صحيح لك بالقلب حشمه ومقدار :::
لحظة ترى ماجيت أقدم لك اعـذار
لحظة وبعده سـوي اللـي تسويـنه
لحظة بصحِّح بيننا بعض الافكـار
وباقول لـك حاجـة قبـل ما تقوليـن
لا تحسبينـي بنثـر الدمـع وانهـار
والا اترجى واطلبـك مـا تروحيـن
روحي عسى دربك بساتيـن وازهـار
روحـي وغيـري بالمخاليـق تلقيـن
صحيح لك بالقلـب حشمـة ومقـدار
لكـن شسـوي لـك إذا مـا تحسيـن
لي قلب لامنـه عشـق حيـل مـدرار
ومن الغـلا عنـدي يكفـي ملاييـن
بس إن لقى صد وجفى صـار جبَّـار
وأقدر افـارق واهجـرك لاتخافيـن
يابنت أنا لي عزتـي وباخـذ الثـار
وابغى انصحك لارحت اصحي تنادين
ماني براجع لاتقوليـن وش صـار؟
لاتسألينـي ليـه ؟ إنتـي تعرفـيـن
غيـرك تمنونـي وبلعـب وباختـار
واعشق بدالك ألـف وحـدة بيوميـن
وانتي رصيدك بالغلا عندي اصفـار
ماهـو بذنبـي ماعرفتـي تحبـيـن
وكل الذي لجلك كتبتـه مـن اشعـار
والله خسـارة فـيـك ماتستحقـيـن
حتى صورك اللي من العـام تذكـار
بادوسهـا وانتـي قبالـي تشوفـيـن
يامـا عطيتـك ألـف إنذار وانـذار
أقـدر افارق .. قلـت لـك: لاتحديـن
واليوم أنا ليه اتعـب النفـس واحتـار
دامـك جرحتينـي وكنتـي تسلـيـن
إن كنت حي ومن طويليـن الاعمـار
لجرح بدال الجـرح تسعـة وتسعيـن
والحين يالله خلـي دموعـك امطـار
وباحاول اضحك طول ما انتي تصيحين
