^-^ شعورٌ يلامس نبضي °~° ®

يبدؤ ان مملكتي تضج بالصراخ تضج بالبكاء.. يوجد بها الحزن والكابه مملؤة بالاهات العميقة .. حتى ان أقل انتفاضة أثرت على القلب فبدأ يتهاوى سريعا .. منذ زمن توقف قلبي عن ألمه ويبدو أن اليوم جددنا العقد مع هذا الوجع ... ليست سعيدة بما ال اليه حالي ولكنني راضية بنصيبي من هذه الحياة ..
ربي لا أسألك رد القضاء ولكن أسألك اللطف فيه

تاريخ 6/1/2020
كنت تعبانه في قلبي بعدين رسلت لصديقتي اذا تروح تمشي وطول ما نحن نمشي انا افكر في شخص واحد عشان اخبره عن الالم لاني خايفة اكلم أبوي هذا الالم وانا طفلة يروح ويجي وصار له سنتين او اكثر ما جاني رجاء ذاك اليوم وخلاص انا احس يكتمه غير طبيعية عشان كذا رحنا نمشي بالليل في الحارة سبحان الله هذا الشخص رجعت البيت شفت منه رسالة وانا كنت مضيعة الأرقام ما عندي ارقام واليوم ضاع التلفون عاد هذا التلفون 3 الي يخترب ،، المهم يعني الله ارسل لي الشخص الصح وتكلمنا في الموضوع وصرت احسن نهضت الصبح دقات قلبي كانت مستقره الحمدلله والتنفس بعد كان زين الحمدلله ..
قبل امس المفروض اسوي التحدي واترك التلفون بس للاسف واجد رسائل كان ذاك اليوم تخص جروب المسرح والأعمال التطوعية وأغراضي من الشحن وخلصت امور تصديق الشهادة انتظر رسالة متى الاستلام وبعد اخذت امي تزور مربيه وإلا تنزيل يا رابعة ما اريد غصب ،، من غير رحت المكتبة خلصت كذا امور ومنها أوراق رسمية وجالسة ادور وظيفة ورتبت الغرفة لذلك ما سويت التحدي ذاك اليوم ،،
يوم الأربعاء طلعت من ساعة 12 رحت المستشفى وصلت هناك 1:19 دقيقة ضيعت الطريق ناسية شويه طبعا اخذت جَيْفَر وصديقتي ودخلت عند الدكتور عبدالله عاد ساعة قريب 2 كتب لي تحويل لدكتور العيون والعلاج الطبيعي وموعد لفحص الدم وموعد لزيارة الطبيب كانوا بتاريخ 14&21/4/2020 يعني بعده كذا شهر اهم شيء عندي أدوية ،، و جَيْفَر عطوه تحويل الى دكتور الأنف والحنجرة ومضادات حيويه ،، ورحنا جراج برجر وبعدها منتزه الغبرة ولما رجعت البيت صارت فيني حمى وخلاص غلقت ونمت من وقت

اليوم بتجي عندي شذى العصر ونسولف ،، و بعد عزه بتجي مع أمها ان شاء الله وانا يبيلي اروح مسقط مع البنات يحتاج لي أغير مزاج ،، وصح وصلن أغراض الشحن البيت وما فتحتهن في كتاب هناك اريد اقرأه كتب ما بس كتاب وصح اريد اجمع الكتب المستعملة فرجاءً اذا عندكم كتب ما تقرؤوها بلغوني اريد استلمها منكم ،، تواصلوا معي بليز

في شخص دخل يعدل في التوقيع مالي وبما انك دخلت الى مملكتي عاد عدل التوقيع صح لا تعليق بس كنت افضل ان تجيني رسالة لو في اي اشكالية في التوقيع ،، لان هذا امر خاص فيني :36:

صح اليوم الصبح نهضت اخذت جَيْفَر عندهم رحلة استكشاف الطبيعة للأشبال والزهرات وتسبحوا في الوادي انا كنت ولية الامر اوني هههه مديرة جَيْفَر كانت نائبة المديرة في مدرستي فتعرفني وكل ما أجي من استراليا أجي مع امي اعمال تطوعية او أطباق خيرية وألقاها حافظتني فاليوم لقيتها انصدمت تقول ربوعة ضعفتي واجد وسمرتي قلت لها خلاص قررت اتغير ههههه بس سمرت عشان الجو تغير يحتاج لي وقت وترجع عندي البشرة عادي اما الوزن ما اعرف ليش ينقص ههههه حتى الدكتور عبدالله يقولي رابعة ضعفتي شو صار ،، ما اعرف جسمي كذا يعني ممكن ناقصة بس كيلو لكن فعلا جسمي صاير غير

