اللي على راسه بطحا يحسس عليه
الزمان يدور والــــــوقت يطحنا ( رحاه )
كل يــــــوم يموت ( رجال ) ونصلي عليه
كم ( رفيقٍ ) ودنا به على قيد الحيـــــــاه
وكم ( رديٍ ) يبطي الموت عيا ما يجيه
وكم صبي ٍ ( شاب ) راسه ولا حقق مناه
وكم صبي ٍ مات واللي حفر قبره ( إبيه )
وكم فقير ٍ مات حلمه من سيوف ( الغناه )
وكم ( غني ٍ) عاش دور الفقير ويشتكيه
وكم جميل ٍ من هل ( الطيب ) ماتلحق جزاه
لو عطيته نور عينك ، تقول : شوي فيه
وما يدل الدرب من لا تمسك ( بالوصاه )
وما يقدّر نعمة ( العقل ) غيرك يالنبيه
ومن عبر( بحر الملذه ) على قارب نجاه
لا يلد العين ( للبحر ) ويعود إليه
ديننا ( يالمسلمين ) احسن الله في عزاه
دامنا ما نحمي الدين ( لا نبكي عليه )
لو ( كنوزك ) كبر سنجارواجبــــال السراه
الضمير الحي ماهو عقار ٍ ( تشتـــــريه )
لو يطلّع كل تاجر من امواله ( زكاه )
ما لقيت من ( المساكين ) من يبسط يديه
وإن ملكت ( أخلاق ) تملك بها سمعه وجاه
بالفعول وبالطبايع صحيبك لك ( شبيه )
( الردي ) لو يستره ثوب وش يستر رداه
دام مايحشم ( قرابه ) ولا يحشم ( وجيه )
إنصحوه يبيع ( ثوبه ) ويشري له ( عباه )
طاح من عين ( المراجل ) ولا عادت تبيه
والسفيه إن ما تبلاك ما تسلم ( غثاه )
حاول إنك ماتجي درب يسلكه ( السفيه )
و(صافح كفوف) الزمن و إبتسم لأجل للحياه
وإعلم إن ( الله ) اذا حب ( عبده ) يبتــــــليه
