. . . . ( أنا صعب و اهوىَ صعب)!
؛
بالله يا بايع حطب
تعال و احطب قلبيه كود
وان حدّكم موسم رطب
الصيف بي سوّى وفود
كم ارتقبته ما رقب
سمته فهمته م الصدود
عيني شرى عين المضب
تدفق ب همّه و الجحود
شلال بي عذب المصب
حرّك سكوني و الركود
عقب الغلا و حبٍ يصب
في داخله مالي حدود
مدري حقيقه او نصب
انزل عقب ذاك الصعود
يا ناس ما هو بالغصب
لمحب لمحبه يعود
كم كم غيري قد نصب
فخٍ على چذب الوعود
و انا فوادي له نصب
تمثال مع برق و رعود
انا صعب و اهوى صعب
و الكل عا طبعي شهود
قلبي رغيب و مرتغب
بين الوعي و اللا وجود
مرّات احبه و احتجب
و مرّات يجتلني البرود
و امرار اغفى و ارتجب
ان طيفه ابعيني يسود
شوّال عدّا مع رجب
و شهور عدّت بي شرود
ي الله يا رب العجب
يا عالم ابقلبٍ ودود
تجعل للقيانا سبب
و الحظ لو مرّه يجود
مالي ترى غيره محب
ولا له شراتي فالوجود
في لوح محفوظ انكتب
ما يمسحه غزو اليهود
ختمي و تبّي تبّهم تب
تبّت يدا عين الحسود
.
للشاعرة : فطيم الحرز
