محتاجك أكثر من قبل ياليت يالقلب العطوف
تقبل وتشعل بالحكي ذيك الليال البارده
ماقصدي والله بزعجك إلين حدتني ظروف
تعال وغير ماتبي بافكار كانت وارده
تخيل إني من كثر ماهيم بافكاري واطوف
مسحت خاتم بصبعي واقول يظهر مارده
وتصدق انك لو تجي هالحين ياعذب الوصوف
تلقاني في موت الأمل يفصلني عنه يارده
إما تجمعني فرح وألا ترى بكره تشوف
عقلي ولو مابه خلل حوض الجنون بيارده
تاهت مشاويري معك وازريت عن لمس الكفوف
وقلبي على كثر البشر مدري وش اللي قارده
مرات أحس إنك معه لاقلتها باربع حروف
ومرات أحس انه معك يقعد وكنك طارده
كتبت في طيفك غزل لا يابعد كل الطيوف
يمكن يجمل موقفي شعر(ن) على اذنك سارده
مايستوي تبخل علي ياخوي ماضاع امعروف
الناس ماتاوي لاحد وانا عيوني شارده
