عرض للطباعة
....
مساء السعادة والخير والبركات إن شاءالله
طبعا إلي جالس يصير من اعتصامات للباحثين عن عمل ما عجبني صراحة صحيح حنه باحثين عن عمل ومن سنوات بس ما فيه داعي لمثل هذه التصرفات يكفي نكتب عبر حساباتنا في مواقع التواصل الاجتماعي أنا بصراحة أكتب هنا في مدونتي وأحس إن صوتي وصل
وأنا معكم إنه لازم نتوظف بس نوصل صوتنا بطرق جميلة وسلمية
وإن شاءالله نتوظف كلنا حنه الباحثين عن عمل
التوفيق من الله
...
مساءكم جمعة مباركة طيبة
من إسبوعين ما أهتميت ب بغبغاتي وعاد أمس تزقزق مسوية عمرها ميته من الجوع ههههههههه مع إنه أمينا وأبوي عادي مهتمين فيها وعاد أمس ما قصرت فيني البغبغاء عضتني من الجوع مستوية شريرة
...
أول مره أعرف إنه الملياس عندهم بعد محل ذهب هذول ومحل واحد في نزوى ما دخلت أجرب ذهبهم جربت أشتري من كل المحلات عاد دور هذه المحلات بس فعرسي إن شاءالله
😁😁
....
سوالفي في مدونتي عصر اليوم من بعد الصلاة والسلام على رسول الله صلى الله عليه وسلم
انزين أنا ما واجد أحب مواقع التواصل الاجتماعي المهم ما عندي حساب إلا إلي الحين فاتحته ع أنستجرام علشان موهبتي المهم قبل شوي خواتي يقولن لي ما عندك متابعين واجد بالنسبة لي صراحة عادي أعرف بنات عندهن متابعين بالألاف وما واجد أحد يشتري معهن وأعرف بنات ما معهن حسابات ع أنستجرام ورزقهن ما شاءالله ماشي ودخلهن أكثر من حلو المهم يعني ما يهم كم إلي يتابعك
+
كنت أتابع حالات واتساب
الحين صرت أتابع قصص أنستجرام المهم ما أكذب انصدمت من قصص بعض البنات عنجد لهدرجة هاينه عليهن أنفسهن يصورن عمارهن والكل يشوفهن اللهم ثبتني ع دينك يا رب
+
بعض صاحبات البوتيكات تراه واجد أسعار بضاعتكن مبالغات فيهن ما قلنا شيء من حقكن تترزقن بس ما لهذه الدرجة صراحة الأسعار مره نار وأحيانا البضاعة ما مستحقة
أنا عن نفسي مره جربت أسوي لي كم تصميم ل عيد الفطر الماضي قريب من تصاميم معروضة ع أنستجرام سويت أربعة تصاميم وقيمتهن كلهن خمسين ريال وفوق هذا بعد أعتبره غالي وتخيلن يا بنات إنه كل تصميم كان معروض ب ثلاثين وشي في العشرين وشيء حتى في الأربعين
ليش يعني كذا
و معقولة فيه بنات عادي يشترين بكذا أسعار مع إنه فيه خيارات واجد أمامهن
....
من زمان ما كتبت صباح
صباح كل شيء جميل صراحة
سالفة الصباح عن تصويري مقاطع فيديو عن الطبيعة علشان لما أبغى أحطهن في حالة الواتساب وتو بعد أحطهن قصة أتطورت شوية هههههههه
المهم كل ما أسجل فيديو يطلع صوت أبوي ولما أحذفه وأسجل ثاني يطلع صوت أمي ولما احذفه بيطلع صوت أخواني وأحيانا حتى أصوات الجيران وأخر شيء لما أصور فيديو ما فيه أصوات بشرية يطلع ما مضبوط واجد أهم شيء من بعد ذك المعاناه كلها أرزه في حالتي والقصه
وعبرت سالفة تو
....
مساء السعادة والجمال
كنت باغية أشتري لي سوار ذهب ومن كثر الصور الي شفتهن عن الذهب فؤادي يعورني ما أشتري بس وحده من خواتي قالت لي السعر مرتفع ما تشتري الحين
يا رب تنزل أسعار الذهب علشان أشتري سوار
وأنتوا ما تنزلوا تشكيلات واجد حلوه ما زين كذا تراه
....
هو كل ما مات أحد كتبوا المغفور له ايش دراكم مغفور له وإلا لا كتبوا نسأل الله أن يرحمه ويرحم موتانا وموتى المسلمين أجمعين
....
جالسة ادون شغلي إلي أسويه علشان ما أنسى الخطوات العمل اليدوي متعب بس جميل صراحة
المهم جاء أخوي الأكبر يقولي ايش تذاكري قلت له ناقص بعدني أذاكر جالسة أدون أعمالي مال الكروشية
قال ع بالي مقدمه لوظيفة قلت له تخصص إدارة أعمال هذا من التخصصات المغضوب عليها ما تنزل فيها وظائف حكومية
أما شركات ما أبغى توظف ما مستعدة اشتغل في شركة أحد صراحة
....
يعني ليش لما يستوي خطأ طبي ل فقير ما تقوم الدنيــــــا وإلا بس لازم تكون معروف وعندك فلوس علشان تشتل كل الدنيــــــا معك؟!
...
أمس ليل أكل آيسكريم وبعدين تذكرت موعد نومي شفت عاد الساعة قريب عشر بتجي رجعت الايسكريم الثلاجة وأبوي وأمي يقولوا أسية لحقتي تخلصي الأيسكريم قلت لهم رجعته الثلاجة وقت نومي حان
من يوم كنت صغيرة ما أحب أغير ساعات نومي لازم ساعة عشر أكون نايمة وأحيانا قبل