لا تخلي بيني وبينك من الجفوى مسافه
يسعد صباحكم / مساكم
هلا بالجميع ..
لقاء آخر متجدد يجمعنا احبتي واتمنى ماراق لي يروق لكم ...
لا انثنى ليل المشاعر واتعب الملتاع قافه
فوق مرقاب الشعور اللي احاسيسي تهبّه
تنبري لي مهرة الاحساس وكفوف العسافه
(حس شاعر ) تحطبه دنياه واللهفه تشّبه
القصيد احساس واللي دون ما احساس آفه
شعر لكن لو يسمى ( شعر ) محد(ن) يستحبه
والحلا فالمرء ما يسمو على قمة عفافه
و ( عفة الانسان ) جذابه وهذا آهم سبه
يا مسوي في حياتي من بعد شفتك ( إضافه )
يا ملبسني (( غلاك )) من الجفا والبعد جبّه
هاتني لا !! ودني لك وأخذني لابعد مسافه
وأبحر بقلب(ن) يحبك مووت وأحذر كل غبه
واسقني ماء الغرام اللي على جالك ضفافه
والوعــــــد يا نور عيـــــــــــــني بين مجــــــــــــراه ومصبــــّــه
يا عيون الظبي كانه ما على نفسك كلافه
نظرة عيونك عذاب وصاحبك حظه لعب به
(المياعه) و(العذوبه) و(العياره) و(الطرافه)
تجتمع فيك وتفرق في مساءات الاحبه
في شفاتك لذة المنجا ونكهات الجوافه
وخدك اللي كنه ( كتلة ثلج) شفي مِنه حٌبه
ويوم غبت بدون سبه لجل حكي وما خلافه
قمت اناظر في عيون الناس لا كني مشّبه
والزمن ماهو بري من ظلم وقته وجفافه
قاسي وقاسي كثير ونبّه اللي ما تنبّه
ليه تبعد عن عيوني يا عيوني يا حسافه
جرح قلبي من غلاتك من سواك يعرف طبّه
لا تخلي بيني وبينك من الجفوى مسافه
ودامني مديت ( فنجال المحبه ) لا تكبّه
ودي بوصلك وهجرك صرت اكرهه واخافه
وجعل ما ياتي لهجرك بعد ذا اللي صار سبه
لا تخلي صاحبك يمشي والى من حد شافه
قال يا عزي لحاله والله ان عاده يحبــــــــــه
طابت صباحاتكم ...
اخوكم / رايق البال
