https://up.omaniaa.co/do.php?img=9284
متى كنت ارسم اصلا هههه
"من الماضي"
عرض للطباعة
https://up.omaniaa.co/do.php?img=9284
متى كنت ارسم اصلا هههه
"من الماضي"
اقتباس:
المشاركة الأصلية كتبت بواسطة وفاء العبري
هههههه لو كنتي ترسمي وحدك راح تكوني ممتازه مثلي
يطلع الابداع
يمكن معك مواهب دفينه
الخميس انقص ظفري مع جزء من لحم الصبع "ما اول مره"
الجمعه استراحه
السبت كدمه ف اصبعي ف يدي اليمين "اصابات محترفين"
والمساء جرحين ف كل رجل "السبب سر"
اليوم حرق ف اصبعي ف يدي اليسار "من الظهر للحين احس فوادي منعصر"
الله يستر من اللي جاي
الله يسلمكم فيه واحد ضافني ف الانست
المهم لما قبلت اضافته خطف ع كل البنات المضافات معي
وما بس اكتفى كذا ، فضحني عند العرب والقبايل "هع"
الذكي راسل لهن كلهن
يوم الجمعه الصباح كل مره وحده تسال من هذا ومن هذا ..!
انا ما اعرفه ، قبلت اضافته لانه حسابي ف الانست ما فيه شي خاص يعني
بس لانه هن شافن انه يتابعني انا من اللسته اللي معهن ف ع بالهن انه يعرفني
المهم عذب صديقتي واختها اهتلكن منه
سون له بلوك والرجال بعده مصر عليهن ،،
انا طبعا سويت له بلوك عشان يصير لي انفولو من عنده
الحين الرجال راسل لاخت ربيعتي سوي جروب انتي وخواتك ودخولني معكم هههه
اللي استحووو ماتو ،،
والغم انه عارض صوره ، يعني فيه ناس كثيره تعرفه
وين يودي وجهه اذا وحده فضحته ،،!
مساء جميل
مساء بعد غياب عن المدونه الجميله
امس كنت طالعه تسوق المهم كنت باغيه غرض ورجال واقف مقابل الرف متكي ع الترولي وتركيزه ع الفون
كنت بقوله لو سمحت بس اخرت وحشرت نفسي من حس حد قريب منه تحرك
خلصت ماخذه اللي اريده وتلاقينا عند الكاشيير
هو ف الكاونتر اللي جنبي
وخلفه 2 وافدين
لما بدا يحط اغراضه ويتقدم اللي خلفه تقدمو
وفجاه صرخ عليهم انه لازم تحط مسافه مترين ولا تخاف ولا تستعجل بعدهم ما راح يقفلو وغير من الكلام العامي اللي له داعي واللي ماله داعي ولا يتناسب مع الموضوع
والله انا انحرجت بشكل ما طبيعي
والكل يشوف عليه ولو كان كلامه صحيح فيه اسلوب ما لانه وافد يتكلم معه بهالاسلوب
الوافد بعد انسان ويخاف ع نفسه
الوافد من الاحراج راح الكاونتر اللي جنبه وهو لما حس كل الانظار عليه قال اختي اليوم متوفيه من كورونا يبرر لنفسه
بس لما تركز ع المشتريات اللي ماخذها ما راح تلاقي انها اشياء ضروريه والواحد ما يعيش بدونها
اذا خايف ع نفسك لا تخالط الناس واجلس ف بيتك
بس الاحترام مطلوب ف كل الحالات
لو كان اللي بعده مواطن ما راح يفترسه ويكلمه بهذاك الاسلوب
طبعا الوضع عندنا له اسبوعين شوي مخربط
اخوي انصاب بكورونا والحمد لله ، كمل اسبوعين وصحته منيحه نشكر الله
اول ثلاث ايام كانت فيه حمى ، وبعدها تحسن وضعه ، هو طبعا اول ما حس باعراض راح العياده وحجر نفسه
واليوم الثاني راح يسوي الفحص وطلع مصاب
