عرض للطباعة
رباااه ومالي سواااك
شهالحاله يا الله ابا اناام وانام ما يباني
شو الحل ختمت المصحف وبعدني مصحصحه
محاضراتي تبدا ثمان ونص بالله يعني متى بنام
والسؤال الاهم بيمديني ارتاح واقوم نشيطه
بصراحه ما ساالفه كذاا يخون فيني زيد<قلب مكسور
مصدوومه منك ومجرووحه
خلااص روح وروح ابعد بدنياك
يا متعب قلبي بصدك>>��
اعتقد انا الوحيده اللي صاحيه للحين ف عمان ونفر من الجن هع☺
لو اقوم اذااكر ميتين ميتين بيي النواد لكن عنااد ما بذاكر
بكيفه بكيفه يستهبل<<يا ربي فيس يصيح
بشوف تاليتها وين نوصل☺
مساا الورد
امممم بما اني يوعانه ومب قادره اذاكر ولحد ما يوصل العشا
قلت خل ادش اشخبط شوي...المهم بخبركم موقف صار اليوم ف واحد من الجروبات
تقريبا من اربع او خمس سنوات انا داشه جروب ديني مشرفاته سعوديات وطبعا فيه من كل الجنسيات
ومفهومه الفكره طيب .. انزين اليوم دشت وحده اعتقد عراقية تقول ادعوا لاهل الموصل
ليش؟؟ تقول ان تقريبا في حرب ان الشيعه تعرضوا للسنه وطبعاا ربنا العالم شو صاير بالضبط
لان الموصل عباره عن منطقه اهلها كلهم سنة<<المهم ما علينا
عقب دشت وحده سعودية قالت حسبي الله ع كل شيعي<<قسماا سلامات
وللمعلومية ان الجروب ما فيه الا سنيات ممنوع تدش شيعيه او اباضية<<ع اساس الدين والجنه للسنه بس
وطبعا عشان ياخذوا راحتهم ف الحكم على المذاهب الثانية<لدرجه عادي يكفروا شي من المذاهب او علمائهم
المهم انا مسكت نفسي وقلت لها في شيعه مالهم ذنب
ردت وحده بفيس منتزق وردت مشرفة الجروب ولانها مرة كبيره ف كتابتها مش مفهومه زين
لكن تكلمت عن الشيعه الخلاصه قلت لها ما يعني انا سنية يعني الصح ف كل شي وانا بس راح ادخل الجنه
اللي بغيت اقوله ان في نااس وهالناس لاحظتهم اللي هم سنة السعودية(بعض مش الكل)
يحسسوني انهم من المبشرين بالجنه<كيف؟
يعني يكفر المذاهب الثانية ويسب ويلعن ويوصف علماء هالمذهب بما ادري شو<سلامات
الدين ع كيفك والا موكل تقسم الناس من تدخل الجنه ومن يدخل الناار!!
