ياشيخ يا فارس هزم كل ميدان
يا زاهد الدنيا ويا عالم الدين
يا اللي فعولك للبشر خير برهان
من غير مدح ..الناس بالشيخ دارين
شيخ المشايخ شيخ من نسل شيخان
إلا سليل المجـد واهلك سلاطين
لو في العرب مثلك جهابذ وفرسان
يا شيخ يمدينـا نحرر فلسطين
عليك ماني شايل ٍ هم الازمان
خوفي عليك من الحسد والحسودين
اعوّذك وارقيك من شر الاعيان
الله يغط الشر ويغط ما يشين
انت الشجيع وعنتره معك ما بان
وانت الصميدع ما انخلق مثلك اثنين
عند اللقا ما هاب قلبك ولا لان
ولا سبق وانحشت مثل النساوين
انت الصدوق اللي كلامه بميزان
صادق ولا للكذب عندك دواوين
وانت الوفي ما فيك عيب ٍ ونقصان
.ملاك طاهر في عيـون المحبين
قلبك نظيف وما حوى خبث واضغان.
طيّب وخيّر والفعـايل براهين
ما انت بخبيث ولا منافق ومرضان
ولا معك نيه ولا معك وجهين
ولا انت مثل الديك من غير جنحان
وده يطير وما لقا له جناحين
ولا حسيل مجمع ٍ حوش حسلان
ولا خبيل ويحسب الناس خبلين
خلوق في وجهك من الحشمه الوان .
ولا عليـك من الخساسه تلاوين
ولا انت مثل الكلب تنبح وجربان
ما تسكت الا لا رجمنـا بعظمين
ياشيخ ما يوجد مثيلك ولا كان
يا معجزه تشغل عقول الملايين