لو انني يا سيدي اشتاق
وحنين قلبي لا يزال في الآفاق
لو ان غمرت الحب الوليدة أينعت
لما بكيت الفراق ،،
لكنني يا سيدي لا اعرف الأشواق
وانني مسالمة لا اعرف النفاق
كما وان قلبي بسيط عميق لا يرجو الوفاق ،،

تاريخ 10/01/2020 القوات العسكرية بجميع أنواعها ورتبها تعلن حالة طوارئ ظهر يوم الجمعة ،،
امي كانت تسال ليش تروحوا الدوام اليوم اجازة الإجابة مطلوبين حالة طوارئ احتمال حضرة السلطان قابوس توفى ، امي : لا الحين صحته زينه الله يحفظه ومنزل مراسيم من يومين يمكن عشان الأمن في الخليج بسبب الأوضاع المحيطة بين ايران وامريكيا .. وأكملنا اليوم وكان عندنا عرس

الساعة 6 صباح اليوم تاريخ 11/01/2020 اختي تصحيني قومي ربوعة حضرة صاحب الجلالة السلطان قابوس توفى، قمت خايفة وما مصدقة وطبعا ما عندي تلفون انا فتحت الايباد شفت رسالة من زميلي السعودي عبدالعزيز يعزيني انا اعرف هذا الشخص ما يرسل الا اذا عنده استفسار او تهنئة فالموضوع صحيح دخلت الانستجرام كله اسود وتعزيات الخبر حقيقي انا ما في خيال هذا ما حلم قالوا الجنازة ساعة 8 انتظرتها عشان اشوف اذا صح او لا وقتها كنت انا وأختي نتابع عمان وندعي ،، طلع ابوي وشافنا ولأول مرة ابوي يبكي ويحضني وانا بقيت اصيح واهدي ابوي ما نهضنا امي عشان ما تتأثر بس سمعت انه خالتي مسويه صوتية في الواتس عند اختي تبكي وتعزي في قابوس بعدها امي طلعت وشكلها عرفت حضنتها وجلست تصيح صرنا انا وأبوي وامي وأختي نتشارك الحزن ،، الموضوع الي ما راح يفهمه غير العمانيين ان نحن من 50 سنة تحت قيادة السلطان الراحل قابوس بن سعيد رحمه الله وطيب ثراه يعني ما عشنا الا في عصره عصر الازدهار كل شيء في حياتنا يرتبط باسمه ما عرفنا احد قبله ولا بعده ومصير الدولة كان في أمان لذلك كنّا نحبه وندعي له لانه متواضع مع شعبه رحيله شيء كبير فقد لنا جميعا من الاجداد الى الأطفال لدرجة اخواني الصغار فيهم صيحه ويريدوا يروحوا العزاء الوضع جدا مؤلم اكثر مما توقعت كنت اعتقد اني مستعدة لهذا الخبر لان هذا امر الله بس كان الخبر ثقيل علينا جميعا ،، اليوم بنعيش عهد جديد مع جلالة السلطان هيثم بن طارق حفظه الله ما نعرف كيف بتكون اوضاعنا ما راح نردد النشيد الي يقول أبشري قابوس جاء فلتباركه السماء ،، سنقول أبشري يا ملائكة السماء قابوس قد جاء .. رحم الله قابوسنا انا لله وانا اليه راجعون ولا حول ولا قوة الا بالله ،، رحم الله قلوبنا من هذا الفقد ربي يربط على قلوبنا الصبر والسلوان ،، عظم الله أجرك وطني فان قابوسًا وطنٌ ترك وطن

تاريخ 10/1/2020 زواج ولد خالي الظهر من ذاك اليوم طه قرر يصبغ شعره بني غامق وصبغت معاه من قدام عشان انا اصلا شعري في صبغة من تحت والمصيبة ان الصبغة علقت في الشعر صار شعر طه يضحك ههههه اوين يجرب المهم بالعرس قررت البس فستان اسود وحتى العقد اسود والروج احمر وشعري لامتنه ع البسيط ،،، عزاء ما عرس ههه مسميني الإيمو هههه ،،

