لو غفت عين السعاده ما غفت عيـن الكآبـه ..
ما روت الأحلام والواقـع يوردهـا سرابـه
.................... مثلها قلبي ضمـا و أفـراح عمـره ما شربهـا
السعيد اللي يعيش الوقت ما يشكـي مصابـه
....................... و التعيس اللي ملامح ضحكته وقتـه سلبهـا
الصبر جسر الأماني والهـوى كلٍ شقابـه
.............. وكل عاشـق تضحياتـه بالمحبـه يحتسبهـا
هذا انا لاجيت اسولف للحمامه عـن غيابـه
.................... تسجع بصوت حزين ويغرق عيونـي طربهـا
عاشقٍ من طعنة ظروفه سـرا ينقـل صوابـه
...................... ما درى وين الطريق ومجمـل همومـه تعبهـا
كم سؤالٍ مات في صدره ولا عـزا جوابـه
.......................... ونار قلبه كل ما تطفي من ضلوعـه حطبهـا !
يسئله نور القمر في كل ليلـه عـن عذابـه؟
..................عن ضياعه عن جروحه عن دموعه وش سببها !!
لو غفت عين السعاده ما غفت عيـن الكآبـه
....................... شمس عمره مشرقه لكن لـه حظٍ حجبهـا
في هجيره تشتكي رحلة ايابـه عـن ذهابـه
................... وفي دروبه تشتكي خطواته اللـي ما حسبهـا
يستبيح الشوق قلبه وإن بدا به ما انتهـى بـه
.................. مل من طول الغياب ومل أحاسيـسٍ كتبهـا
يستعيد الذكريـات الماضيـه شعـر وكتابـه
...................... والسنين تدور والأحلام يلحقنـا عتبهـا !!
