الصبر سجن الرجاء وسلومي قيود
واخاف لا اجني من الصمت الندامه
ساكت وصابر واشوف الوضع مشدود
ماودي اجــرح باحــساسي صيــامه
من محجر الشح طاحت دمعه الجود
حتى غشت وجه الايام الملامه
بالضبط ماكنه إلا دمعة العود
عودٍ من عياله يشوف انهزامه
كم واحدٍ لو حضر ما هو بموجود
ندرك وجوده ليا اوحينا كلامه
وانا احسب ان الغياب سهود ومهود
لو كنت اميز حلاله من حرامه
ويوم افترقنا الضحى ياعز مفقود
حسيت بالكون يوم اسدل ظلامه
بري وبحري ونسمه بارد النود
وسماي فاقدك غمامه غمامه
سحاب لكن بدون بروق ورعود
عجزت اواسيه حتى بـبتسامه
والونه اللي تغيب شهور وتعود
صرت اتمنى لها طيب الاقامه
جاء للمشاعر ماجاء لأصحاب الأخدود
شكراً لـ ظلمك على حسن اهتمامه
اللوم شيخ وراه جروحي وفود
ان مد يمناه عزالله مقامه
وفاي مثل الشجر وأوراقه عهود
حطي على غصن شوقي ياحمامه
ارجي وسلك الحرير يقودني قود
قود الزعيم لمقاليد الزعامه
لو ان حيلي من اللي شلت مهدود
ماطيق ازيد الحمل ريشه نعامه
ان كان هذا الامل ما جاب مردود
قامت على راس عاشقك القيامه
غيرك لو انه فرش فدروبي ورود
وفرض قبل مقدريتهاحترامه
اقول له ما على مشاعرك زود
لكن خلك على فراش الكرامه
اما انت والا بلاش معاشر الخود
ماني مبدل شدادي بالمسامه
مواصلك لاذكرته ياطرق العود
اقول ياجعل للجنه عظامه
سافرت مانت بـ على سفرتك محدود
متى على الله ترجع بالسلامه
