ظلام اللّيل ماطفّى شموع الحب بأهدابه
وغدر البحر ماخوّف حبايب ضمّهم شاطيه
تعال نداوي الليله شعورٍ طاحت ثيابه
نحل من كثر ما صامت سنينه وافطر بمافيه.!
في صوتي الليله حنين يبعثر شعور المدى
وفي صدري تنهيده رجف من غيها سور النهار
والذكريات اللي تشاغب بينها أحبابوعدا
ترفع عيوني للسما ويطيح معنى الانكسار
أبلل أوراق انتظاري لك من دموع الندى
والبس فساتين اللقا ويشقها سيف الحصار
وأدوّر برزنامتي اخبار ترضي المبتدا
ولا لقيت الا جثث أشعار في حلق الغبار
حتى بقايا مرايتي طاحت وقالت لي فدى
حنّت على عيني تشوف بموقها لمح انهيار
يامسافرٍ بين الحنايا الياس فيني اهتدى
ذاك الطريق اللي يشبّ بخطوتي غربه ونار
يامثقل الخطوّه اذا راح التعب فيها سدى
كنّك تشيل الارض باقدامك وبيدينك بحار
دخيل هجري اللي اعتنقته لا تخيّب لي ندا
تعال والا لا تغيب اثنين لك فيها اختيار
تعال قبل الموت قبل الصوت مايرجع صدى
قبل تشيب اصداف صبري ويهجر ضلوعي المحار
ابي اعيشك ذنب كل مااستغفره فيني بدى
ابيك ظل لفتنتي لا طاح من حولي جدار
وابي اضمك مثل طفلٍ شاف امه واقتدى
وابي تسيل أفراحنا ونذوق طعم الانتصار
واحملك فوق جناح صوتي لآخر حدود المدى
طفلين جنّه ما يفرق وصلنا سور النهار.!
