1.
اليوم الاول
يرن هاتف والدي قرابة الخمس دقائق
والدي: ياربي من هالادمي كرهني حياتي من كثر مايدق
والدي الو هلا بوخالد يالله حيه وينك ياخوي لنا فترة مانسمع صوتك؟ ترى ماتدري بغلاتك
تمر الدقائق واللحظات ووالدي وابو خالد من سوالف لضحكات
ويغلق والدي سماعة الهاتف
والدي اووف اعوذبالله من هالادمي صدق انه ثقيل دم مابغى يسكر!!
الطفلة نظرات استغراب ؟!..!
اليوم الثاني
يشتغل التلفزيون على اعلى صوت اختي قدامه مجهزة الفشار والببسي تطفي الانوار عشان تركز في الفلم زين
يتكلم واحد من اخواني
اختي هشششش ياحمود الله ياخذك خلني اسمع و ش يقول البطل للبطلة
اختي شوي بتدخل في التلفزيون واللي يشوف جلستها قدامه يظن انها هي اللي منتجته
يتكلم البطل ويا البطلة على و شو ابطال مادري اللي يشوفهم يقول حرروا الاقصى
يحكي لها ظروفه وانه لازم يودعها
تبكي البطلة وتبكي اختي كان البطل ودعها هي .
خلص الفلم وخلصت اختي مناحتها
تغيرت القناة على صوت قارىء كل اللي حوله يبكون يبدا حمود يتكلم وتبدا اختي تسولف لصديقتها
عن اللي صار في الفلم وشو ماصار والقارىء مازال يبكي بخشوع اختي تقول لحمود
ياحمود قصر الصوت ماقدر اركز واجمع احداث القصة .!!
الطفلة نظرات استغراب ؟!!
اليوم الثالث
والدتي تحادث اغلى صديقاتها ام علي
امي هلا ام علي شخباركم وشخبار بوعلي والعيال؟ وشو اخبار شغالتكم وشو غداكم == الله يخلف على ام علي
الحمدلله بخير وابو سالم والعيال بخير
ماشاء الله ام محمد عندها اليوم عزيمة؟ لا لا كيف ما احضر هاذي عزايمها ماتتفوت اكيد سارة بتكون موجودة
. خلينا نستانس بسوالفها اهم شي بتكون عندها سالفة طلاق اميرة وسالفة غصون اللي سطرها زوجها
خلاص بعون الله الساعة سبع ونص بكون هناك اذا وصلتني عزيمتها
ادعي الله انها تتصل الله اللي بتدعي لك بقصر في الجنة .
تتصل ام محمد وتعزم امي وتروح امي للعزيمة واتوقع انها وصلت قبل الحريم كلهم
اليوم الرابع
يصل امي اتصال ياهلا وعليكم السلام ورحمة الله وبركاته يامرحبا ببدرية نحن بخير انتم و ش اخباركم؟
هاه؟ محاضرة دينية؟ امم والله ياوخيتي سامحيني مشغولة شوي على العموم جزاكم الرحمن كل خير
امي تنادي باعلى صوتها سمية سمية جهزي عباتي بروح لام علي تقول عندها حريم الحارة بنستانس شوي
الطفلة نظرات استغراب !
اليوم الخامس
تليفون اخوي يدق تالي الليل وسط الهدوء تسمعها اغنية تصم اذنك وتصحي اللي في سبات من ازعاجها
بخطى خفيفة وقفت جنب باب غرفته
غريبة يضحك وهو صاحي من النوم؟ مب عادته لانه باختصار نكدي
يكلم بنت؟ يمكن تكون اختي ام عثمان بس كيف تكون ام عثمان وهو يقولها اذا عرسنا؟؟
يسكر من مكالمته ويرجع لنومته
بعد ساعة
الله اكبر الله اكبر صوت اذان الفجر
يدق تليفون اخوي
اخوي والغضب يتطاير منه يامحمد تراك ازعجتنا خلاص بصلي الساعة ثمان قبل ماروح الكلية
الطفلة نظرات استغراب !
اليوم السادس
كل البيت قدام التلفزيون حتى الشغالة
صحن المكسرات كانه اضحية عيد من ايد لايد
تتكلم شغالتنا حسينة اووه مدام انتي يشوف هادا اهمد؟ سيم سيم اكو مال انا والله من الشلخ
امي مب فاضية او بالاحرى ماحد انتبه لصاروخها النووي لانهم ينتظرون يعرفون الفايز في اكاديمي عار
خلص البرنامج وطلعت خولة اختي مادري من وين اتوقع كانت في غرفتها مرابطة كانها حارس على ثكنة
بخطى متسارعة للصالة .
خولة كلها حماس سعيد سعيد بالله حط قناة المجد الحين يطلع المنجد
وطلع المنجد وخليت الصالة الا من خولة وبقايا مكسرات اهلي
خولة تنادي بالله تعالوا واستفيدوا
عشان يرد عليها سعيد ويقول نص المطاوعة نصابين
الطفلة نظرات استغراب ؟!!
اليوم السابع
صالح يحكي للوالدة
والله يا امي و ش تقولين وناسة وسوالف وفلة خالد اليوم صدق سوى حركة رهيبة
السيارة كانها لعبة وهي تطير تصدقين كان تحتها ثلاث سياكل وعدى من فوقهن!!؟؟؟
ولا سالم هو وصواريخه اللي نسف راسنا بها حتى شوفي نص شعري راح من صاروخ اطلقه
ارض جو يقول انه كان في الصحرا وفضت سيارته من البترول يفكر شو يسوي شو يسوي
فجاة وهو يفكر مرت طايرة من فوقه يقول بسرعة اطلع المسدس من صندوق السيارة واطلق على
خزان الطايرة ويلحق ورا الطايرة بالبرميل اللي عنده الين تعبى
الحين هو يحليله بما انه طيب فكر لو خلص البترول على المسافرين بيموتون
ويفكر كيف يسكر الفتحه كيف يسكرها
تذكر انه كان يمضغ علك ويحط العلك في طرف المسدس ويطلقه على المكان اللي فتحه في الخزان
ويتسكر .
وتضحك امي ويضحك صالح .
تساله امي صالح شخبار صاحبك حسن من زمان ماسمعنا عنه
صالح يفكر شوي اووه لاتذكريني يا امي هالولد صدق طفربي .
كل سوالفه تضيق الصدر مايتكلم الا عن الموت وعذاب القبر
وكل ما اروح اغازل مايقول الا اسطوانته المشروخة ياصالح دقه بدقه وان زدت لزاد السقا
واذا بيسولف وبيضحك مانقدر نسولف عن احد او نحش فيه صدق انه ممل
الطفلة نظرات استغراب ؟!!
كثيرا ماتمر علينا مثل هذه المواقف وكثيرا مانقف موقف هذه الطفلة
صامتون او كما يقال خشب مسندة .
اين قوله تعالى والمؤمنون والمؤمنات بعضهم اولياء بعض يامرون بالمعروف وينهون عن المنكر ويقيمون الصلاة ويؤتون الزكاة ويطيعون الله ورسوله اولئك سيرحمهم الله ان الله عزيز حكيم
واذكركم واذكر نفسي بقوله صلى الله عليه وسلم
مروا بالمعروف وانهوا عن المنكر قبل ان تدعوا فلا يستجاب لكم
