مساء النور والسرور
اسعدني غاليتي حضورك الرائع وتعليقك الراقي
هههههههههه حلو لاه فيلم رعب حقيقي
ان شاء الله
تحياتي،،
الجزء الرابع...:cool:،،،
دخلوا يناموا وهم بالغرفه الي يشوفوا الباب ينفتح....
شوي شوي ....محمد وخالد ما عرفوا شو يسويوا ...محمد تلحف باللحاف ويقول اشهد ان لا اله الا الله واشهد ان محمد رسول الله...وخالد فاتح عيونه وكله يهتز-شعور صعب لما تحس نفسك في موقف خطر وما عارف كيف تتصرف- ويشوفوا الظل يقترب منهم ...محمد نام على الارض هو ومتلحف بس خالد غمض عيونه ويقول كلمات من الخوف والاهتزاز ماحد يفهمهن ولحظات وينفتح الباب كامل ..وصرخوا بقوة بدون ما يشوفوا من الي فتح الباب وحسن يسوي صوت وبدأ خالد بصوت مرتفع يقول كلمات.. اما محمد خلاص صمت وقطع النفس ويقول خلاص نهايتي اليوم ...يارب برحمتك والله ما سوينى شيء يارب سامحنا وحسن يقترب من خالج ويقوله وحدك ولا حد معك بسرعه تكلم -هههههههههه-
والله معي هذا هذا ويأشر على محمد...ويمسك محمد وما شيء محمد اغمى عليه وبعدين الي مع حسن طاح في الارض وهو يصرخ من الضحك وحسن يضحك يقوله محمد ...محمد قوم انا حسن والله حسن بس محمد خلاص فقد الوعي ع باله الجن تشبهوا بحسن
وخالد يقوله الله يسامحك احنا ناقصين الحين شو سويت فينا والله بنروح فيها كنا.... بعدين جابوا ماي بارد و وعطر وفاق محمد ...قالهم اضطريت اجي اخوي عنده باكر مقابله من وقت ولازم نجي هنا ..ليش خايفين ما انت محمد الي قايل ما تخاف، وخبروه ..الي صار لهم قال خبرتكم لازم ننتقل من هنا...محمد خلاص انا شكل موتي بيجي بسبب هالجن خلاص حسيت نفسي اشوف الكفن بس دمعت عيني تذكرت شيء .....وفي الصباح حسن واخوه ودعهم بيروحوا المقابلة وبيرجعوا ع طول البلد وبيحاول يبحث عن سكن جديد
خالد ومحمد وحدهم بالبيت والقرآن على مدار الساعه بالبيت بس ما نفع الجن الي معهم الظاهر انهم مسلمين وعادي يسمعوا القرآن
خالد في دورة المياة وهو يسرح شعره وهو متعود يسويه حركات وستايلات كبعض الشباب ومعروف عنه شوي انيق ويهتم بشكله كثير ...المهم حس كأن حد لمس شعره بقوة والتفت يمين ويسار وما شاف حد ..طلع وهو يضحك ويقول لمحمد سبحان الله بدينا نتوهم اشياء واشياء ...خلاص انا بديت ابحث عن سكن جديد وان شاء الله اخر شهر بننتقل ونتفاهم مع صاحب هالسكن ..وانا مفكر نشتري السكن الجديد ويكون ملكنا بصراحة احسن من ندفع اجار كذا..صدقك والله الفكرة حلوة بس احسن السكن يكون بس ملك شخص واحد ..بنشوف لما يرجعوا حسن وعادل نتناقش في الامر..
خالد طلع من البيت وهو يحس حد يمشي معاه بس ما يشوف حد
ولما فتح باب السيارة حس حد مسك ايده وسرعان ما تلاشى الامر ما اهتم خالد..كله يقول في نفسه انه يتوهم لما حرك السيارة شم ريحة عطر في سيارته ...جاء في باله ان محمد استخدم السيارة وهذا عطره ويضحك ويقول حشا هذا كل العطر يخلصه بيوم كذا يتعطر...محمد تعبان لانه ما نام بس ما قدر يطلع من العمل لانه وين بيروح يريح وهو ما يقدر يجلس بالبيت لوحده شرب يمكن 6 اكواب شاي ومع القهوة عشان يكون صاحي...
