الرسالة الجماعية فالواتس اب
الرسالة الجماعية في الواتس اب
السلام عليكم ورحمة الله وبركاتة
أسعد الله صباحكم بكل خير ومحبة ، الرسالة الجماعية في الواتس اب أعتقد في منكم عاملنها ومحدد مجموعة أرقام وبين فترة وفترة يرسل رسالة ، وفي منكم توصله الرسالة من أشخاص ضايفين رقمه ضمن الرسالة الجماعية .
هذي ميزة جميلة ومناسبة ولكن بعض الأشخاص لا يستغلوها بالشكل الصحيح يعني تحصله فاليوم يرسل اكثر من 30 مسج !!!
وياريت مسجات فيهن فايدة او شي مسجات عادية ولا تضيف الجديد .
بصراحة صارت معي كثير والمشكلة تخجل انك تخبر الشخص ما يرسلك لانه اكيد فضلك عن غيرك لكن عاد ما بهذي الطريقة .
في ناس يرسلو أول الصباح وفي ناس يرسلو أول الصباح وفالمساء وهذا شي مناسب وجميل .
لكن الي يطرش 50 مرة فاليوم ايش منه فايدة ؟!
أترك الرأي لكم واذا حد مر بالتجربة يخبرنا ، واذا حد محدد رسالة جماعية ويرسل فاليوم اكثر عن 20 مسج يخبرنا ايش السبب من هذا ؟؟
وأيضاً اذا احد محدد رسالة جماعية يخبرنا عن الاوقات الي يرسل فيها الرسالة الجماعية .
##صباحكم نشاط وأجتهاد فالعمل ##
تحياتي : محمد العلوي
