ما أكلنا .. !
الأب انحرج طبعا ههههههه
.
.
ولكن عفوية الطفل هذا و عفوية كل الأطفال تخلينا نفكر شوي ..
هو ما قال شي غلط!
قال اللي الأهل منحرجين يذكروه..
قد يكون من كرمهم أن يقدموا للضيوف كل شي بس الطفل بكل عفوية خايف الأكل يخلص!
.
.
الطفل لما يشوفك تاكل شي يجي بنفسه يطلبك يذوق لأن خاطره فيه..
بس لما نكبر نصير نعاااااااااازم بعض بقوة و حتى لو خاطرنا فيه بنرفض!
.
.
الأطفال لما يزعلوا من بعض تحصلهم اليوم الثاني راجعين وكأن مافي شي.
بس لما نكبر عادي يطوّل الزعل لسنين..
.
.
الأطفال برائة و صدق و عفوية بشكل جميل جداً
.
.
خبرونا مواقفكم مع عفوية الأطفال !

[يحيائي10]

السلام عليكم ...

زعل الاطفال تنتهي بانتهاء ضرابتهم
اما نحن فلا تنتهي وان انتهت لكنها يبقى لها جروح ...

من حركا ت الاطفال انه لما يجي احد يسال عنك تخبر طفلك اني بابا ما في البيت ففجاه الطفل يذهب لطارق الباب ويقول له (( بابا يقول لك انه ما في البيت )) هههه
حصلت في الكثير من البشر
وهي من العفويات الجميلة جدا

الف شكر

[مريم98]

نعم من عفويات الأطفال
في مره يايين ضيوف بيتنا امي خبرت اخوي الصغير انه ما اييلس ع القهوه ولما وصلون الضيوف قالت وحده منهم تعال كل قال اخوي امي قايله يوم ايوو الضيوف ماتاكل ههههههه

[أبـوالولـــيـد]

السلام عليكم ورحمة الله
جزيت خيرا اختي
طرح استحق التقييم والاضافة للمكتبة
ويثبت لبعض الوقت

ادارة السبلة العامة

[مائة بيسة]

اوقات هالعفوية تجيب العيد خخخ..مرة بليل جأت صديقة امي وبنتها البيت
واكيد بنتها بتجي ع طول غرفتنا اختي سحبت البطانية ومثلت انها نائمة
إلا وولدها يسحب البطانية ويقول ماماتي مانايمة تمثل هع
https://encrypted-tbn1.gstatic.com/images?q=tbn:ANd9GcROoMDDgb4oSmBGkYnZ7cE4Cc245rx00 I9MIgaJsit_zEMLH9Z23w

[❤ رصاصه روسيه ❤]

ههههههههه ع طاري الاطفال
بنت خوي عمرها 9 شهور
ما شاءالله عليها ربشه بس عياره بقووه

يعني لو عصبت عليها تزعل عاد عليها حركات مره صرخت من العصبيه وما عرفت وش تسوي نزلت راسها تحت وانسدحت
اوين زعلانه اكلمها وما ترد تتغلا واجد
لحد ما راضيتها وترفع راسها بـ ابتسامه عريضه
نعم ضحكتني

[بقداد]

بنت اختي كمان دلوعه كثير عمرها 10 سنوات بس تحب تتدلع معي لاني احبها واشتري لها كل شيء تحبه

شكرا على الموضوع الجميل

[أبـوالولـــيـد]

نكتفي بهذا القدر من التثبيت
ادارة السبلة العامة

[صمت الشفاه]

للاطفال براءة غير منتهيه
وجمال بالحياة
وحركاتهم وطلباتهم ملفته مسلية

[حنــان]

اذكر مره أخوي يقول رجولي تعورني و نحن نسأله ايش فيك و ليش ومدري شو

ف بكل برائة يقول أريد ماكدونالدز عشان يخف الألم! ههههه

[seajie]

احب الاطفال بسبب برائتهم .. يوم يشوفوني يسلمو علي ويضحكو .. خصوصا بنت اخوي .. يوم اكلمها تضحك .. تقول عمي انته تضحكني يوم تتكلم ههههه

[حمد نجد]

يجب ان يعي الكبار منا ان الاطفال لا يحملون في قلوبهم غير الصفاء مهما حصل لهم ومهما اختلفوا فيما بينهم ولكن للاسف نجد القطيعة والزعل بين الناس بسبب مشاكل الاطفال ويزعلوا على بعض وتلقى الاطفال اللي هم زعلانين على شانهم يلعبون مع بعضهم ثاني يوم.
شكرا لك على الطرح القيم الهادف ......