جيّـتِك لي جرح وغيـابك ضـماد
لا تجيني جرحك السابق بضمـده
عيـنك اللي بين رِمشـيها الـزناد
غمّـريها سكّن سـلاحك بـغمــده
أذكـر إني من لمـحتك والسـهاد
حـابسٍ نومـي ولا ناوي يــردّه
أطلبه ينـزل على عيـوني الرقـاد
متعـبه حايم على ادراج المخــده
إنقضـت أيام من عمـري شـداد
ونحنى ظهر الصبر كم شال شده
كــثر ما خلّـيت بالغـرفه سـواد
لجل خنـق الصبـح بالظلمه وسده
كـثر ما جمّـعت بالغـرفه بـراد
مغـريٍ نـومي على طـعمٍ يـوده
طـير نومي لو ختـلته ما يصـاد
كلّـما أرخـي حـزام الفـكر شـدّه
يا عيـوني كنت حـسب القرب فاد
كم سحـابٍ ما شربنا مـاي رعـده
نار شوقي (م) الصبر أمست رماد
لو معـاذيرك نفخـتـي ما تـوقده
يا جميـله وش محـاصيل العنـاد
كان قـلبي زارعٍ (ف) الحب جـدّه
إرتجـل فارسك من ظهـر الجـواد
رغـم ودّه قـادرٍ قـلبــه يــردّه
مايـفـيد القـرب وقـلوبٍ بعــاد
ما يهـم البعـد يطـوى بالمـودّه
