قصة عوشانه.

قصة عوشانه لمحبي قصص التراث العماني الشعبية (التخلوقة أو الحزواه) المليئه باللامعقول

راحت عوشانه هي وربعاتها يرقطن نبق وطلعت عوشانه فوق السدره عشان تعسفلهن وهن يرقطن
يوم رقطن وخلصن راحن .
قالت عوشانه: حرصني لين ارقط !
لكن ماحد حرصها.
ويسلت وحدها ترقط وكل مره تلقى في النبق دود .
اخر شيء قررت تطلع السدره مره ثانيه عشان تعسف حال عمرها نبق جديد وترقطه بعدين.
ولكن !!! جا الذيب ... وصار يضرب السدره براسه وهي متعلقه بغصن . يوم شافها بتطيح عقد معها صفقه.
قال الذيب: إذا طحتي في الشمس بكلش واذا طحتي في الظله بكلش واذا طحتي بين الشمس والظله ما بكلش نياهاهاها.
وضرب السدره للمره الاخيره وطاحت عوشانه في الشمس. وشلها الذيب بيته بيطبخها حال الغدا وحطها في جونيه في لين يثور الماي لاه!
وهنا حدثت المفارقه العجيبه ! أم الذيب الطيوبه فتحت الجونيه في غفله من ولدها وعطت عوشانه كليبه وقالتلها شردي !
يوم جاء الذيب مجهز العيش وباقي يحط عوشانه فيه لقى الجونيه فيها حصى والبنت شارده .. وهوووبا وراها!
وركضت عوشانه بأقصى سرعتها وكل شوي تسأل : كليبتي كليبتي مو تشوفي ورايي؟
الكلبه: أشووووف شيء كبر النمله!
عوشانه : كليبتي كليييبتي ! مو تشوفي ورايي؟
الكلبه: أشوف شيء كبر الفار!
عوشانه: كليبتي كليييبتي ! مو تشوفي ورايي؟
الكلبه: أشوووف شيء كبر الفيل
متحزم بدعن ومتوزر بدعن .
المعنى : كنايه عن الغبار الذي أثاره الذيب حواليه من فرط الركض!

((ملاحظة:
متحزم: الحزام
بدعن: الدعن، يشبه العريش من سعف النخيل
متوزر: الوزار ))

عوشانه: اقتربت نهايتنا ! اما تذبحيني او أدبحش!
الكليبه : اذبحيني ! ...
((ما اعرف كيف واحت تنفذ الجريمه لكن ما مشكله عشان الدراما))
وذبحتها وأخذت يهابها( جلدها ) ولبسته ! وعلقت لحم الكلبه فوق البير
ويوم وصل الذيب قال: اها ماتت وهذا لحمها وقفز عشان ياكله وطاح في البير!
واكملت عوشانه طريقها متنكره بيهاب الكلبه
ومرت على قريه وهناك حرمه تحش قت وعوشانه ميته من الجوع
نادت قائله: من يباليييي أحشله وارعاله. وأكل فضال عياله؟
الحرمه: عب نعم تو لو ما جالسه أحش هدقش بذا المحش!
مرت على حرمه ثانيه توضي ولدها من البوبوه (تغسله من...)
قالت: من يبالييي أحشله وارعاله وأكل فضال عياله!
الحرمه: عب نعم لو جالسه اوضي ولدي بدقش بذي البوبوه!
ههههههههههه
المهم كملت طريقها ولين وصلت بيت الشيخ
قال الشيخ: اكرموا مثواها احنا نحتاج كلبه تحرص الغنم يوم يرعن.
(وهكذا حصلت عوشانه وظيفه بعد ما قدمت (السي في) مالتها ثلاث مرات فقط! دنيا حظوظ!)