الشي الثاني في مره وحده رسلت برودكاست يتكلم عن الاباضيين وبالتحديد
عن الخليلي اقسم بالله اشتطيت وارسل حق اختي الكبيره شوفي شو مرسلين
وقلت لها برد عليهن وما خلتني ونفس الشي ربيعتي قالت بسون لج سالفه
وبطلعوج من الجرووب..خيررر؟؟ امبوني ما بطلع من الجنه
المهم كان البرودكاست يسيء للاباضيين وللخليلي بالذات ولليوم ندمانه اني
ما رديت عليهن لكن انتظر يرسلوا مره ثانيه<<شريره هالبنت
فالاخير محد له الحق يطلع اي شخص من ملته او يكفره
سواء كان سني او شيعي ممثل مغني رقاصه محد كامل ولا حد معصوم من الخطا وبس والله
يعني في ناس حاطه الدين ع هواها ويكفروا الناس والله سلامات
اذا انا سنية هذا ما يعني انا بس بدخل الجنه وانا بس الصح
وانتهت قصة حياتي لهذا اليوم
نراكم في حلقه قادمه ان شاء الله هههه
��
مشتآق لـگ شـوق يمـر العناويـن
يفـرد علے وصـل الحبايـب شرآعــہ
مشتآق لـگ شـوق النـدي للرياحيـن
شـوق يهـدد خآفقـي بـ نتزآعــہ
خذها نصيحھ دام قدامگ الوقت
اتعب على اللي يسعدگ في حياتگ
واللي يزوّد ضيقة الصـــدر لاضقت
ما هو كفو تخليھ في وسط ذاتگ
وحضوور انيق هع
مساا الووورد و الووجد
امممم في موضوعين منرفزيني
بتكلم عن واحد والثاني عقب لما تصير فرصة
هالشي طبعا ف البنات ما اعرف اذا في نوعية من
الشباب فيهم هالصفه بس الاكيد ان هالحركات السخيفه تطلع من البنات
المهم شو هو الموضوع
خاطري بس اسال البنت اللي تحب تنبش ف حياة او بالاحرى
ف خصوصيات الناس وتتبع امورهم وحياتهم الخاصه..بشو تحس بالله؟؟
او البنت اللي تحاول تلمح تلميحات استغفرالله انها شو اقول مرره غبية
يعني ما عارفه كيف اوصف هالسخافه تسأل اسئلة غبية تلمح بأشياء شقول عنها
انزززين وبعدين؟؟ انا لو في شي ابا اقووله بقوله لج لا والمصيبه تكون هالبنت
علاقتي معها سطحية..قسماا سلامات!!
انا بس ابا اعررف هالنوعية من الناس شو تستفيد؟؟
ياخي شو لج تتطفلي ع حياة الناس وليش هالحركات من الاساس
بعدين اذا انتي هالكثر جريئة عطيني من الاخر شو تبي تعرفي؟
التعبير بنجالي لكن جد منقهره من هالنوعية
اما عاد اللي يفقع المراره صح البنت اللي عندها مؤسسة انتاج
احذر اخي المسلم هاذي اخطر المخلوقات
الشي الاخير ترى مرره مشتااقه للبيت
بس لاعت جبدي من السكن
تدروا عاد شو احلى مسج عندي
هو لما يرسل لي ابوي متى تخلصي بااجر
عويناتي يصيرن قلوووب وبسسس والله<<شكثر تلعي يا ربي
مسااا الكاادي ولون النرجس الهادي<<شخبااري هههه
المهم قبل لا يخلص اليوم اقصد هالتاريخ ١٤/١ <<فيس مستحي
المهم كبرت حبة وصرت عيوزه هيه هيه نعم عيوزه
انزززين شكراا من صمصومات قلبي للي تذكر هالتاريخ<<محد تذكره
امززح امززح الا في ناس لو انساه هم ما ينسوا مع ان هالشي ما اهتم له لكن واجب الشكر هع
شووو بعد شو بعد بس حبيت اشخبط ف المدونه بهالتاريخ للذكرى
عشان عيالي عقب يشوفوا المراحل الانتقالية حق امهم هههه<<اووك تماام
امممم صح انا من النوع اللي ما اهتم حق سالفة الميلاد
لكن افتقدت رسايل كم شخص تعودت عليهم<<الله يوفجهم
لكن الحمدلله الله عطاني اشخاص تغنيني عن بلد(ميمو الحب)❤
_
يسخّر الله لنا المواقف التي تردّنا إليه، تنقلب موازين الكون في لحظات مفاجئة ليُرينا الله فقط : أنه هو الملجأ الحق، والمأوى الوحيد، وملاذ الخائف والحزين والكسير .. عندها يُجري على ألسنتنا الابتهال له والتوسّل إليه، ويُلهم أيدينا معانقة السماء واستدعاء الفرج، ويملأ قلوبنا بالاستغاثة والاستعانة به وحده.”
