^-^ شعورٌ يلامس نبضي °~° ®

دعواتكم عندي اختبار اليوم مشتاقة اسولف هنا عندي واجد كلام بصراحة بس ربي كريم

هلا وغلا بمتابعيني عدت لكم من جديد ...
المهم وصلوا بنات جدد مع عوائلهم وصارت مواقف تضحك هههه بخبركم يوم أفضى المهم موكلة اداور بيهم وكذا حماس نعم العوائل تحس بالانتماء معهم أرتاح اسولف معهم أكثر من التلاميذ نفسهم سبحان الله

المهم ياخي مره طلعنا من الإختبار وفي شطر من مسألة ما عرفته فجلست اراجعه من بعد ما طلعت المهم جاني دحدوح وسألني وعاد جاوبت وخبرني كيف المفروض الحل وطبعا أنا حالتنه غلط وجلسوا يراجعوا عاد واجاء كل مرة واحد يسألني من الكلاس المهم طلع أصلا اختبارنا مختلف في اسأله مختلفة ...بعدين جاء العماني الثالث لان الثاني كان مع الجماعة يراجعوا وجلس يراجع معي وكله صح مثلي المهم دحدوح ما قدر يسكت ضحك علي يحب كذا ينرفز خلق الله راح يخبر زميلي أوين ضي دلوعه جالسة تصيح عشان مسأله وانا أهديها وهي مره دلوعه كيف ههه ... كان أقول متى ذا إن شاء الله استوى ؟؟ ما أذكر قال ما تذكر عاد دلع بنات ..صح كله حالتنه وتصيح على شطر واحد من مسألة مكونه من 7 اشطر عليها نص درجة هههه .. قلت له ياخي دحدوح لا تكذب ما زين يصدقوا قال مو نسوي بنات دلوعات حالهن حال مصطفى ولد المصرية هههه يتسخف أحيانا هالرجال أقوله أكبر منك احترمني قال محترمنك بس امزح معك ..قلت له إلا ما تحترمني بعد أعلم عليك أبوي هع وزين بعد طلع لك أسلوب محترم ههههه ضحك

قبل أمس كان في عزومة للبنات عشان يتعرفون علينا البنات الجدد ونشوف وضعهم المهم كان ربشة شوي الوضع .. وصارت سالفة بخبركم إياها في بنت جديدة كله رافعة ضغط البات تضحك تحب تقلد الضحكات وما عرفت تقلدني تقلد الضحكات الغريبة بس ههههه .. وجالسين نتناقش مع بعضنا لأن كنا نريد نطلب بيتزا فأسأل اذا الدجاج حلال واللحم لان في دجاج حلال بس لحم نادر ما يكون حلال فقالوا البنات إنه حلال الدجاج واللحم ..عاد هالبنت الجديدة على مووود تتسمج كانت تقول وشو دراكم إن الدجاج حلال بلاد كفار ما بتكون مسلمة " اونها تقصد الدجاجه ديانتها كريستين (مسيحيه) كان سمعتم بالعجبه هههههه " عاد انا جاهزة اقصف جبهتها اقولها زين ما تلبس صليب شكلهن كل يوم أحد الدجاج يروحن يصلين الكنيسة لاه؟؟ هههه ترا الحيونات مسلمة يا الذكية قالت دجاجهم ما مسلم مسيحي قالت حتى ما تعرفي شو يعني حلال كيف جيتي بعثة انتي أكيد مهربه ههههه ؟؟ قالت قصفتيلي جبهتي ياخي ضي ..قلت لها ما يخالف تستفيدي ترا يقصد بالحلال طريقة الذبح يا الشاطرة مالهم دخل الدجاج بالديانة الموجودة بالدولة هههه

زمان عنكم ترا ما فضيت انشغلت مع بنات الجدد وعلى الفعاليات الي بنسويهن وعلى سفر صحباتي وضع مضغوط في بعضه بس الامور طيبة وربي يسهل ما مداني حتى اذاكر صح ... انتم كيفكم جماعة شكرا لمتابعتكم

كل عام النبض يزداد بحب عمان وقائدها ... مبروك لنا ولكم شعب قابوس الوفي اليوم الوطني 45 ... 18/11/2015

ضايق(ن) صدري ولا هو الضيق من عوايدنا .. سرينا يا قلبي ما من الحق ينغصب أحد علينا ..


وسلامتكم

السماء في كل يوم تتصارع فيها الغيوم تلك الغيوم المكبلة بالامطار وكأنها تذرف الدموع على أرض قاحلة من المشاعر والأحاسيس .. أرض غافله عن النعم الإلهية عن وجود الرب وعن وجود رحمته وعن قوة عذابه

دعواتكم اعزائي من يمر هنا أو يفتح بالغلط ويشوف هذي المشاركة يدعيلي بالشفاء ..
امر بوعكة صحية الزمتني الفراش �� أريد أحد يكون جنبي وربي كريم مدام الله معي بيساعدني ..

اللهم اجعل البلاء في بدني ولا تجعله في ديني يا رب

هل تكتفي الكلمات في التفريج عني .. ألم يعشقني الحبر يومًا ما ؟! .. ألم أرسم البسمة في قلوب المارين .. فما جزاء الإحسان؟
الهجران !!!
وحيدة لا اسمع حتى همس من وراء الباب
الكل مشغول ربما إن شاءت الأقدار ومت لن يعلم بموتي أحد ...