زوجته بعد ما تحسن هو هي حست بالاعراض ، وطبيعي بدون فحص 90% مصابه لانها معه بنفس المكان
امورنا كلنا ف البيت الحمدلله تمام ، بعد اسبوع امي صابتها حمى ، واللي احتقان واللي غيره ولكن الحمدلله ع كل حال
عاد ختامها امس لما سمعت انه عمي مسوي حادث
وله اربعه ايام من صار له الحادث ، حقيقي كورونا خلانا ما نعرف اخبار احد ولا ندري وش صاير بالعالم ،،
https://up.omaniaa.co/do.php?img=9519
https://up.omaniaa.co/do.php?img=9520
بنت عمي معها العيد
امس كانت ترسل صور قديمه لنا ف الجروب
شي صور لهن اكثر من خمس سنوات وشي لهن قرابه العشر واكثر
بس حقيقي الاشكال تضحك
الحمد لله لي صورتين بس وحده كنت بالابتدائي والثانيه كنت كبيره خلاص
بس الضحيه بنات عمي صور مش ممكن حتى ما نعرف كيف وصلن لها
وصلني خبر موت اكزافي ف الواتس قبل لا اشوفه ف السبله
وصلني باسمه الحقيقي طبعا
اول شي ما كنت مصدقه توقعت انها مزحه بس لما شفت الخبر ف السبله بديت اتأكد
بعدها شفته ف تويتر تأكدت 200/200
الله يرحمه ويغفر له
كنا نتصادف زمان كثير ف دردشه السبله كان مسالم ولحاله
الله يصبر اهله ع فراقه
الم الاسنان قصه لا تنتهي معي
طبعا امس بالليل الم ووجع وتميت مواصله طول الليل ما نمت ، انتظر متى يصبح الصباح
س 8 انا قدام العياده ، ماشي عياده ما رحت لها وكلهم يفتحو س 9
المهم ع الساعه تسع انا عند مستشفى النهضه
اول موقف عند مدخل المستشفى ، حارس الامن قال لاختي لا تدخلي ، اللي عنده موعد هو فقط اللي يدخل
دخلت انا واختي تبعتني من مدخل الطواري
دخلت قسم الجراحه وانا افتح ملف تسالني المضمده
عمرك اقل من 20 استغربت قلت لها لا ، قالت عيل ما يحتاج مرافق
انا واختي شوي ونموت من الضحك
دخلت بعدها عند الدكتور اللي شالع لي قبل
وكان معه دكتور ثاني ، ف يسالني ما رحتي المركز الصحي قلت له لا
رحت كذا عياده وكلهم يفتحو س تسع
ف قالي انتي واصله هنا تسع وربع يعني لو منتظره بس شكلك جايه تشوفي دكتور فلان ،،، صدمني حقيقي حتى الدكتور سكت ما تكلم ، يقولي عندك التهاب ويحتاج علاج عصب
اذا تريدي اشلعه بشلعه لك
قلت له لا ابوي بروح عياده احسن وشرده
الف قصف جبهه حصلت
يارب رحمتك
توفى اليوم س 8 المساء خال امي ، الله يرحمه ويغفر له
خالتي وامي حاالتهن النفسيه متعبه
سبحان الله الصباح ونحن رايحيين العياده اختي كانت تتكلم وتقول احاتيه والله يشفيه
وبعد اذان العشاء امي راحت تصلي ع طول
وهو كان يتصل فيها ، سبحان الله بين اتصاله ووفاته اقل من ساعه
ما لحقت حتى ترد تتصل عليه
طبعا اندفن بدون لا يشوفوه
لانه حظر وقالو اللي مسموح فقط اولاده "قرابه من الدرجه الاولى"
وهو ما عنده اولاد ف راح خالي والحريم ما مسموح لهن
استغرب لما نكون طالعين ونصور بالغلط ف سناب
ايوا بالغلط لانه الكل يسال وين رايحين !
وليش ما قلتو لنا
بنروح معكم ، بنلاقيكم
عفوا يا الطيبين لو باغينكم تروحو معنا خبرناكم من قبل ..!
