ماعاد لي في ديرة الحب منزال
وماعاد بي لمصادم الجرح قــــوّه
القلب ميت وذابح القلب ماقال
الله يرحم في عزاه المـــروّه
مابه حبيبٍ من غثا الحب ماشال
لكن حبيبي في عذابه جـــــرُوّه
رَوّى حنايا الصدر من كل غربال
ولو هوّ طالبني ابقول رَوّه
الطبع صلْف وتخضع لحكمه رجال
ومن يوم شفته ضاع ضوّي بضوّه
ظبيٍ حكم عرش الحنايا ولا زال
ووشلون يحكم والحنايا عدوّه !؟
ذكراه تحرث نار صدري وتغتال
فكرٍ تغرّب وارتمى بْقاع هُوّه
ماشاف من وقته سوى الهم واللآل
ومن زينة ايامه علومٍ تِشَوّه
طويله قصير وقصيراته طوال
مليان بس الدهر أثبت خُلُوّه
ياكيف كل هالجرح من خلق صلصال !
أثر الشديد اللي ملازم هُدُوّه
التجربه نورٍ ومرّات غربال
والحب محدٍ يطعنه في سُمُوّه
ومن باع عزّه نفسه لحاجة الريال
تبقى سواته طول عمره تُفَوّه
وان كان عودي صالبٍ مابعد مال
اليوم رمح الغدر زوّدْه قوّه
ظنّه رماني من على روس الاجبال
ولا درى انه إختصر لي عُلُوّه
وادي المحبّه جفّ من عقب ماسال
والخيرة بمختار رب النُبُوّه
وكانه يعذرب بي لجل نقص بالمال
قلّه يدور المال وتسمع دُنُوّه
الرجل مايكبر سوى بكبر الافعال
والرزق لا من إنقسم مايٌمَوّه
ورزق الطيور وعيشته مضرب امثال
بِطان لاراحت خِماص بْغُدُوّه !
وعلّمْه إني مرْخِصٍ كل فنجال
صبّوه مع ذكراه ومرخص بجَوّه
وعلمْه وشلون الفكر صار خيّال
وان المحبّه راح وانزاح سُوّه
وان كان عودي صالبٍ مابعد مال
قلّه ترى طعنتْك زادتْه قوّه
