ايه وافي .. ماانتظر رد البخيل
من روائع الشاعر / زياد بن فهد
يالليالي البارده صبري طويل
. . . لو يجرّحني هبوبك ما أميل
لو أحس فـ ليلتي برد الجفا ..
. . . . يشتعل من جمرة الخافق فتيل
يوقد ضلوعي على ذكرى الهوى
.واتدفّى .. دون حضن .. ولا خليل
واحكي الماضي القديم لوحدتي
. . اتسلّى .. عل دمعي ما يسيل !
وارسم البسمه على شفاه الضما
. . . وارتشف من صافي الفقد القليل
يالليالي وش بلا جورك علي !
. . . دوري عن غصني الناحل بديل
لا العطش يبس عروقي والوفا
. . ولا رياحك هزت اطراف الشليل
لو سهرت الليل .. في صدري سنا!
وما بقى تحت الجفن .. ظل وظليل !
ايه راضي .. والرضا ما ضرّني
. . . ايه وافي .. ماانتظر رد البخيل
شح خلي بالوفا .. ذي عادته !
. . . واعطت أيامي من الهم الثقيل
وباب صدري وان فتحته للهوى
. . . .رده الحزن وبقى فيني نزيل
يالليالي .. وش بقى لي؟ وش بقى!
. يا عسى الله .. يعوض الصبر الجميل !