المهم الأسبوع الماضي كان خاطري اشوف بيبيه عائشة كانت عاملة في المدرسة ومن يوم تخرجت ما شفتها وما اعرفها اذا كانت تشتغل او لا هذه الحرمة كل ما تشوفني كانت تحترمني وهي حبابه اجلس أساعدها مرات ودائما تدعيلي حبيبتي ربي يحفظ لها عيالها ويسعدها ،، المهم خبرت امي وقالت بتوصلنا عندها لاني ما اعرفها وين تسكن ورحنا بعد ما صليت العشاء وبصراحة انا اتعب وأقول هذه الإنسانه كبير قلبها جدا حنونه من شافتنا عند الباب حضنتني وتصيح ،،تقولها امي رابعة جاية تشوفك ،،قالت انا رابعة بنتي ما أنساها عسى الله يوفقك يؤ حبيبتي يؤ قلبي يو ماه انتي غريبة عندنا وانا بايه اللكشه وأصيح وانا طول ما في بيتهم وهي ماسكة يدي وجابت لي وسادة اسند ظهري يعني اخلاق عالية جدا للعلم هذه الحرمة عمرها الحين مآل 70 سنة يمكن ما شاء الله عليها وانا واجد احبها لدرجة من طلعنا من بيتهم وصلتني لحد السيارة وتعرفوا ذيك الفترة برد وهم مكانهم عند المزارع ما رضت ترجع بس هذه الحرمة مستحيل أنساها ربي يحفظها انسانه مكانها القلب والعين ،،

أبشركم طه لاقي لي وظيفة فكروا معي شو الوظيفة ؟؟
حلاق
نعم هذا صحيح
يجيب لي المكينة وأحلق له شعره وأحدد اللحية كأنه ما شي حلاقين ضاحك علي ،، يقولي بسال الهندي اذا يبوك معهم تشتغلي حلوات ريال ونص حال اللحية قلت له ما عطيتني شيء عاد مرتين اضبطك قال لا انا ما يشملني الدفع بس الزبائن ،،،

