رحلة الدنيا ذهاب بلا رجوع
راحت الأيام والخاطر جزوع
والظروف تسوقنا ونسوقها
رحلة الدنيا ذهاب بلا رجوع
تحت الأرض أكثر من اللي فوقها
والحظيظ اللي من الدنيا قنوع
عاقب كل الفتن وطروقها
والله إني بالرحم ماني قطوع
والعهود الوافية مابوقها
المحبة سحر والفرقا تلوع
كم عشيقة فارقت معشوقها
الحياة تطوّع اللي مايطوع
مثل تطويع الرعاة لـ نوقها
والرحى تطحن محاصيل الزروع
والعيون تخيل نوض بروقها
الحياة تخلّي النايم يفوع
والأماني من قطف زملوقها
الحياة أفراح وأحزان ودموع
والأمل نور الحياة وذوقها
تختلف روس الرجال من التبوع
والرجال تبين من منطوقها
بالسلوم وبالمذاهب والطبوع
دبرة الخلّاق في مخلوقها
وعادة الحاسد من الطيّب بشوع
يحسده في لقمته لايذوقها
كثرت عفون العرب من كل نوع
سمِّها ببطونها وشدوقها
مايبونك في سما العزة طلوع
والقوافل ماش شي يعوقها
الله أعلم وش ورى عوج الضلوع
السراير في بطن صندوقها
الردى له سوق تنصاه التبوع
والمراجل له أهل في سوقها
النخيل اللي لها تمر وفروع
طيّبة في طلعها وعروقها
والأثل لو له عروق و له جذوع
مابه إلا الدود يرعى عذوقها
الحياة دروس والفجعة تروع
بكرة الأيام تطوي طوقها
السنة مثل الشهر وألّا السبوع
والآوادم مالحّقت ملحوقها
أمس يوم السبت واليوم الربوع
ماسرع من غيابها إلّا شروقها
أطلب الله في صلاتي وبالخشوع
كان ضاقت بي جميع طروقها
الذنوب كبار والوالي شفوع
لو وصل ذنب البشر لحلوقها
