يا ربي تسهل الامر وتزين الاحوال
ترانا بلا رحمتك هلكا ومتهاوين
ولا عندنا غيرك ليا صك جالٍ جال
ضعوف الاوادم يا قوي فيك متقوين
ابي رحمتك حي وفي القبر والاهوال
نهار الحساب مشيب الرضع الولدين
لنا حقوق وعلينا حقوق وما حط يشال
زمان يخلي ضاحكينه من الباكين
ما ينزل به الراحل ويرحل به النزال
ومواعيدنا واجالنا كل شي بحين
فياحظ من طابت فعايله والاعمال
ويا شين حظ اللي لا وحده ولا ثنتين
هبوب الزمان وكنته والبراد اشكال
تقلب به الدنيا واهلها على الجنبين
ولا أشد على الصاحيين من كثرة الجهال
ولا اشد على الجهال من سطوة الصاحيين
عسى الله يصيب مدور الشر بالسلال
وعسانا لا ظلام ولا حن بمظلومين
ولا نطرد المقفي ولا نكره الاقبال
ولا نخطي اليا صار ما نقبل المخطين
لو انهم تناسوا فعلنا مانقص مثقال
من اللي تناسوا جعلهم دايمٍ ناسيين
ولا تذكرونا غير في حزة الانكال
ليا اشتدت الازمة وخالط صفا الماء طين
نطب الخطر الموت والخوف طب هبال
تقول اننا بمقابل الموت مسترين
بنفنى وتفنى عيالنا بس لا نزال
عزاز النفوس اللي على حقنا عيين
على الراس طاقية ومن فوقها دسمال
ومن فوق دسمالي عقالٍ يميل يمين
ولو ما تحوش ايماننا مال مانهتال
لو الوقت عاري وجه عشناه مستورين
ابو خمسة لاقل من قيمة ابو ريال
فبو نصف يقدر يقتل احلام ابو قرشين
ما يوجعك يالسائل سوا جفوة السؤال
ليا صرت تقضي دين ظهرك بمثله دين
ولا فيه بيتٍ سالمٍ من بعض الاشكال
وهدامته قله وبنايته كثرين
لنا ماضي وحاضر ما نبكي على الاطلال
مايبكي على الاطلال ياكود محرومين
لهم ماضيٍ حلوى لكن حاضرٍ بطال
وذولا عرب موتى ولو عادهم حيين
تقل العوايد يوم تتعاقب الاجيال
وسلوم الرجال الاوله تتعب التاليين
ولو نذكر اللي راح يا ويل حال وال
بعد روحوا شيباننا الزحل الوافيين
موصيننا بالصدق في القول والافعال
وفي جمعة تهتاب من قوها الطامعين
غدينا شتات وحن عيالٍ على رجال
رخصنا والاجناب اصبحوا عندنا غالين
نحب الجمل والحمل ونعذرب الجمال
وهو اللي يقود الزمل من وين اليا وين
من اول يوم القل والمال ما ينطال
قبل شركة الكهرب تنور بيوت الطين
يوم ان الرفيق اغلى من الروح والمنزال
ويوم ان الرفيق ان غاب نفقده فقدٍ شين
وذلحين الاخ يقاطع اخوه حيل وحال
ولا حسته الايام ولا غراب البين
اخوي ابن عمي ان كان ما يردع العيال
اليا عال فيني رحت به في ( سند الاثنين )
ابيعه كذا واشرب ورى بيعته فنجال
وانا دون عمري قبل يولد الى ذلحين
جروح العرب تبرى وجرح الاخو قتال
وجرح العرب واحد وجرح الاخو جرحين
ولو يبتلى والله ما آخليه لين يهال
علي القبر ولا أنتصف له من الغاوين
يقولون جيبك اكبر اخوانك العقال
وانا اقول وقفة الاخ تسوى كنـوز الصين
عطاني الزمن كل شي الا مره واطفال
عسى الله يكمل زينتي في الحياة امين
لا تحزن ولا تزعل تماسك وهد البال
ترى العاقل اللي يحسب حساب وقته زين
ورفيقك تحمل له ثلاث لاشك ثقال
لكن رابعته افطن لها واخذ حق ودين
والاولاد وهبه .. لا عمامٍ ولا بخوال
عسى الله يصلح ما عطانا من الجنسين
ياكم بنت هامل جا ولدها بطل الابطال
وكم بنت شيخٍ جا ولدها قصير ايدين
زكاة العوال معاكستها زكاة المال
لا طاب لك واحد فادفن عوالك الباقيين
