((((( أنا من بعــــــــــــــــــد هجرانج )))))
أنا من بعد هجرانج أبنوي أهجر إحساسي
أبطوي صفحةٍ في كتاب عمري ما قريتيها
أبخفي طرسي الشّاهد على ظلمج وكراسي
أبحرق كل أوراقه ويعْلج ما طفيتيها
كفا يا بنت من حبٍ حبسلي باقي أنفاسي
قسى وأقسى خفوقٍ، خفْقته إنتِ حيّيتيها
أببعد لو يلوموني في بعدج ربعي وناسي
أببعد خطوةٍ سهلة، وصعب إنّج فرضتيها
وبحسب باقي الأيام من عمري وهوجاسي
ترى موتي دنا، وإنتِ خسارة ما حسبتيها
خسارة إنّي كتبت الحبّ باسمج وإنحنى راسي
وأنا ما قد حنيت الرّأس إلّا للْمسويها
أحبّك من هنا لآخر محطّات الغلا لهناك
أحبّك كثر ما يهوى رضيع الصّدر غفواته
أحبّك يا بعد كل الحروف وعلّها تفداك
أحبّك يا بعد بيت القصيد وكلّ غاياته
أحبّك يا بعد عمرٍ قضى منّي على ذكراك
أحبك يا بعد من داج بالدّنيا بخطواته
أحبّك يا دفى برد السّنين إليّا غفت بحماك
أحبّك يا أمل عمر الوحيد ويا بعد ذاته
أحبّك يا بعد قلبٍ نزف كل الغلا لرضاك
أحبّك يا بعد كل العيون ونزف دمعاته
أحبّك كثر ما تبرى جروحٍ لامست يمناك
أحبّك كثر ما يلجا فقير الحال لسكآته
أحبّك بس لو تعرف وش اللّي بالحشا ينخاك
وربي لو كشفت اللّي بقلبي، مت لرضاته
أنا وشلون أبيّن لك غلاك ولهفتي للقاك
أنا وشلون أعبّر لك عن اللّي بين طيّاته
أنا لو قلت لك ببعد وأبرحل وأنتحي وأنساك
لساني وأعرفه لا زلّ يا شينه بزلّاته
تعال أرجوك شفني من رحلت وعبرتي تنعاك
تعال وظمّني يا حي ذا الطّاري وظماته
تعال وداوني، واللّي خلقني يالدواء بشفاك
يقولون الجمر طب المريض بحر كياته
تعال وخل عنك الصّد والهجران ما يزهاك
حلاتك توصل اللّي يم دارك زاد جياته
أنا واللّيالي وأبيات القصايد في أمل لقياك
أقول الشّعر واللّيل الحزين يعدّ نجمآته
نعزّي نفسنا ننطر تسابق لهفتك وخطاك
نقول ان الخطى تقصر ولا تسبق للهفاته
أماني عاشت بصدري أغاني داخلي تهواك
تموت ان غبت وإن ردّيت عاش اللّيل وأبياته
أنا مقدر على بعدك على صدك على فرقاك
يموت بغيبتك قلبٍ نزف لك حرّ حسراته
دخيل الصّبح في وجهك دخيل اللّيل لا غطّاك
دخيل الرّمش لا سيّر على خدك بسجاته
دخيل الجمر والسُّكردخيل البلسم الفتّاك
دخيل اللّي تثنّى لين عذبني برقصاته
أمانة ترحم اللّي شاف منّك صدتك وجفاك
دخيلك تدمح الزّلة وغلطاته وهفواته
أحبّك من هنا لآخر هنا لآخر هنا لهناك
أحبّك لعنبو حيّ الرّضيع وحلو غفواته
