كثرة السرقات أيام إجازة الاعياد
بسم الله الرحمن الرحيم.
حبيت اناقش اليوم معكم موضوع السرقات وخاصة تكثر أيام اجازات الاعياد عيد الفطر وعيد الاضحى.
اليوم الصباح على الساعة 11 تقريبا وأنا مارة في الطريق وإذا بحادثة سرقة سياره امامي.
صاحبها نزل ودخل الدكان يشتري اغراض واذا بواحد يصعد السيارة ويخطفها ويهرب
خرج صاحب السيارة يركض ويصارخ في الشارع وبيده الأغراض التي اشتراها والذي يشتغل في الدكان يركض معه . وأنا أمشي بسيارتي أوقفني صاحب السياره المخطوفة وصعد سيارتي وطلب مني اتبع سيارته المسروقة ما خفت الصراحة من الوضع خاصة لما شفت حالة صاحب السيارة من الهلع والخوف فتبعنا السارق ولكن للاسف على سرعته دخل في الحواير وجلسنا نبحث عنه من سكة لسكة وللاسف ما شفناه. وإحنا ندور اتصل بالشرطه وما عارف مسكين حتى رقم سيارته.
عطى الشرطه وصف السيارة وقال لهم سيارتي فيها فلوس كثيرة وجميع بطاقاتي.
بعدها قالي ويش بقول لأهل بيتي بيلومني.
اتصل بأبوه وقال له ألحقني سيارتي انسرقت نزلت اشتري اغراض من الدكان فخطفها واحد وفيها المبالغ وجلس يبكي كأنه طفل مع انه كبير في السن.
الصراحة المبلغ الذي ذكره كبير بالألاف قلت له فيها هذا المبلغ الكبير يمكن فيه حد عارف بالمبلغ وتابعك
قال ما أعرف .
لفينا ولا حصلنا السيارة في ذيك الحارة والسكيك
طلب مني بعدها أن ارجعه الى نفس المكان الذي فيه الدكان واتصل بأحد ابنائه يجي له هناك
أستغفر الله العظيم فيه ناس ما فيهم رحمة ولا في قلوبهم ذمة.
قلت له أن شاء الله ترجع لك السيارة والفلوس .
لا حول ولا قوة الا بالله العلي العظيم
