المشاركة الأصلية كتبت بواسطة عيون البشر
الزوجة جالسه مع التلفزيون، تشوف مسلسل خليجي
البطل يتغزل بحبيبته، ويهمس الها وهيه تضحك ودورهم في المسلسل اجمل ما يكون.
الزوجة حست بالغبطه من المشهد الحلو وتذكرت اول ايام العرس واخر ايام الخطوبة، قالت احسن اقوم اتكشخ واتمكيج حال زوجي بيرجع رامس بعد شوي، وباكر اجازة وحلو نسهر مع بعض.
تمكيجت الجميله وحطت من الدخون والعطور وكأنها عروس صارت.
دخل الزوج وهو يتثاوب ومن اجهاد العمل تعبان، قالها ما اقدر اسهر وبنام.
مسحت مكياجها وغسلت وجها وخلت راسها على المخده تتخيل المشهد في المسلسل.
صبح الصباح قام الزوج طلع لاعماله، وهيه في ايدها التلفون وتتابع الانستجرام والسناب وتشوف قصائد الغزل والحب، وكل ما سمعت كلمة حست انها هيه المقصوده.
زاد اشتياقها للكلام الحلو،، والزوج مشغول، وكل كلامه عن العمل والمصاريف.
هيه تسمع منه وقلبها في كلمه حلوه.
استمر الحال ومرت الايام، وكانت جالسه في مكتبها في العمل.
دخل زميل لها وشافها كاشخه ومن البخور حاطه
بدون ما يقصد قالها: الله وش هالروائح الطيبه ما شاء الله عليك
فرحت الحلوه وابتسمت.
بس كتمت في قلبها الفرح،
رجعت البيت وطول الوقت صورة زميل العمل في بالها
كلماته شتتها،،
رجعت الدوام في اليوم الثاني وسوت البخور
بس الزميل ما دخل مكتبها..
هيه مشتاقه تعرف ايش تعليقه ع الريحه اليوم.
طلعت كأنها ما قاصده صوب مكتبه وقالت: فلان معك قلم رصاص.
قام من مكنه وشاف ابتسامتها العريضه وجمال وجها اللي تعمدت شعرتين من الطرف يخرجن.
قرب منها وعطاها القلم وعينه في عينها
يبتسم وتبتسم، قالها: طالعه قمر اليوم.
ارتبكت وطلعت بسرعه من المكتب
رجعت البيت وجسمها نااار من الموقف، ما عارف ايش فيها.. بس قلبها يقولها: هذا الرجال يحبك
وعقلها يقولها: اللي تسويه غلط.
الزوج يتغدا ويكلمها وهيه ولا منتبهه،، عصب عليها وتنازع معها،، عصبت بسرعه وتنازعت وزعلت وقفلت على نفسها تبكي وتتخيل الزميل.
مسكت التلفون،، كتبت رسالة إلى زميلها تقوله انا اسفه ع الموقف اليوم في المكتب.
استلم الزميل الرساله ومعها استلم زمام قلبها..
اعتذر ومن عسل الكلام سقاها.
خفق قلبها،، رف هدبها،، وبدت تنسج خيال العذاب اللي هيه فيه،، وانه زوجها مو فاضي.
كالبطل المغوار،، وقف الزميل واساها حنن قلبها عليه وفرحها بكلمة احبك.
مر الزمن بين مسج واتصال،، ولحظات من الغنج والدلع في المكتب،، وبعدها نطلع مع بعض لفه وبعدها في الحضن تنام..
سنوات من الخيانه وهيه في عذب الكلام عايشه
عموماً ما اطول عليكم..
اخلي الكم الختام بس انا اللي همني البدايه
وكيف الوحده تكون فريسه سهله لو هيه كانت تبي.
دمتم بود
واعتذر لو ناقشت شي ممكن يضايق البعض
بس ظاهرة موجوده وملموسه
وتحصل انسانه متزوجه ومعها اولاد وأسرة بس معها صديق وحبيب تتبادل معه الغزل ولو بالتلفون.
