أنا اللي حاضر(ن) ذكري لوّني ماهو بموجود
يسعد صباحكم / مساكم
هلا بالجميع ..
لقاء آخر يجمعنا واتمنى ماراق لي يروق لكم احبتي ...
صباح الخير يا أهل الخير صباح الورد والعنقود
صباح(ن) كل ما هز الشعر غصنه قضى ثاره
إلى جادة يمينك يا البني ادم مؤكد جودها مردود
من اللي بأمره نجوم السما تنساب مدراره
ورجل(ن) ما يوقّف في حياته موقف(ن) مشهود
يعيش يموت ما يدري عن أحواله ولا أخباره
ولا مّر الفتى بأول صباه ولا قدح بارود
أجل وش خانت أيام الشباب وينعت أزهاره ؟
يجودون الرجال وجودنا ينجاد منه جود
وحنا اللي نبّطل للعطايا بكل محاره
على درب المعزة ما قصرنا حبلنا الممدود
ولا حتى نفكر لو يجور الوقت قصاره
يعلمنا الزمان ونستفيد ونبذل المجهود
وعزيزين النفوس أنفسهم صلفه ومغواره
بلشنا ما عرفنا من هو المذموم والمنقود
وأشوف الجار ما يسدد ديون اللي على جاره
وضعيفين النفوس من الليالي حيلهم مهدود
وأنا حيلي صواديف الزمان تزيد إصراره
وأنا عندي على كل الكلام اللي أقول شهود
حشى ماني بثرثر والقلوب السود ثرثاره
أشوف النفس مثل البكرة اللي ما تحب القود
وعسفها واحد(ن) نفسه على الأيام صباره
ألا ياسحب هلّي لين أشوف الماشرات العود
تباشر به رعايا الإبل بعد الغيض وغباره
ولا يا شمس طلّي لين تجلين ألليال السود
وأشوف النور ف عيون(ن) من التفكير محتاره
ولا يا قلب خلّك مثل ما أحيدك حفيظ سدود
ترى الرجّال لو يكشف سدوده يطيح مقداره
ولا ياعين لا تبكين ما دام البكا منقود
تحلي بالصبر والعزم تاره ورا تاره
ولايا طيرغرد دام حبل وصالها ممدود
هنوف(ن) لاتذكرها خفوقي زادت أثاره
كن في ثغرها ريحة الياس والكمبود
تثنى كنها غصن(ن) عليه السحب مطاره
تلفّت كنها ريمية(ن) ترعى بوسط حدود
مكان(ن) في فؤادي زمان وماحد(ن) زاره
يا آية من بنات الخود من بعدك بنات الخود
هنادي ريم حصه مي عفرا غالية ساره
سراب الظامي اللي مستحيل إنه يبل كبود
محطمهم غلاك اللي تحب الرجل مشواره
تعالي لا تخليني على باب الأمل مفقود
فراقك سبب جروح الحزين وكثر أضراره
وأنا اللي حاضر(ن) ذكري لوّني ماهوبموجود
أحب الشامخات ولا أطرق ألبيبان في الغاره
اخوكم / رايق البال
