انا مدري سبب هجرك .. هل بحقك أنا غلطان؟
وأنا اللي شلتك بعيني ونبضي وكل شراييني
ترا في داخلي أشعلت في وسط الحشا بركان
أنوح بحرقتي وأصرخ.. بأي ذنبٍ تجازيني؟
حياتي أصبحت ظلمة لبعدك يا أعز إنسان
تعال وشوف بعيونك.. ظلام الليل بعيني
وعيّا الصبح يشرق بي .. وقلبي لفرقتك ولهان
متى بتعود وترجع لي؟ وترجع بسمة سنيني؟
حنين وشوق عذبني.. حرام ارجع .. كفاية أحزان
أبيك وما أبي غيرك.. دخيلك لا تجافيني
حسافة الحزن بي سيطر .. وأصبح أقرب الخلان
وهو كل لحظةٍ مقبل.. يصبحني ويمسيني
ترا بعدك ذبحني حيل .. تخلخل فيني الميزان
تمنيت الردى يحضر.. وتخلص عقبك سنيني
حياتي يا الغلا والموت في عمري غدوا سيّان
طريقك كلما يبعد.. إلى قبري يوديني
ولو بتزور قبري يوم.. وتنثر ورد أو ريحان
بتلقى مهجتي عندك.. ولك الأشواق تدنيني
أمانة لا تنزّل دمعتك لأجلي.. ولا تنهان
أنا ما أحتمل دمعك.. ولو للموت تبكيني
