أنا اللي يا بعد عمري بقول آسف ولو ما أخطيت

أنا اللي يا بعد عمري بقول آسف ولو ما أخطيت
لأن أكبر خطا منك صغير بجنب غلطاتي


أبد ماني بقايل لك ترفق ليه وش سويت
قل اللي ودك بقلبك تقوله واترك سكاتي


عسى الله لا يعافيني إذ من هرجى انغثيت
سكتت من الخجل و الله بلايا خابر سواتي
تفنن يابعد روحي بطعناتي واذ حسيت
بقايا عرق يتنفس بصدري زيد طعناتي


ما دامه صح كل اللي تقوله فانت ما زليت
واذا زليت هالمرة نسيت وش كثر زلاتي


نسيت أنك تنسيني الزعل كله إلا من جيت
مجرد ضحكة عيونك بنظرة تجمع شتاتي


نسيت وش كثر تغليني كم لك وانت ما مليت
نسيت أن الوفا منك يذكرني بخياناتي


نسيت اللــــــه ، يوم أنك علي من الزعل غنيت
حسبت أشواقنا غابت وخابت فيك هقواتي


عجزت أنطق ولا كلمة بلحظتها سوى ، يا ليت
يجي لك يوم بإذن الله وتقراها مع أبياتي


هذاني جبتها شفني وازيدك من الغلا لك بيت
مادام انه القصايد فيك لسه في بداياتي


أحبك إيه أحبك إي أحبك آآآه لو عديت
من الآحاد ، من الآلاف ، تملئ كل خاناتي


حبيبي لا تحاسبني وانا ياما عليك أخطيت
ترى لو مت بيدينك غفرلي صدق غاياتي

اهداء للتى تعرف نفسها