البارحة ما هملج الطرف بنعاس
البارحة ما هملج الطرف بنعاس
ما فاض من نجمٍ عيوني تخيله
لا باس يا عيني على السهر لا باس
على وليفٍ فات ما القى مثيله
عنا قطع شوف المواصل له ارماس
ولا في يدي من نابي الارداف حيله
فيما مضى يأخذ جوابي من الراس
واليوم لا عاني وانا ما اعني له
العشرة اللي ما توثق على ساس
تطيح لو صارت حصون طويله
يا ونتي منها المعاليق يبّاس
صبري قضى ما باقي الا قليله
صبرت صبراً صابني منه وسواس
صبراً له النفس العزيزيه ذليله
على وليف حال من دونه الياس
والياس طب للقلوب العليله
من يتبع المقفي مرده بالأفلاس
مثل الذي بالقيظ يدفق صميله
هذي دورب الحب جده ودراس
الله يمضيها بستر وجميله
موفقٍ للخير يا ظبي الاطعاس
لا تحسب الدنيا باهلها طويله
الصاحب الغالي نحطه على الراس
واللي يودك لا تدور بديله
وصلاة ربي عد ما هب نسناس
على نبيٍ وضح الله دليله
