هبـــــــآإل أطـــــفاآل .....]
عفا الله عن خطا غدر الخناجر والضلوع ابطال
بسامح واتركك تحت الظلام الحالك .. الحالك
دخيلك وفر دموعك ترى هدر الدموع اذلال
وترى مافية احد يصبر مثل صبري بغربالك
انا عيبـ (ن) علي انقض كلامي , والرجال افعال
واذا قلت اقطع حبالك .. تراني بقطع حبالك
عشان اكسب هدب عينك تجرعت العذاب اشكال
وليتك ترأف بحالي علشان ارأف بحالك
مسوي في حياتي شي .. مايذكر ولا ينقال
حشى .. حتى العدو وأهو العدو .. مايعمل اعمالك
تمسيني على الهم وتصبحني على الغربال
تقلطني فناجيلك .. وتقصر عني دلالك !!
تحملت التعب لاجلك وانا حملي يهد جبال
رحلت من العذاب .. وماوقفت الا على جالك
علامك كلما أجيك متواضع جيتني تختال
معاك اليا متى باصبر .. وصبري معك يحلى لك
مثل ما اقبلت لعيونك لزوم تلدلي باقبال
ومثل ماقد حشمتك , حس واحشم قلبي اشوالك
انا محد (ن) بجابرني اساير معك هالمنوال
ترى ماني تبيع لك .. ولاني اصغر عيالك
انا جيت اعشقك : نبض ومشاعر , مااعشقك تمثال
انا جيت اسكنك واحياك وابقى فيك , وابقى لك
انا جيت بظما عاشق تعب يطرد سراب اللال
انا جيت استفز رضاك .. من فرقاك والجالك
انا ماهمت بك عاقل انا كنت اعشقك بخبال
انا ماكنت احبك حي .. انا كنت اعشقك .. هالك
تخيل من كثر ماخفت تلقى للزعل مدخال
اخاف اخطي على طيفك وادوس برجلي ظلالك
تبعتك .. والعرب تتبع رعود البارق الهمال
وانا شفت المطر .. يتبعك في حلك وترحالك
كأن اللي خلق حسنك .. خلقني مع جسدك ظلال
وصرت اقرب جسد يمشي معك بقفاك واقبالك
ابي قلبك يحس انه فقد .. بمحبته رجال
ملكته من هدب عين .. وخسرت ارضاه باهمالك
صحيح ان الفراق اقسى ولكن الوصل محال
وانا صعب على ارضي غرورك .. واضعف قبالك
بعد ماحققت عيني فبعدك للرقاد امال
أعود للسهر ؟ ياخوي فال الله ولا فالك
ببدل نظرتك فيني .. واجي لك كل يوم بحال
بكون اقرب من ثيابك عليك .. ولا اتهيألك
بلمك ,وانثرك ,واجمعك ,وارجع انثرك باهمال
باخونك , وازعلك , وارضيك , وازعل منك وارضى لك
ابرسم بالثرى وجهك .. وابدفن صورتك برمال
ابشكي للعرب فرقاك .. واضحك عند عذالك
ابهديك الوصال : فراق .. واهديك الفراق وصال !
بسوي مثل ماشوفك تسوي .. وافعل افعالك
عشان اتعرف من فينا الزعول .. ومن وسيع البال
ابيك تذوق فنجالي .. ونا بذوق فنجالك
نصيحة احتفظ فيها قصر معك .. الزمن أوطال
ابي تسمع كلامي زين .. وتحطة على بالك ..
اذا حبك هبال أطفال .. لك عندي هبال أطفال
ولا .. أبشر بعد بهبال حب ماهو بهبالك
اذا قصدك تهين اسمي عشان تشمت العذال
حشى لا انته ولا غيرك .. ولا عشرة من اشكالك !