خال امي قصصي معه من الطفوله ما تنتهي
يمكن كان يحبني اكثر وحده من اخواتي ، لانه دوم يقول امي كانت تحبك وانا حبيتك من حب امي لك
امه اللي هي جدة امي الله يرحمها ما اذكرها كثير متوفيه من لما كنت انا بعمر خمس سنوات اتوقع
لاني كنت لاعيه الحرمه حبتني ههه
بس حقيقي انا لما كنت صغيره كنت كيوت صراحه
سوالف مع خجل هههههه
يعني مستحيل اكون ربشه وجنون مع ناس غرب
كنت بريئه بس احب السوالف
وخال امي ما كان عنده اولاد
ف كان كل ما يجي يقول حال امي كيف جاهزه "الشغنه"
يعني اللي فيها ملابسي وكنت اصيح لاني ما اريد اروح معه
يحملني واتذكر كنت ارفسه وهو ماسكني
لحد ما كبرت وهو ع نفس الحال دوم يقولي خلا معي
ع كثر ما كنت اصده بس كان يحبني
كبرنا و دايما المسكين كنا نضحك عليه
وعلى كثر ما كنا نضحك عليه عمره المسكين ما زعل او خذ بخاطره
بالعكس يتقبل كل شي ويمزح معنا
وكل يوم يجي يزورنا
يتصل بأمي ف اليوم اكثر من مرتين
وس 8 المساء لازم يتصل
لما انصبنا بكورونا امي قالت له خالي لا تجي هالايام لانه هو كان مريض سكر وخايفه عليه لا ينصاب
وسبحان الله اليوم اللي توفى فيه يتصل فيها قبل لا يوصلها خبر وفاته بخمس دقائق
اتصل وهي كانت تصلي ما لحقت ترد عليه
لما اختي راحت لها وقالت لها خالي توفى انصدمت
تقول هو يتصل س 8 محد غيره واليوم اتصل قبل 8 كيف توفى من شوي متصل
وجعني قلبي ع فراقه
وجعني قلبي اكثر لما امي كانت تبكي
تقول كيف يندفن وانا ما شفته
لانه كان فيه حظر س 8
تقول هذا ما خالي بس هذا ابوي الثاني
مات ابوي الثاني ما بقالي احد
حتى ابوي كان يبكي
زوج خالتي يبكي
كل احد يبكي ع فراقه
رجال ما توقعت اشوف دموعهم ، شفت دموعهم بموته
مساء الجو الجميل الماطر
من الفرحه بالمطر
طاح تلفوني مسكين وانشق راسه
احيانا اكون فاصله حقيقي
واسأل عن اشياء غريبه عجيبه
والمصيبه لما اللي اسأل عنه صحيح والكل يسأل انتي كيف عرفتي
والله مخي كان فاضي واخترع سالفه وطلعت حقيقيه وش اسوي
ومستغربه من شي حقيقه
ليش مسابقات الانست لازم تسوي منشن ..!!!
يعني لازم كل عمان تعرف انك مشارك ف مسابقه
وفوق كذا ما تفوز
وما بس كذا ، تفتح الانست يوصلن لك منشنات ما تعرفهن من عند من
كذا الشعب بس يمنشن
يعني ما اعرف كيف مسمينها مسابقه وهي عباره عن منشن بس..!
صباح الخير بتوقيتي،
وحان وقت النوم بتوقيتي بعد ،!
جدي ابو ابوي متوفي من قبل لا انولد تقريبا بست سنوات
وابو امي متوفي من 2015
تسألوني عنهم الحين ليش؟!
https://up.omaniaa.co/do.php?img=9867
مساء لذيذ بطعم االصوص الحار ،،!
