https://up.omaniaa.co/do.php?img=8385
عرض للطباعة
.
يقول الرافعي:
مقامك حيث أقمت نفسك ، لا حيث أقامك الناس،،،
فالناس لاتعدل ولا تزن
.
لا تحاول أن تعيد حساب الأمس وما خسرت فيه
فالعمر حين تسقط أوراقه لـن تعـود مرة أخرى.....
صباح الخير ايها الملاذ الآمن.. كيفكم معشر السبله العمانيه
كل عام وانتم بالف خير مؤخرا وان شاء الله ينعاد عليكم العيد وانتم بصحه
وعافيه..
هالعيد على الرغم من الظروف الاستثنائيه الي مرينا فيها وافقدتنا
الكثير من نكهة العيد الا انه يبقى ضيف عزيز يمر علينا
لطف فيه مراره الحجر في ظل هالجانحه
صحيح اغلب العوائل لها عزيز مفقود بس تظل هذي سنه الحياه
والحمدلله على كل حال...
هالعيدعلى الرغم افتقدت فيها لمه امي واخواني على الرغم من الي بيني وبينهم شارع ودوار بس اون هم بمحافظه وانا بمحافظه
وفالعيد بعد انكسر تلفوني بس لازال صامد.. (مثلي يعني)
وانا من الطراز العتيق الي مااحب اغير الاشياء الي ارتبط فيها احس تغير التلفون نفس تغير الغرفه الخاصه فيني او استبدال مكان نومتي وكلها اشياء تاخذ وقت لحد ما اتعود عليها
............
وش بعد
اممم قررت اتعايش مع اي وضع يمر علي مهما كان صعب..
يعني ليه ازعل واجلس مبرطمه لما انتظر احد ما يسال عني
واذا على الظروف فكلنا معنا ظروف.. الفرق بس بين الي يوجد لك الوقت عشانك مهم وبين الي يهتم متى مالقى له وقت
المهم....
شكلي ادور مشاكل من الصبح
على طاري المشاكل حد خاطره يرفع ضغطه ويبغا حد يلاسنه؟
عندي شغاله ابغا اعقها فحفره المشوي النيه بس على حظها ماسوينا مشوي
احسها مستفزة وتدور مشاكل وكل هذا عشان تسافر
مدري ليه انا حظي عوج مع هالشغالات؟
افكر انقطع عن السبله هالفتره.. (وش دخل السبله)
بس كذا مزاج... لما اعصب اعصب على الجميع
يالله نشوفكم على خير..
الخطأ الذي نقع فيه دائماً دون ان نشعر
هو أننا نرسم أمنياتنا بناءً على وجود شخص معين،،،
اذا خسرناه خسرنا كل أمانينا
النضج هو أن تدرك أن
معظم الاشياء لا تستحق ردة فعل..
صباحكم ورد
اليوم أول يوم دوام من بعد الاجازة
الاجازة ولله الحمد قضيناها فالبيت
وعاد رجعنا الدوام
البارحة كنت طالعة وراجعة قريب 8ونص البيت وكنت تعبانة لاني ما اخذت قيلولة بعد الغداء
فصليت العشاءوضبطت المنبه ونمت وانا اتحلطم على العيال ..كانوا يبا يناموا
وغرفتهم معفوسة .
المهم نمت وقمت الصبح واشوف جو الغرفة باهي والمنبة لسه ما رن
لما شفت التلفون الساعة كانت 5.20ص
بصراحة انحبطت وقمت انهض زوجي قوم الساعه عادت 5
مسكين نش منتزق وقام يركض يدور سويك السيارة يشغلها وانا حطيت راسي ورجعت انام ههههههههههه
تو الي يشوف بيقول هو الي متاخر وانا ما وراي شي
عاد قمت صليت وتجهزت وانا غاسلة ايدي ان الباص بينتظرني
وجيت على التلفون لقيت جروب الباص واصلين الموقع الي اطلع منه قتلهم خلاص توكلوا
وجلست
رجع زوجي يقولي انتي ما بتداومي قلتله لا الباص راح الا اذا بتوديني هههههههههه
عاد تغيرت ملامحه 180 درجه وقالي زين تجهزي
رحت البس عباتي ولا ياسين قايم ويصيح شافني لابسة العباية
الحين كل يوم تشخطها نومة لحد الساعة 8 و9واليوم لان عندي دوام قايم لي من الغبشة ؟2
خليته مع جدتة وشغلت له التلفزيون وطلعت
وفالسيارة من طلعت لين وصلنا بوابة مسقط والارباب منتفخ
طول الوقت الطريق وهو ساكت وانا بعد صامت
اعرف هالخط يضايقه ويكره يجي مسقط
مشغلين فيروز صباحيات ( سلملي عليه )
عاد لما قربنا قلتله انا ابغا رصيد وناسية الخبز والماي بعد (هيوا زيديني غم بعدك)
طاف واشترالي رصيد وجاب لي فطاير وماي
وما رجع لي الباقي بعد
عاد وصلت الدوام افتح باب السيارة ولا باص مخبز مار مثل البرق زين ما فلقني فلقتين
قال :انتبهي اون ماتشوفي قبل لا تنزلي ؟
عاد ما بغيت ارد عليه وهو مسكين متعني 100ومدري كم كيلو عشان يوصلني
بس زين لحقت على البصمة
وعاد تو ختمتها صح
ناسية الشاحن والسماعات
وجايبة جبن بلا خبز
وجايبة روب وموز (تنفع لماسك لشد البشرة )
وحتى كوبي الخاص شليته اخر يوم ونسيته فالبيت
(وش تبيله شالتنه ..من جل الاكواب فالبيت ؟)
تو جلسي بلاشاهي
ابعرف انا ليش مداومه
تو ارسل حق بوالعيال اقوله وصلت؟ قال تواحي تسألي ههههههههه
المفروض يسولنا مترو حق الي يداومو
النص للرجال والنص للحريم ويربط من مسندم للقصر لقصر العلم
(كيفي اقتراحي )
تو جاري البحث عن شاحن بنفس مواصفات تلفوني
والغم نص زميلاتي ما مداومات
وش هاليوم
مرات بداية اليوم تكون نحسة وتعفس لك باقي يومك
.
ليس علينا ان نتحول الى أعداء
عندما لا تنجح علاقتنا مع الآخرين
فهناك خيارات اخرى كثيرة
كالتناسي ..والتغاضي..وأهمها :
الاحترام