هذا يوم تجلس بلا شغل يتمصخروبك في البيت بس الله كريم ،،،
بس مني منفعه

هلا جميعا ،،

رحلة فريق سيلا الي كانت تاريخ 23 & 24 من شهر 11 عام 2019
هذه الرحلة تكلمت عنها كان امير الرحلة سالم ،، كنّا 3 سيارات سيارة للبنات والبقية لشباب ونمنا في الخيام بس مكان الشباب غير عن مكان البنات وقتها انا اخذت فايروس من الجو والجو بارد وعندي إصابة في الظهر ما قدرت انام في الخيمة نمت في السيارة لان كان فيني حمى بالليل ما قدرت اسهر معهم اسولف رحت انام ،، اليوم الثاني ما كان احد صاحي غيري و سالم ونادر واتوقع بقية الشباب صحوا بعدين والبنات المهم رحت أخذ دش وكانت هناك وحده فلبينية تزوجت من واحد اسمه علي تركي وعندها ولد اسمه مصطفى وبنت نسيت اسمها بس هي متطلقه وجلست تسولف معي جايه رحلة مع اولادها نفس المكان الي مخيمين فيه وعاد أخرتني اطلع ،، المهم انا ناهضة 5 وطلعت من بعد السوالف 7 يمكن ،، رحت اجلس مع الي صاحين وكان دور الشباب يضبطونا الريوق وخلوني اقصص طماطم وانا احب الطماط اصغر ما يكون قيس يضحك علي يقولي واجد قصك كبير قلت له تمام بصغره هههه ،، المهم سالم فيه لحية ومسك السكين ومشغلين النار في الطباخة وهو ممنوع في المخيم نسوي نار ومروا ناس من جنبنا وأقول لسالم الشيمة اترك السكين بيحسبونا ارهاب وعق السكين قال صدقك وعاد هو شويه فيه خوف هههه مستوي له موقف عشان كذا انا اخذت السكين وجلست اقطع الطماط أقولهم جوعانه جابوا لي موز ومكسرات كل الاكل في البساط مالهم نحن ما عندنا غير خيمة الحين ما كذا راحوا محمد وعلي ياخذوا شاور والبنات بعد رايحيين رجع محمد قالي رابعة خبري البنات صوتهن طالع وترانا سمعنا ونحن في الدش الحوارات ههههه مسكت راسي قلت له كل شيء سمعتوا قال تقريبا هن ما سكتن وانا اعرف أنهن اذا بيحشن بيحشن عن علي وعن محمد ههههه قال سالم عيل فتوه الرمانه قلت لمحمد شكله الحوار كان عنك وعن علي قال تراه لحقني الكلام ههههه قال قيس عيل انا بروح اسمع الباقي المهم البنات رجعن الخيمة ( طبعا مكان الحمامات عزكم الله مال النساء والرجال نفس المكان بس الجانب اليمين لنساء واليسار لرجال) رحت انا الخيمة متفشله قلت لهن بنات شو سولفتوا في الحمام عزكم الله قالوا كل شيء تقريبا قلت لهم وتكلمتن عن محمد وعلي قالن ايوا اصلا اليوم كان برعايتهم قلت ابشركن جاني محمد وقالي انه سمع كل سوالفكن وانصدمن قلت لهن صوتكن عالي لازم يستمع والفشله عاد قالن ما نتريق قلت عاد تصورن الريوق بيطبخه علي ومحمد هههه وقيس وسالم ونادر يقصفوا فيهن قال باقي نمسك على رابعة قلت له ما احش من وراكم لا تخافوا ما عندي شيء اخبيه في وجهكم ما شغلي حالكم ،، المهم طول ذاك اليوم صوتي يفح فيني احتقان سؤالي قيس كرك عشان اتكلم طبيعي ههههه انا اصلا قلت لهم صوتي ما بيرجع الا اذا شربت اشياء ساخنة وما قصر قيس ضبطنا وبعدها طلعنا مكان ثاني طبعا انا اسوق سيارة محمد وكنت متحملة رحنا الميناء وجلسنا نصور ورحنا الجامعة مال ديكن في جيلونج صلينا ورحنا الشلال وصورنا جماعية بالدرون وآخر مكان جلسنا في منتزه وانا من الميناء تعبت بس اسوق ومستحمله قلت لشباب أنار اخذت بندول جيبوا لي مضاد حيوي وحلاوة الحلق المهم وصلنا ساعة 3 الحديقة جلسوا يشوا اللحم انا خلاص عاد بردت الحمى زادت وجاء سالم جاب لي أدوية وفواكه وكل شوي يجي يشيك على الحرارة هو وعلي ومحمد بصراحة خوفهم علي كان شيء ما ينتسي حسيتهم اخوي طه كذا يداريني خاصه سالم وعلي ونمت في السيارة هم جلسوا يطبخوا ولما خلصوا أكلوا ع أساس في جدول تسلق الجبل ما صار عشان حالتي الصحية وعاد رجعوا ملبورن عشاني ومحمد ساق عني عاد وإصلا لو ما هو ساق ما العمر كيف بيكون حالنا لاني تعرضت لنوابه ضيق التنفس الربو والحمدلله عندي البخاخ ،،، قبل ان نوصل البيت قررنا نتصل في مروان ونشجعه عنده مقابله اليوم الي بعده عشان يدخل كلية الطب والمفروض هو يقود الرحلة بس كان يتدرب للمقابلة ووافقوا عليه الحمدلله ،،، المهم مروان ما عرفنا وجئت انا جلست اقول صوتي مبحوح ما ينسمع متغير كلمت مروان بس ما عرفني جيت قلت والمحادثة سبيكر لا يكون يحسبني ولد صوتي متغير وجلسوا يضحكوا عاد محمد قال لمروان ترا رابعة هذي شويه مريضة ما فيها صوت وعدنا قلنا له خلاص انت ناجح و امورك طيبة وفعلا هو قدها ونجح ،،، المهم قبل لا وصل البيت معطيني ثوم عشان حلقي اكل فصه واطبخ منه حال حلقي وصفة سالم وعلي اوين ليمون وعسل وثوم وماي مغلي وشربيه وصح فادني شويه رجع الصوت حبه واليوم الي بعدها سافرت نيوزيلندا