النفس لابدها ترضى بمكتوبها
يامدور عيوب خلق الله وكلك عيوب
إبدى بنفسك وعقبه دور عيوبها
محدٍ بهالكون كامل غير منشي الهبوب
وراك تبحث خوافيها ،،،، وعذروبها
منتب وليٍ تحاسبهم ولانت امغصوب
ان ماخسرت الصداقه تكسب ذنوبها
الظن له وجه متسامح ووجه شحوب
والناس ماتعرف اللي داخل قلوبها
احدٍ يجي صادق الكلمه والاخر كذوب
وناسٍ ترزز بثوبن ماهو بثوبها
واحدٍ طريقة كلامه عن صفاته تنوب
بعض الاوادم تبين لك من اسلوبها
إتعب على من يدلك لافقدت الدروب
لاضقت يدعس لك الضيقه ومندوبها
واللي تظنه بيفزعلك وسجل هروب
سجل عليه القطاعه واعلن حروبها
وان حاشك الظلم لاتجزع ولانت امغلوب
النفس لابدها ترضى بمكتوبها
تأكد الصدق لو يقعد سنين محجوب
تشرق له الشمس مهما طول غروبها
ودع الخلايق لخالقها وخلك طروب
ترى التجاهل علاج النفس وحبوبها
من راقب الناس وعيونه عليهم تجوب
يموت ضايق ولاهو قاطع دروبها
