الشدايد يا جميله بالازمات اختبار
ينعرف فيها الضلال الطويل من القصير
كل ماذكر حالتك بين غار وبين نار
راحت الدنيا بعيني عبوسٍ قمطرير
تحسب ان حبك محاه التشدد والحصار
التشدد في المحبه هو الشر الشرير
شغلهم ضدي وضدك يعمر لك وقار
في ضميرٍ ماسكن فيه قدامك عشير
زارعٍ لك بخشةٍ من الزرار الى الزرار
نبتها ملمسك والعود الازرق والعبير
شد حيلك لا يصيبك فشل وإلا إنهيار
لا تصغّر قيمتك وانت في عيني كبير
لذة إصبار الهوى مثل لذة الانتصار
لا تصدق من يقول الحسد مافيه خير
لا تغير ماجرا من قنا مثلك يغار
كل شي ينشفا فيه ميصاله عسير
الذهب دونه حراسه وبيبابٍ كبار
والدرر من دونها هيبه البحر الغزير
غير لاتيأس و تكتب على نفسك قرار
يدفعك سوء التصرف إلى بئس المصير
لولا شحي فيك جيتك و جاهربك نهار
غير ما يصلح مقام بلا رايٍ بصير
فرصتي ويقت حرارٍ على ماكر حرار
ما يعود فالمحل الربيب إلا البعير
والله لين الموت ما جاك من عندي بوار
خل في قلبك ثقه والثقه كنز الضمير
خذ كلام اللي يشوفك بعين الاعتبار
واحدٍ مالك بقلبه ولا عقله خشير
والمحبه مدرسة شي ثبوت وشي فرار
وانت درسي مع هل الحب الاول والاخير
