أحبك يا بعد كل الأماني ..
يا داري وعزتي وتاجي وكياني
يكفيني فخر لا قلت أصلي ..
عماني وأفتخر بأني عماني ..
عماني وافتخر جداً .. لأني
عماني والعماني شي ثاني!!
واذا تبغي الدليل يجيك واسمع
قصيدي وقول صح الله لساني!!
أنا من دار قابوس المعظم ..
سليل المجد يفخر بي زماني !!
أنا من دار قابوس المفدى ..
وريث العز والعليا مكاني ..!
ولدنا من بطن واحد ومجده ..
تعدى مرحلة جدي فلاني !!.
ولدنا من بطن واحد واسمه
عمان ارض المروؤه والتفاني!!
عمان ارض الكرم وارض التسامح
وارض العلم وإعزاز المعاني
عمان ارض الأوائل دوم أول
بلادً عمرها ما جات ثاااني!!
واذا للطيب موطن فانا ابصم
بان الطيب جنسيته عماني..!
تربينا على مبدأ أساسه :
"لأجل عمان هذا العمر فاني"!!
ومن يغلط علينا بنص كلمه،،
نقص لسانه ف اربع ثواني!!
ولدنا للسيوف رجال ..ننصر
بها المظلوم والظالم يعاني ..!
لنا أفعال ما تمحى وتشهد ..
تخوم الفرس وبلاد اليماني!!
على صدر السما تاريخ حافل
يحلق فوق تاريخ المباني!!
تسيدنا البحار واسم احمد ؟!
ابن ماجد يزخرف فالمواني..!
تربعنا المراتب لين صرنا :
محال محال ف عيون الأماني !!
وش اوصف يا بلادي وكيف اوصف؟!
ولوصفك كل عمري ما كفاني!!
اذا التاريخ صاح بصوت عالي
لوصف عمان ما املك معاني!!
انا بسكت وبكتب شطر واحد
عماني وافتخر باني عماني **
