حوار بين زوح وزوجته.
موزووه : خلفان يوووه خلفان
خلفان : خير مو فيش اجارنا الله منك ومن سوالفك..
موزووه: حشااااا كلاني،، موه فيك كذاك لابق كما النار
خلفان: تفضلي موه تبغي.. عدي القصيدة.
موزووه: والله باغيه اجيب ملابس العيد..
خلفان: زين ان شاء الله،، موجوده الفاتورة،، بروح اجيبهن
موزووه بنبره هادئه: ترا ما بس الملابس اللي انت مودني افصلهن.
خلفان بستغراب: مووووه كيف بعد هالسالفه!!! وبكم مفصله؟؟؟ ومن هين؟؟؟ وكيف فصلتي وانا ما اعرف؟؟؟
موزووه: والله انا مطرشه كم قطعه مع اختي تفصلهن حالي، ومفصله كم لبسة قطن مع حرمة اخوك.. وحال صباح العيد شاريه من الانستجرام ( مغربي) واجد عجبني.. وباغيه اروح اخذه من الحرمة اللي عارضتنه لاني حجزته معها..
خلفان فاك حلقه.. يقول: حسبنا الله ونعم الوكيل
ومن هين اجيبلش،،، وانا فرحان اني مجهز غوازي ملابسك... طلعتي حاشره الدنيا..
موزووه: مالك مالك.. ترا كل الحريم يلبسن للعيد،، موه تبغاني اقل عن خواتي وحريم خوانك.. تبغاهن يتشمتن فيني..
خلفان: بنت الحلال ومن قالك بيشمتن فيك،، وليش هالاسراف.. انا من هين اجيب مبلغ فواتيرك اللي اكثر من راتبي؟؟؟
موزووه بتأفف: اوووه انت رجال وبتتصرف.
ظاهرة الاسراف في الاستعداد للعيد وشراء كميات كبيره من الملابس والكماليات بحجة العيد، تكسر العديد من الاسر وتساهم في زيادة الديون عليها.
من خلال المشهد و الثقافة الشرائية في المجتمع، صف لنا موقفك من هذه الممارسات.
واتمنى ان تكون الاجابات شفافه من الاخوات والاخوان.
دمتم بخير وسعاده.