عادل اصبح شخص ثاني ويسوي حركات غريبه بالبيت وما حد فاهم القصه فيه تغيير كبير تائة وسرحان وما يستوعب شيء يتصلوا فيه اصحابة احيانا يرد واحيانا ما يرد والرسائل يطنشها وخبرهم انه مشغول ..فجأة راح عند الحلاق وحلق شعر راسه ولحيته والشنب كله صفر واستغربوا من الامر اهله ..ليش يسوي كذا اتصل اخوه ب محمد لانه معه بالعمل والاقرب له وخبره بأمر عادل وطلب منه يجي يزورة اتفقوا كلهم يروحوا معه ولما شافوا الحاله استغربوا وما عارفين شو يسويوا ...الخبير حسن قال انا اقولكم عادل شكله يحب ويريد يتزوج بس ما بإستطاعته لانه عنده سلفيات والجمعية يريد يعالج بها والده يعني امورة متأزمة وشكله اصابه مرض نفسي وانا متأكد والاحسن نعالج صديقنا نجمع له مبلغ من المال ونساعد محمد قال انا اتكفل بكامل المهر -ما عليه ابديه عن نفسي ولما يجي دوري عليكم مهري- حسن وانا علي العشا ومصاريف القهوة واللبس ماله وغرفة النوم و...خالد انا علي تذاكر السفر واي شيء يريده انا حاضر وما عندي مانع وهم يضحكوا على خالد وخبرها بنت العم تنتظرك بعد 5 سنوات ويضحكواحسن اتصل ب عادل وخبره ان يخبر اهله ويروحوا يتقدمواعادل بدون استيعاب يقوله تمام بخبرهم قال حسن شفتوا خبرتكم ان السالفه بنت ...خبره لاه بعد اياام ....عادل استاءت حالته وقرر اخوه يصطحبه الصباح المستشفى ,,,في الليل راح عادل عند الجبل ويرسم النجوم في الارض ويشوف فوق بعدين حس بالجن كلهم التموا عليه ما قدر يتحرك ولا يتنفس وما تحمل ...
وفي نهاية الامر لقى نفسه .....
همسة,,,,اعتذر عن الاخطاء بسبب الشبكة تفصل معي :confused:
تابعونا في الجزء القادم
تحياتي
مساء آخر دقايق من 2016 :p
ههههههه يالله على التفكير يعني حلق اللحية خلاص صار يحب .. أهم شي إن مصاريف الزواج عليهم المفروض عادل لو ما مفكر يتزوج يفكر الحين عروض مغرية من أصدقائه ما لازم يفوتها هههه
بعد كل هذا اللي يصير ويروح الجبل بالليل الله يهديه هو يلحق الجن بدل لا يلحقوه بإنتظار التكمله .. ربي يسعدك
صباحووو ...❤
يا ربي وضعهم كيف صار ..؟!!
طيب دام عادل تعبان من هالسالفه ليش استمر عليها والا خلاص في شي يجبره انه يسوي هالحركات والوضع طلع من يده ..؟!
بااارت مخوف ويحليلهم حسن وخالد وحمود ينرحموا بجد ..
حشششى ورود تعرفي وين تنهي البارت وتخلينا متشوقين للبارت القادم ..
عاد لا تطولي علينا ..
يعطيك العااافيه الغلا ..
السلام عليكم. بدايت افسر انه عادل له الصله باللي يحصل. احاول اقراء اجزاءك الصبح . عشان فليل ما فيني على الوسوسه. لكن نص رائع ومتسلسل في ترتيب الاحداث. وفقتي في الصياغة الجميلة يا ستي. ونتظر الجزء المجهول من القصة . حفظك الرحمن ورعاك
ملاحظة
بدمج الجزء الخامس مع الجزء الاخير من الرواية بسبب ظروف طارئة وخارجه عن الارادة:cool:
الجزء الاخيرررر...همسة
هلا فيكم ...
وفي الليل راح عند الجبل ويرسم النجوم في الارض ويشوف فوق بعدين حس بالجن كلهم التموا عليه ما قدر يتحرك ولا يتنفس وما تحمل ...وفي نهاية الامر لقى نفسه بالبيت وهو بالسرير واهله يقريوا عليه...اتصل محمد ب اخوه ليطمئن على عادل بعد ما اتصل فيه وهو ما يرد وخاف يكون صار فيه شيء... خبره بحالة عادل وان كل يوم يزداد سوء فقال له لا يكون يريد يتزوج وظروفه ما تسمح وكذا صار له، رد عليه الاخ لا الامر اكبر من سالفه الزواج كأنه فيه انهيار نفسي حاولت افهم شيء من الي يصير له ما قدرت ويقول كلام غريب دخلت غرفته حصلت عنده كتب غريبة وهو خلاص مافيه عقل معنا كـأنه جثه تتحرك مثل الرجل الالي وما عارفين شو الحل ...وخايفين عليه كثير,,,بعد ما اغلق محمد الهاتف اتصل بحسن وخالد وخبرهم وقرروا يزوروا عادل ولما شافهم ابتسم وما جلس معهم استغربوا من الامر ...محمد تذكر مقوله جده ان الجن لما يتلبسوا الشخص في راسه يكون مجنون وقال يمكن من الجن الي بالبيت استوى له كذا وبعد ما قال كذا محمد ع طول راحوا مع عالم وبعد معاينة حالته قالهم هذا فيه مرض نفسي والافضل تروحوا المستشفى ولما شافه الطبيب قالهم لازم نحوله مستشفى الامراض النفسية هذا حالته مستعصية ومتبلغ عنده الامر وشكله خلاص باقي شوي وبيكون مجنون ...عطوه ادوية مهدئات وغيرهن وهو حالته تستاء جدا لان الجن تلبسوه واصبح شخص بدون عقل...وكل يوم يشرب الادوية وتزيد الحاله
وقالهم الدكتور اذا ما شيء استجابة للادوية لازم يجلس معنا...