ولما قدمولها الاكل رفضت تاكل مال الكلاب لين حطولها اياه في صحن مرتب!
وهنا شك فيها ولد الشيخ انها ما كلبه .. (ما شك فيها لما تكلمت تطلب وظيفه هع)

ومرت الأيام وكل ما تروح ترعى الغنم تجلس تستريح عند شجره وتفسخ يهاب الكلبه وتنشر شعرها الطويل وتجلس تتمرجح، ويجي جنبها جمل يعشقها ويجلس جنبها ويسمعها وهي تغني: الهوش يرعن ويترعن، وجمل حيدان بارك.. تحت طلة البارد.
وفي احدى المرات طلع ولد الشيخ الشجره ينتظرها ولما جلست تتمرجح طرحلها برتقاله (سنطره) من فوق
اخذتها وقالت : هذي اكيد من عند امي رسلتها مع الطير الطاير وذاريات الهبايب.
وقسمتها قسمين واحد للجمل وواحد لها.

وبالباكر نفس الشي ولد الشيخ ينتظر فوق الشجره ويوم تجي يرميلها برتقاله وتقسمها وتعطي الجمل وتاكل نصها

وبعدين قرر ولد الشيخ القرار الخطير..
الولد: اريد اتزوج الكلبه!
العالم والناس والكره الارضيه: نعم؟ مو تقول؟
الولد: قلت اريد اتزوج الكلبه.
حاول الجميع يقنعه ولكنه رفض وأصر يتزوج الكلبه!
ولما كانت الزفه طبعا الكل متقزز منها ويا دوب دخلوها معه وشردوا
المهم قال ولد الشيخ : خوزي يهابش! هع
عوشانه: هو هو هو
الولد: خل عنش هو هو تراني أنا عاقلش السنطر من فوق السمره !
عوشانه: هع !
وعندما جاء الغد...
قرر ولد الشيخ يسوي مقلب فيها عشان يثبت للعالم ان زوجته اجمل الجميلات وليست كلبه.
وطلع وركب خيله وعوشانه تمشط شعرها الطويل
وبعد شوي... نادى منادي: ولد الشيخ طاح من فوق الخيل ومات! ولد الشيخ طاح ومات
وركضت عوشانه بشعرها الطويل برا ولقته متبطح وارتمت فوقه ورمى احدهم بغترته فوقها عشان يغطيها
وقاللها زوجها: صادوه!

وبعدين قرر اخوه يتزوج كلبه!
قال العالم والناس: علوه ذيك ما كانت كلبه لا تسوي مثل اخوك
قال الاخ: ماشي ماشي ابا كلبه يعني ابا كلبه
المهم جابوله كلبه كبر الجحش وعدلوها وحطولها ذهب وزفوها ودخلوها عليه وعضضته لين سده وشردت هي وذهبها
ههههههههههههههه

وجيت عنهم وعطوني سبعه قروش واحد انطر وواحد انفر وواحد فديتبه حياني وحيانكم عن الشر والباقي فمخبايي .. وسلامتكم ههه

مساء الخير
قصة ما قبل النوم عبارة بداية القصة مغامرات بس عوشانه ما متحجبة تتمرجح بكشتها ههههه المهم أغنيتها تضحك ياخي الهوش يرعن ويترعن، وجمل حيدان بارك.
بس في شي ما فهمته يهاب الكلبة يعني الكلبة ربيعتها تقوم تذبحها وتلبس فروها ولا الثانية راضية
قصة ممتعة ولو أن بعض الكلمات عسرة وعمانية قحية بس جميلة

هههه
ذكرتني بقصص وحزاوي يدتي الله يغفر لها ويرحمها
قصه جميله اخي الفاضل
دمت في حفظ الرحمن

قصة رهييييبة
يعطيك الف عافية اخي الفاضل
رجعتنا للزمن الجميل لما كنا نتجمع في الحوش ونحن صغار نسمع
الخراريف والحزاوي
الف شكر وتقدير لك

ههههههه قصة جميلة ومضحكة
يعطيك العافية عاﻻنتقاء رائع أستاذ

هلا فيك ابوقيس ..
قصه جدا رائعه وطريفه هههههه
الف شكر لجهدك واختيارك وتفاعلك الجميل
طابت مساءاتك ..