زفـّة رياض بفرحها واعـلن القلب برحيله
أعـلن القـلب برحـيله قـلب نـاسٍ طـيـّـبـين
كنـّني للحب فـارس للمـدى طـوّل صهيله
ولا زمـان ولا مكـان ولا حـنان ولا حنين
قمت اعاني حبّها واسري الدروب المستحيله
لاهو يوم ولا اْسبوع ولا شهور ولا سنين
أثـرها درب المحـبّه كلـّها صعـبه طـويـله
وان حسبت حسابها يطلع حسابي خطوتين
خطوه من روحي لـ (جدّه) أو قبل (جدّه) بليله
وخطوه لقـلبه قصاد .. ولا يسار ولا يمين
واطعم العشق بغرامه من هواها لسلسبيله
إلـ عـنيها إلـ كحـلها إلـ هـدبـها الـريّـضـين
شجرة الحسن الوحيده في جذوعٍ تنتمي له
أعشبت في قلب شاعر بامر ربّ العالمين
ما بقـي له إلاّ ياخـذ كل عـين وما بـقي له
إلا ياخـذ كل روح و كل قـلب و كل عين
أعـشقه ليلٍ تـلوّى ينـثـر ويطـوي جـديـله
أو أنا اعـشق أشقـرانه نازلات بخصلتـين
حتى في تحليل دمّي صار من نفس الفصيله
لان دمّه صار موجب صرت انا له موجبين
لا يحـرّك صبعه الاّ حـرّك العـالم تجي له
من يهـود ومن مسيح وكل ابو هالمسلمين
يا قصـيدي انثـني له واوقفي له وانثني له
واذكـريـه فْ كـل بيـتٍ أو كـلامٍ تـكـتـبـيـن
أكتبي بيتٍ في (لميا) واوقفي له وصفّقي
سمّعـيها ألف مرّه الـبيـت وانتي تصفـّـقـين
وانزلي له واطلعي له وانزلي له واطلعي له
خزّني صورة ملاكٍ لو هو من مايٍ وطين
هاتي ازهار المحـبّه وبطريـقه إنثـري له
واقطفي زهره لـ (لميا) توصل الها باليدين
خلـّك تخاطب هواها وانته تـخالط ظلـيله
وحـذريها من دروبٍ ضـيّـعـت هالعـاشقين
لا كثير الحب يرضي في هوانا ولا قليله
ولا جنون الحب ينفع في غرامه ولا رزين
وين حبّه انتهى بي ..؟ انتهى بيـومٍ وليله
لا زمـان ولا مكـان و لا حـنان ولا حـنيـن
وانا انادي وين وين القلب ضايع في رحيله
وما سمعت الا صدى صوتي يردّد وين وين
قبل لا افارق وانا اسمع مرّتين ياحبّني له
الله يا ما اصعـب مفـارق حـبّـني له مرّتـين