https://up.omaniaa.co/do.php?img=9895
شو بيشبهك تشرين
https://up.omaniaa.co/do.php?img=9948
فيه احلى من هيك اجواء
مطر ، وتساقط اوراق شجر ، ونسمات بارده
كم كان جميلا لو ينتهي اليوم بكلمة جميله
لي فترة ، افكر بنفس الموضوع
اتخذ قرار وبعدها العن بليس
بس شكله خلاص ماشي رجعه ، بقص شعري وانتهى:37:
https://up.omaniaa.co/do.php?img=10005
لما اختي العزيزة "قهر"
تتذكر اخر الوقت انها تحتاج احد يرجعها من الدوام
اروح لها وانا "انود"
والله ما اعرف كيف وصلت لها بسلام لانه اكثر من مره تغمض عيوني بالدرب
واللي يقهر اكثر من قبل لا اوصل لها قلت لها واصله
انا وصلت وبعدها "زرعتني"
صباح جميل
https://up.omaniaa.co/do.php?img=10047
متخيلين ان هاللبس "الانيق" كنا لابسينه بالعرض الطلابي للعيد الوطني 35
كنت وقتها بصف التاسع يعني عمري تقريبا كان 15 سنه
انا وخواتي وبنات عمي كلنا نفس اللبس
واختي من كثر ما عاجبها اللبس محتفظه فيه للحين
تقول مضيفات طيران
https://up.omaniaa.co/do.php?img=10048
بس حقيقه كانت ايام جميله
ايام التدريب وسوالفه ويوم العرض ونحن نشوف السلطان ف المجمع ، تحس كانه صوره لانه بعيد
الله يرحمه ويغفر له
https://up.omaniaa.co/do.php?img=10049
وهنا كانت الصدمه
جمعه ههه ، معذب قلوب العذاري
اللي مصيح بنات واجد
ونحن كنا نسميه عصفور
عاد اليوم اللي يجي فيه ما لابس دشداشه يعني "كاشخ"
تحس كأنه توم كروز معنا ف الباص
حتى بنات صف خامس ومعجبات فيه ههه
اتذكر ربيعتي تمر علي الصباح نروح المدرسه مع بعض
لانه المدرسه كانت قريب ونروح مشي
تجيني من غبشه عشان تلحق تشوف جمعه
لانه يوصل بنات مدرسه الثانويه ، ومدرسه الثانويه جنب مدرستنا
تقولي يجي س ست ونص ، لازم نروح قبل
والمصيبه انه ما معطنها وجه
وهي معي بنفس الباص لما نروح التدريب وهو يشلنا
اذكره مره كنا مسوين ربشه ف الباص ، ف ابله فتحيه قالت لي انا وغنيمه نروح قدام نجلس يعني خلف السايق
رحنا ، وهلكته
اهتلك منها وقال لفتوح استاذه لو سمحتي غنيمه ما اريدها تجلس هنا لانها مزعجه
قالت لها رجعي مكانك ، انا طشيت بمره وانا
قالت انتن ما تجتمعن مع بعض جلسي مكانك
وجلست لا حول ولا قوه
ثاني يوم شافتني ف مكاني
قالت روحي جلسي خلف جمعه
اسميني تورطت اسبوع اجلس خلفه كأني معاقبه
لكن غيري كان يتمنى يجلس بذاك المكان هههه
والمصيبه الاعظم انه كان يقولها غنيمه انتي من يحبك
من يحب مجانين
والبنت مسكينه معذب قلبها
https://up.omaniaa.co/do.php?img=10061
اخر ساعات نوفمبر المجيد
https://up.omaniaa.co/do.php?img=10128
صباح الخير بتوقيتي ،
وكالعادة
حرق جديد ههه
اكثر شي ف الحياة يصيبني الحروق ف يدي
يدي تشتكي علي
شي حروق وشي كسور وشي بلاوي
حقيقه فيني نوم
من لما كنت ف العيادة احس اني بنام
اليوم طبعا كانت اخر جلسه ، بعد ما اجلت اسبوعين
" النوم مشكله يغلبني دوم".
واشتغلت ف سن ثاني ، غير اللي كانت تشتغل فيه
طبعا ضربتني ابرة تخدير وما تخدر السن
وبعدها ضربتني ف ثلاث اماكن ثانيه لين تخدر
وحدها مستغربه كيف ما تخدر من اول ابره
ولما خلصت قلت لهم ان شاء الله اخر مره ازوركم
لانه اكره شي بالحياة انك تزور طبيب اسنان
اليوم حتى انا مستغربه لاني صاحية بكير
ههه غصبا علي والله
انا مخلوقه تحب تنام الصباح
اسهر الليل كله ما عندي مشكله اهم حاجه انام الصباح