عندما تصل لتلك اللحظة التي تشعر بتوقف الزمن عندها وانعدام الحلول وشدة الكرب، ثق تماماً وكُن متيقناً أن الله عز وجل سيجبر كسرك ويكشف ضرك ويسمع صوتك ||~❤
صبااح الوجد وانفاس الاغاني
وطلة العصفور وعطر الوورد<<اي عصفور واي بطيخ
يا ربي تذكرت سالم السيار وكيف تخبلت ع قصايده
والله قبل سنتين تقريبا كانه حد صافعني ع راسي
كل مره اطيح ع شاعر لحد ما احفظ اشعاره وتلوع هو جبده مني ما اودره
لا وبعد كنت اقول حق ربيعاتي بخطبه<<عاد سالم السيار كبر يدج يالهبله
المهم اللي اتذكره اني ما خليت شاعر ما سمعت له<<استغفرالله بس ايام الجاهلية
هو للحين احب الشعر وهالسوالف بس خف الخبل اللي فيني<الحمدلله
انزززززين كنت ابا اقول اشياء لكن خلاص ما يخلصني
بحاول ارررقد..سلام عليكم<<هالمره بصوتي
ع الاقل احلى عن صوت الشهراني<<تستاهلوا تستاهلوا كل شي زين الله يخليني حقكم
والله خبله هههه..❤
امممم اييش اقوول وايش اخلي<<ع فكره كلمة ايش مرره كيووت
المهم نرجع للنبرة الحزينه اباا انام
امس تقريبا طول الليل ما نمت ونمت الصباح جريب ٨ لاني مريزه<<اجر وعافية حياتي
وطبعاا ما داومت وقمت ٣ العصر وناهيك عن البريكات اللي اخذهن بسبب الالم والبرد
وطبعا الحين ما فيني نوم وكل خوفي يتكرر الموضوع ومرره اتضايج بصراحه
المهم انا عندي سؤال مررره خطير احين انا مصكره الباب والشباك
ومطفية المكيف البرد شو يدخله الغرفه؟؟ والله يعني الحمدلله
بس ما عارفه اتعامل مع البرد طول الوقت بردانه واطرافي متجمده
ماشي غير اشب الضو بالغرفه واتدفى بالاثاث<<عادي صح
ممكن بعض الامراض تسبب البرد؟سالي نفسج يا دكتورة الطل والله
وبسس تسذاا
وصباااح الفل والمسك والعود والريحان
واحلى صباااح لاحلى مدونة واحلى نااس تتابعها<<ضبطتكم هااه
ووووووو في مشروع براسي يعني هو مش بزنس وسوالف لا لا
مشروع شو يقولوا عنه جد والله شو يسمووه ما اعرف علووه طاف
المهم في امنية بخاطري اتمنى وانا كلي ثقة برب العالمين انها تتحقق
اذا صار هالشي راح اسطر قصتي بهالمدوونه ان شاء الله<<قولوا يا رب تتحقق
وووو شو بعد هيه فيه شي بخاطري اقوله للاعضاء اول شي الرسايل الخاصه<<لا يروح بالكم شكثر الرسايل لا اتكلم عن كم وحده والا انا طماطه محد يعبرني المهم
سوري والله اتعامل معهن بمزاجيه هههه سواء كانت من عضو او اداره
ع حسب مودي ارد او لا احيانا ما ارد لان ما يخلصني المهم اعتزر حقاا
الشي الثاني ترى انا انسااانه لووح يداار قول اللي تبي يعني ما ازعل ولا اشيل بخاطري
ونفس الوقت احب (امززززززح وااايد) ولا اقصد شي يعني مينون اللي يزعل مني
وبس والله عشان ما اروح من الدنيا وحد شايل علي
والى هذا اخواني اخواتي الاعزاء نصل الى ختام حلقتنا
نراكم غدا في نفس المكان وبنفس التوقيت انتظرونا
كنا معكم انا صبحه والزميل مصبح والسلام عليكم ورحمة الله وبركاته