خالد كلما راح مكان حس بحد يلاحقه لما يركب سيارته ولما يخلي شيء في المقعد الامامي ع طول يسقط في الارض كأن احد بالكرسي ..يستغرب ويقول مو هذا الي يصير وفي يوم دخل غرفته بالليل الي هي بالبلد شوي يجلس بالكرسي ويسمع صوت يأن ويصرخ بصوت خفيف ..قال بسم الله من هناك ماحد تكلم وقف يغير ملابسه الي حد يمسكه من ظهره بقوة ويقوله مستحيل حد يقرب صوبك انا حبيتك وانت لي برضاك او غيره بس ما يشوف حد بس يسمع الصوت ويحس بالمسكة ويقرأ قرآن بس لازال الوضع لان الظاهر انها مسلمة والقرآن عادي تسمعه فجأة تجي عند خالد قوة وكأنه يلقي بها بالارض ويخرج بسرعه من الغرفه ويركض عند ابوه ويخبره بالسالفه قاله بسم الله من وين جتك هذي لا تخاف بنروح عند شخص يقرأ قرآن وكل شيء بيروح خالد خايف لا تسوي فيه شيء ...لا قدر يروح العمل ولا قدر يجلس في مكان بنفسه كانت لما تحصل فرصه بروحه تطلع له وتقوله نفس الكلام ...
خالد كان جالس يحضر بنفسه وفجأة....
وسمع صوتها بدلع شوي وهي تدلعه ويلتفت ويقول مرة جيتي انتي الله يخلصني منك ومن شرك..ردت عليه ما لك مفر خلاص خبرت كبيرنا وقال بيساعدني وبكون معك طول الوقت وانا لك وبلعب بشعرك الحرير و.... وهو يتعوذ وهي تتكلم وبعدين حس انها تقترب منه خاف بشدة منها وقالها اذا قربتي مني ما بتزوجك كان يريد ينقذ نفسه يسمع صوتها وخطواتها بس ما يشوفها فجأة حس بشيء يلمس خده ارتعب خالد لما بغى يقوم ما قدر كأنه حد مسكة وهو حضر كبير الجن وصل يريد يزوجها سمع اصوات واصوات وخالد يصرخ بس ماحد يسمع صوته...
اهل عادل واحد من جيرانهم خبرهم انه اكيد فيه جن ووصف لهم على عالم قرآن وفعلا
راحوا مع الشيخ لما شاف حالته قال الله يعينه ... اخذ ايده ومسك رأسة من صوبين مسكة قوية وقرأ له المرة الاولى وبدوا الجن يطلعوا ويتكلموا ....سألهم ليش دخلتوا هذا الشاب خبروه ان هو الي حاول يتعلم .....بس ما قدر وما تحمل واحنا كنا هناك ودخلنا فيه بلحظة خوف وقلة ايمان وما نريد نطلع منه ...قال لهم طلعوا وما رضوا
قال لهم بتطلعوا بالقرآن...قرأ له المرة الاولى وما شيء استجابة ،،، قالهم جيبوه يوميا لمدة اسبوع وبيرجع مثل ماكان...
خالد حالته صعبه في الغرفه ويرتجف خوف ويحس رأسه ينفجر فجأة يدخل اخوه الصغير واختفوا الجن وما قدروا يتموا الزواج
ركض خالد وهو يبكي عند امه ساعدوني شو العمل انا خايف بروح عنكم ساعدوني
امر خالد صعب الجن مو متلبسينه بس يراقبوه ويريدوا تحين الفرصه ويتم الزواج وبيكون بعالمهم
لما يكون نايم بغرفته يحس بشيء جنبة وولما يريد يخرج ما يقدر تكرر الامر مرارا
وقرر انه ما ينام بغرفته ولا ينام وحده ...ينام مع اخوه ويتكرر نفس الامر الاخ يجد نفسه بالارض
وهي تجلس جنبه ...
