شعر مؤثر جدا يحكي قصة حقيقية لطالبه في الثانوية متفوقه …..في الصف لكن
سوالف ربعي البارح شي ن شدني فيها -
وخلا مارد إلهامي يسجل عندي حضوره -
جابوا سالفة نوره ف قصه وقلت أبرويها -
ف صف الثانوي تدرس كما هي عاد مذكوره -
حكت عنها زميلتها وقالت حق آخيها -
هناك بنيه بصفي شكلها حيل مغروره -
فآخر صفنا تجلس ولا حدن يضاهيها -
دايم تطلع الأولى وع بالي البنت هاموره-
لكنا نطلع الفسحه وبيت الراحه يأويها -
قلنا يوم أو يومين ثلاث أيام معذوره -
ولكن ع الوضع دايم من أولها لتاليها -
وإحنا نشتري وناكل ونعمل مع بعض هوره -
بصراحه الشك من يدخل قلوب الناس يعميها -
ويجعل كل أبونادم يخرج عاد عن طوره -
بلغنا مديرتنا تشوف البنت وش فيها -
تبعتها ولا سمعت خرير الماي له دوره -
دق الجرس طلعت دخلنا وجت تناديها -
فلانه شفيك !! ميهوده !! تبي تزورين دكتوره ؟
قالت لا يا أستاذه ! مابي عله وأشكيها -
لكن عادها دموعي وهي ع الخد منثوره -
ما ابي حد يلمحني وأنا أهل بعباريها -
أخجل من زميلاتي وأنا ماني بمضروره -
وأنا عيني بصيره بس مثلي مقصر يديها -
ومابي ف عين زميلاتي أهز لوالدي صوره -
كثر خيرها الدنيا ماجت كيف يبغيها -
مو ذنبه الحظوظ إن جات ع دربه تطيح معثوره -
ومو ذنبه أجي أمشي وغيري من يوديها -
ومو ذنبه بعد نسكن ف حاره شبه مهجوره -
مو ذنبه وأنا تعودت على الدنيا ومآسيها -
وياريتك بس يا أستاذه تعرفي القلب ش شعوره -
إذا غرت فقط دمعه ف عين أمك وشفتيها -
وأنا دمعة أبو تطيح قدامي بلا شوره -
هنا تبكي مديرتها وبكوا كل الحواليها -
خذتها بالحضن قالت أنا بهالبنت مبهوره -
وأنا كل م اكتب الكلمه تهل دمعه وتمحيها -
وأردد لعنبو ذاك الفقر وش جابه لنوره -
ترا كل الشرف ناله ف ذاك الصف كرسيها -
وشنطة عامها الماضي أم سيور مبتوره -
وتنورة إختها الكبرى وشيلتها وجوتيها -
وعبايتها بعد كانت بخيط اليد مقصوره -
نرى ضحكة عيون الناس ولا ندري بخافيها -
تبان بسمح المحيا مير النفس مكسوره -
من العفه ليا تقبل تحسب العز مكسيها -
وهو ف الواقع الجوهر يعاكس باطن الصوره -
إذا حط الفقر نابه وش اللي منه يحميها -
تعزي حالها بالصبر واهي تموت مقهوره -
سلام الله على نوره وسلام الله ع طاريها -
وسلام الله على وقت ن تعش بظل دستوره -
كذا كانت حكايتها ونقصني بس أسميها -
وعادة شاعر ن مثلي يهمه رأي جمهوره -
إذا جينا نعنونها !! قولوا !! وش نسميها ؟
بسيطه !! إفتحوا قوسين وحطوا (سالفة نوره).
