خذني معك ماعاد لي قلبن يطيق
يتحمل الفرقا ولاعندي صبر
والا تعال افرش لك احساسي طريق
تمشي على نبضي واسولف بك شعر
واجمع لك الدنيا واخليها تليق
في حضرتك لاجيت ضاوي ياقمر
يا إنت يا أعذب من الماي الرقيق
ظميانتك أشرب ويغرق بي نهر
واغيب في دنياك ماودي أفيق
إلا عليك إنتَّ ولا بعدك بشر
خذني معك مالي بهالدنيا رفيق
من بعد عينك يامعنّْيني سهر
مثل الفراشه لو يعذبها البريق
أعشق عذابي لو بعينك أنتثر
بقطف لك اقليبي واذوب لك رحيق
واحرض اغيوم السما تكتب مطر !
واسقيك من شعري وهالعالم غريق
يقراك باوراقي ويتنفس عطر !
وآقول احبك واشعل الدنيا حريق
واذا انطفى شوقي أزوَّد لك جمر
وازفر لك ابروحي وتاخذني شهيق
لو تسحب انفاسي فدى لك هالعمر
يابو عيونٍ صافيه مثل العقيق
فيها ابتسم حظي وهناني القدر
قل لي متى بلقاك انا صدري يضيق
من غير شوفك وين اودي هالنظر
إنت العمر وانت الأهل وانت الصديق
وانتَّ حياتي كلها بالمختصر
أفرش لك احساسي وياليته يليق
باحساس قلبك ياحبيبي واعتذر