في يوم كان عندهم عرس ولد عمه وهو صديقة ولازم يكون كشخه بالعرس لانه بيمشي معه
كالعادة في غرفته يتجهزو يلبس الخنجر كلما يريد يصلحه يسقط الخنجر بالارض وتكرر الامر
وما حس بنفسه الا حد يدفعه بالكرسي وجلس ومسكة قوية ما قدر يتحرك
وبصوت اليوم يومنا وين المفر....انا لك وانت لي
امه عند الباب تقوله خلود يالله تأخرنا وهو يرد عليها بس ما تسمعه كأنه بمكان
بعيد...خالد من الخوف والرعب ما حس بنفسه فقد الوعي
ولما صحى في بيت غريب وهناك رجل ملتحي وفيه عمامه هع صرخ خالد يفتكر انه مع العالم الاخر
وضحك الشيخ وطمنه انه بأمان وربه نقذه ...بس كان بجسمة اثار اظافر حبيبته
طلب منه يواظب على القرآن ويبتعد عن اشياء كثيرة وفعلا اختفت حبيبته من الجن وبدت امورة تتحسن وترجع اوضاعه مثل ماكانت
عادل بدأت امورة تتحسن والعالم خبرهم بإلي كان عادل يريد يسوية وبموضوع الكتب
وفي نهاية الامر تم حرق الكتاب الي اشتراه بثمن غالي
حسن كان ليس احسن حظ من عادل وخالد
كان طالع بسيارته وشوي ابتعد عن البيت الي وحد يمسك البريك وانقلبت السيارة بعادل
ويشوف رجال شايب جنبة ويقوله تريد تجي معي وحسن ما فاهم شيء
وفجأة مجموعه شباب يقتربوا من حسن واختفى الشايب نقذوا حسن وفي المستشفى تكرر
نفس الشخص يوقف جنبة ويمسك ايده ....حضر اهل حسن واختفى
كان يتابعه مرار ولما وصل البيت حسن كان بعالم اخر ويهذي
اسبوع بنفس الحال وفي نهاية الامر كتب له شيخ حرز (آيات قرآنية ) وبدأ يرجع مثل ما كان
هههههههه والي كان يخاف بشده هو الي سلم من الجن ....محمد...
بعد شهر انتهى الامر وفهموا ليش الجن كانوا معهم
ويضحكوا على خالد وحبيبته من العالم الاخر ومحمد مسوي نفسه انه هو مطوع من كذا
سلم من الجن هههههههههه
ورجعوا الاصحاب مثل ما كانوا
وانت
هت سالفه الكتاب ونسى عادل كل شيء واقسم ما يتبع هالامور
ودمتم سالمين
واعتذر على سرعه الاحداث ودمجها لظروف وما وصفت لكم بالدقه الي صار مع خالد وحسن:cool:
تحياتي لكم\ورد
نلتقي في رواية اخرى
روايتي افتقدت تعليق الغالية على قلبي:confused:
اعوذ بالله من الشيطان الرجيم ومن همزة ولمزه .. الواحد يقرا هذه القصة وشعر راسه يوقف. هذا درس لهم جميعا .. وعبره لنا .. ما شاء الله عليك يا ستي الفاضلة . اصبحتي كاتبه مبدعة.. وخصوصا اخذتي طابع سرد الحكاية بصورة مغايرة تمتع القارى بقراءتها اكثر من مرة .. لما لها من أحداث وتسلسل رائع . احسنتي ووفقك الله الى ما يحب ويرضا .. نتظر بشوق حكاية أخرى بقلمك الانيق .. كوني بخير.. حفظك الرحمن ورعاك..
اللهم سكنهم مساكنهم
قصة جميلة وفيها عبرة البعض ما يحس بتصرفاته إلا لما تصيبه المصايب منهم من يغني بالحمام وإنتوا بكرامة وبالنسبة للبنات لازم ما تفتح شعرها و تتسشور بالليل ولازم نواضب على قراءة الأذكار لنحمي أنفسنا
طريقة السرد جميلة جداً مبدعة يا ورد ماشاء الله عليك تمنياتي لك بالتوفيق
مسايااااا ..❤
يا ربي ورووود بصراحه اقشعر جسمي ..
عاد خالد وحليله طاحت فيه اكثر شي ..
فعلا الواحد لازم يلازم قراءه القرآن وتحصين النفس بالاذكااار ..
بااارت مخيف خليتينا نحس بموقف ابطال الروايه ..
ابدعتي غاليتي وبإنتظاااار جديدك ..
شقرآ
رواية جدا رائعة ونهايتها رائعة
بأنتظارك في رواية جديدة
وفقك الله