لا لا تقول انه تصاريف الاقدار
لا لا تقول فراق الأحباب عاده
تكفي ترى تكفي روايات وأعذار
ومنك التغلي طال حبله زياده
إن كنت مخلص للهوى منت غدار
خل الضمير الحي يلحق مراده
ترى الشعور اللي بدا فيك ينهار
يقلب موازين الفرح للنكاده
لا تستغل ظروف شخص(ن) من النار
هاجر على شانك ضواحي بلاده
اللي مشى لجلك مسافات وديار
عليك كيف يهون تجرح فؤاده
تحولت ذيك السعادة للاكدار
ساد القلق جو المحبين ساده
يطال بالفرقا فلا عاد تحتار
ولا تشتكي غدر الزمن واضطهاده
هات الرسايل والصور هات الاشعار
هاك الرسايل والصور والقلاده
ما بي معي يبقى لك اليوم تذكار
من شان جرح البعد يسهل ضماده
والمسألة ما تحتمل كل ما صار
ومنك الزعل هذي نتايج حصاده
وعما جرا مكشف خفيات الأسرار
لو طالت الفرقا وطال امتداده
