(خارج النص) قصيدة مهداة للصديق الشاعر محمد العمران
قد جيت للــعمران والغـالي يـخـص
أبغى المـشـــوره حيـث إنـه قـدرها
الفاتـــنه ياللي هــواها خـارج النـص
ما بين ذنب وبين يحسب لي أجرها
تـسـرق نظــرها كنّـها بالــشـوف لــص
تـسرق قلوب اللي تجـي عينه بنظـرها
نظـرة بــري( ن) مـا لـهُ بالــذنب خـص
تـرمي سـهام ولا درت وش هو خطرها
الـنظـره اللي مــن ســبـايــبـها بخـــص
عــيـــنه وكـــان الــــظـن إنــــه سـرّهـا
من صــابــته الفــكر عـنده يـخــتــبص
يا طعــنة( ن) يــعكــس ألـمــها أثـرهــا
قصّت غــرام اللي مـضى بالشوف قص
واللي سـكنـت مـن قبــل قلـبي نـكرهــا
إن سلــهمـت مـن كـان مـتقــدم نكــص
إما إنـســحب ولا وقـــع فــي أســرهـا
قد لان قلب(ن) كنت أحسبه من قبل جص
قــد فـكّــت رمـوزه وطــاح بـهــكـرها
يا طـير ياللي من جروحه قد رقص
قــد مرّني ما بــين عـسر ويـسرها
والليل لو طوّل يـجـي عـقبه وبـص
يا نعمة( ن) دامت و واجب شكرها
يارب وإنـته كـل مـن دونـك نـقـص
تعـلـم ذنـوب الـعـبد لـو هـو سـرّهـا
