عرض للطباعة
أجمل الصباحات
البارحة كان يوم شوي مرهق
بعد رجعتي من الدوام جلست شوي مع الاولاد وعقب المغرب بدينا حل واجبات ومذاكرة
حاولت اخلص بدري لاني كنت تعبانة وابا انام
وطبعا كالعادة الامير والخالدي مشغولين بحل الواجبات وحمودي يغافلهم ويلون الكتب ويشخبط فيهن
الامير هذا شبيهي شكلا ماخذ كل ملامحي ..وهو اكثر واحد متعلق فيني مع انه اكبرهم
وعاد قمت اجيب للحمدي سبوره وقلم سبورة واشغله عن اخوانه
وما مقصر حمود..مخلي طوف البيت كلهن شخبطة
عاد من خلصنا واجبات وعشا دخلتهم انيمهم ...(هههههههههههههههههههه جاتني ضحكة كلما اتخيل اشكالهم)
بالبيت اغلب الوقت شعري ملفوف ومرفوع لان اكره حاجة عندي ان شعري يحك برقبتي
ففليته و جدلته جديلة واولادي يشوفوني وانا ما مركزة بعدين شفتهم يضحكون وكأنهم يشوفوني لاول مرة
يقولولي اماه شعرك حلوو
(مامتعودين يشوفوني بشعر مفرود )
جاء الشبيه وقام يتلمس شعري ويضحك من الخاطر وعقب خلود نفس الشي وكانهم شايفين شي غريب
والله اني ضحكت من الخاطر على شكلهم
فقررت افرفش معهم ..مسكت الشعر وفليته من تحت ومسكت اطرافه وقمت ادغدغهم به وهم يضحكون من الخاطر
بعدها يقولي الامير
ماما سويه اثنين (عبارة عقصين)
(انا على اخر عمري اصير ارجوزة لهالفريخات )
قتلهم زين..قسمته نصين وجدلته وقاموا يضحكون زيادة
ويتلمسونه ويشوفون السفه
رحت عنهم ابصلي قال خالد ماماه سويهن سلاسه(ثلاثة)
قلت احسن اروح اصلي ولا الجلسة معكم ما بتخلص
شردت عنهم وهم يتنظروا
رجعت لقيتهم رقود
باقي حمود ينتظرني
اللهم اميناقتباس:
الله يحفظهم لك ويبارك فيهم ويقرعينك بصلاحهم يسعدكم ربي ويجزاك خير على تربيتهم وتونيسهم
ولكم مثل ذلك
من اجمل إضاءات السعادة هي التى تأتي على شكل دعوات غيبية
تبعثها تلك القلوب الدافئة ..تبث فينا الفرح والغبطة لروعة ما تحمله لنا
أسال الله لهم سعادة دائمة مديدة وتوفيق ورضا
شكرا من القلب
هذي ام محمد اقدم صديقاتي واعزهن من ايام المدرسه
كنا ربيعات من صف خامس ابتدائي ولما كنا بصف سادس نقلوهم بمدرسه جديدة قيد الانشاء وافترقنا سنه بس ظلينا نتواصل بالرسايل
وصف اول اعدادي رجعوهم مدرستنا لحد ما يكتملن صفوف المرحله الاعدادية ..وصف ثاني اعدادي وثالث اعدادي رجعوهم مدرستهم
وعاد ما التقينا الا بالثانوية ..وعلى الرغم انه ما كنا بصف واحد بس كنا الفسحة نكون مع بعض
هي راحت علمي وانا ادبي
كانت صفوفنا بصوب وهم صوب الثاني
كان العلمي قسم مجتهد مايطلعن الفسحة ..يقعدن يحضرن ويراجعن
وبأخر سنه حصلتها اول يوم وعقب ما شفتها لبر
سألت عنها قالولي طلعت من المدرسة وبتتزوج
وهذاك كان اخر يوم اشوف فيه صديقتي العزيزة
ومرت الايام وقامت تواصلني على رقم البيت وبعدها فقدت رقمها وانقطع التواصل بينا
انا دشيت التقنية وتعرفت على بنات جدد..وكان الي يربطنا الباص الي يشلنا ويرجعنا
ولازلنا نتواصل لحد اليوم ..كلنا تزوجنا وجبنا اولاد ونصنا توظف ..بس زياراتنا ما منقطعه ابدا
مرة كنا نسولف..جات وحدة من الشلة وقالت فلانه تسلم عليك وتريد رقمك وانا قلت استأذنك..استغربت ..وين تعرفينها
قالت ام محمد تصير زوجة ولد عموتي وماكنت اعرف انكن صديقات ..امس اسولف معها وجبت طاريك وما صدقت اني اعرفك
المهم من هذاك اليوم وانا وأم محمد متواصلين وناخذ اخبار بعض
هالانسانة احبها حب في الله اكثر ما احب نفسي
بمجرد ما اكلمها احس براحة معها
للعلم اخر مرة شايفة أم محمد 2001يعني تقدروا تقولوا بندش على 17سنة تو
وانا أعرفها من سنه 1995
والى اليوم انا وياها كأننا نتلاقى كل يوم (مع انه ما شفنا بعض من 17سنة)
سوالف وضحك ورسائل بالهبل
احس نفسي محظوظة بهالصديقة ويارب لا تفرق علينا
مااعتقد حد عنده مثل الكنز الي عندي
الصديق اخو ما جابته الام
هي العلاقة الي نختارها ونحترم تواصلها ونسوي المستحيل عشان نحافظ عليها
احنا ما نختار اهلنا ولا وضعنا الاجتماعي بس نملك الخيار فاصدقائنا
ونملك القرار ابالاستمرارية او لا
الله يخلي لي رفيقة دربي ام محمد ويحفظ لها عيالها وحبايبها