< ♡ > { ذكريات لا تنسى } < ♡ >
آه ذكرتك وبدت ملامح وجهك قتاله
وهيضت جيوش الهوى ومثلي لحاله
واصبحت وحدي اسير هواك يالغالي
بثيت همومي للعاشقين اسمى رساله
صحيح إنك غالي بدلت المر بالحالي
نعم زرعت المحبة في الخلا الخالي
وبنيت لك في القلب قصرك العالي
لكن مثلك تغير لما غره حسنه ودلاله
كنت ولا زلت عندي غرو شبيه الحور
سيطر على عقلي أيام حلوه و شهور
تلاعبني وتداعبني وخليتني مسحور
لين سطرت هواي و هواك في مقاله
ولما سرقت قلبي ما تركته في مكانه
رحلت ورحلته معاك ومسكت سكانه
لفيت به لفه في عالم الظلم وطغيانه
وحلت الفرقا وعقلك ما عرف مدهاله
بعدك تهت عشر سنين مرت وماأدري
احسن إنك بيدك الطاهرة حافر قبري
قالوا الحساد مات هواك وأقول بدري
تايه في هواك ويحسب يمينه شماله
ألا يا لايم العاشق المفتون تراه يتألم
وما تمر ساعة إلا وبخله دايم يتحلم
عايش في خيال كل ما مر عليه سلم
ياالله عسى فال الحاسد الفاسد فاله
اقول سبحان الله غير جميع الأحوال
رد العقل واستنار الفكر وشيء محال
وخطيت بالقلم لأهالي الذوق مرسال
كود يقراء شوق لشوقه مثلنا مرساله
حي العويد قراء من وجهي المرسول
وافهم وذكر الله وصلى على الرسول
فتح قفل قلب كان بعد الفرقا مقفول
لما فكر قال عنده لمثلي مايشغل باله
وذكر لي في مكة غزاله من الحلوين
سرينا في ليل الناس ماهوب داريين
توجهنا للحرم وقال ندعي رب معين
ودعينا الله رب ما يخيب عبد لجأ له
وطرقنا الباب وفتح لنا شاب كالذهب
وقلبي سبق روحي وله بالعجل ذهب
قلت عسى غزالهم يطفي نار لها لهب
آه ما ألوم قلبي لمن زاد علي اشتعاله
لقيت دانة من البحر الأحمر لي فتانه
القمر يشبه خده والنيل يشبه فستانه
سبحان رب خالقه كالبدر عالي شأنه
بفضل الله صار دربنا درب كله سهاله
آه ودعناهم بعد اللقاء وبننتظر لقاهم
ناس يثلج الصدر استقبالهم ومحياهم
يا كم تمنيت أمسيت ذاك الليل معاهم
زال الهم من صدري وما فارقني خياله
آه نعم ياللي تسأل هل للقصة من بقية
نعم اقبلت حياة الروح احلى من رقية
الغلا اشتهتها نفسي اسرع من البرقية
هدية الرحمن من أرض منبعها الرسالة
والختم صلوا على المصطفى العدنان
نبينا محمد سيد العالم كله إنس وجان
عد الأشجار و إعداد أوراقها والاغصان
نبي الرحمة من صلى عليه طاب حاله
الشاعر/ حمد بن فهد المخالده السبيعي
