~`•° مستودع أشواقي °•`~
مستودع أشواقي محمّل بالاشجان
من عقب ما جاد الحبيب بغيابه
بالله يا أهل الخير غالين واخوان
قلبي عشق له شخص ثمٍ غدابه
وش شوركم في حالتي كنها ادمان
وأخاف من هجره يجيني كآبه
واخاف في يومٍ يسبّب لي جنان
وتجيه حوبة مافعل في شبابه
وانا ماودي يلحقه شر لو كان
جاني حزن وجروح منه وصبابه
سيف العشق ينسل في كل ميدان
في داخل شعوري وقلبي رضا به
يارب وان كان الهوى منه ماحان
ليت النصيب أكون صاحب جنابه
ويقدّر الصحبه على ود وإحسان
ويتعب على درب الصداقه ركابه
وأنا لو إني فيه طامع وخوان
ما والله ازوّد رثاه وعتابه
لكن أنا عاشق ومغرم وهيمان
وده يداري قلب حبٍ رضا به
مستودع النسيان مقفول بيبان
ومستودع الاشواق مفتوح بابه
ويارب يامرسل لنا خير الاديان
إله نخشى يوم نرحل حسابه
ترزقني الجنه وعفوٍ وغفران
أنا وكل انسان شوقه عثا به
