يسعد مساكم / صباحكم
هلا بالجميع ..
عوده اخرى لقلمي وطرح يغلب عليه الطابع الكوميدي من خلال القصص اللي اطرحها بين فتره والثانيه عن بعض الاحداث اللي عايشتها ..
الله يسلمكم زمان وانا بالصف السادس الابتدائي كان معنا طالب ماشاء الله
عليه طويل وضخم لكونه اكبر مننا فالسن لدرجة ان الطلاب ينادونه بالوحش ..
هالطالب كان اسمه احمد وكثير كان مشاغب ويضرب الطلاب وطبعا احنا اصغر منه لكونه كان راسب سنتين في صفه وانتقل معنا ..
كنت الوحيد اللي دايم هو مركز عليه مايمر يوم مايضربني فيه ههههههه وكلما شافني لازم فجأه يجيني بوكس منه او شوته انا وحظي عاد لدرجة ان بقية الطلاب كانوا يقولوا له .. حرام عليك ليش تضربه دايم ..!!
وكان يرد عليهم بكل ثقه .. مزاجي كذي .. بضربه يعني بضربه ..!
ربما كان لصغر سني وحجم جسمي سبب كبير في انه متسلط علي هههههه ..
يوم من الايام وكنا اذكر بالفسحه بس انا ماطلعت من الصف قلت اذاكر شوي لأن بالحصه الرابعه كان علينا امتحان وبالصف معي حدود 4 طلاب نفس الشي كانوا يذاكروا ..
فجأه دخل صاحبنا واول ماشافني قام يركض وراي بالصف يبي يضربني وانا اركض عشان اشرد عنه لحد ماحاصرني ووقفت ووراي جدار الفصل وانا خايف منه والطلبه اللي بالصف يحاولوا فيه يخليني بحالي وهو مصّر يضربني ..
مسك بيده اليسار رقبتي وجهز إيده اليمين عشان يضربني بوكس بكل قوته ..
انا كنت في وضع صعب لأني مو قادر اهرب لأن ظهري ملاصق الجدار ولا قادر افك ايده من رقبتي ..
شوي وانا اطالعه يرفع ايده اليمين عشان يضربني بوكس بكامل قوته وانا عيني على قبضة ايده اللي اشوفها تقرب من وجهي بسررعه وافكر اشلون اتخلص من هالموقف لأن الضربه راح تكون قويه جدا واحتمال تجي بعيني او اسناني ومعناها خلاص على عيني او اسناني السلام عاد لو جت الضربه فيهم هههههه ..
وانا اشوف البوكس جاي بكل قوته وعلى بعد سنتيمترات مني مدري والله كيف صارت هالحركه مني فجأه بس اكيد الهام ورحمه من الله لي ..
نزلت بسرعه بكامل جسمي لتحت بثواني فقط قبل لاتوصلني ضربته ..
إلا واسمع قوة الضربه بالجدار طاااخ وصرخته بكل قوه وهو يتألم لأنه هو تفاجأ بالحركه ومامداه يتصرف خلاص سبق السيف العدل مثلما يقولوا هههههه ..
آآآآآآآه انكسرت ايدي واااي بمووت وقام يصيح والدموع ماليه وجهه من قوة الضربه والألم ..
طلع من الصف وهو يصيح وبنفس الوقت يهددني ماعليك .. خليني بس ارجع وايدي تخف ان ماوريتك شغلك ولا بتشوف .. والله بقتلك ... الخ من عبارات تفرح الخاطر وتسعد القلب الحزين هههههه وانا ساكت ما اتكلم ..
شوي وانتهت الفسحه وبدأ الاختبار ومن خلص الدوام قلت لواحد من الطلبه ساكن قريب بيتنا واسمه عبدالله ..
انا : بكره خلاص انا مابداوم عبادي اخاف هذا يذبحني لو جيت ..
عبدالله : لاتخاف منه اصلا اظن ماراح يجي لأنه وايد تعوّر بإيده ..
اليوم الثاني انا بصراحه مادوامت ووعلى المغرب رحت بيت زميلي وسألته ..
انا : هاا .. كيف داوم احمدوه الصياح ؟ هههههه
عبادي : الصياح عاد سمّيته الحين ههههههه .. لا ماداوم واليوم ابوه جانا المدرسه وقال للمدرس ان ولده احمد طاح وانكسرت ايده وسووا له جبس بالمستشفى واحتمال ماراح يداوم الا بالامتحانات النهائيه اللي راح تكون بعد شهر تقريبا ..
انا : ايوا الصياح ليش ماسمعته كيف يبّغ ويرغي يوم تعور بإيده هههههه ..! طاح هااا .. طاح ..!!؟ وبعد يكذب على ابوه عشان مايضربه ..! قال طاح قال مو كنّه كان يبي يضربني ويكسرني انا المسكين .. يستاهل اللي جاه ..
اليوم الثاني رحت المدرسه واحمد طبعا ماداوم وارتحنا من مشاغباته وعقبها اعطونا اجازه قبل الاختبارات النهائيه ..
بعد انتهاء الاجازه داومنا كلنا عشان نختبر وكنت طول الطريق خايف لأنه معناه احمد راح يداوم واكيد ناويلي على نيه ولا اجمل هههههه ..
دخلنا الصف إلا واشوف احمد ايده من الاصابع لحد الكوع مجبّسه ..
مريت جنبه وطبعا ماله داعي اوضح نظرات الشوق اللي شفتها بعيونه لما شافني ههههه ولا ذاك الهمس اللي اسمعه .. انكسرت ايدي بسببك .. خليهم بس يطلعوه من ايدي وشوف شو بسويلك .. ياويلك مني .. الخ من عبارات الواحد يرتاح نفسيا لما يسمعها اكيد هههههه ..
انتهت الاختبارات وعطونا موعد لإستلام الشهادات ..
لما حان يوم استلام الشهادات قلت لصاحبي عبدالله ..
انا : عبوود .. جيب شهادتي معاك بكره انا مابروح المدرسه ..
عبوود : ليش ..؟
انا : شو ليش بعد ..!؟ اخاف احمدوه ايده خفت وشالوا الجبس وعاد تعرفه انت اكيد بيكسرني من يشوفني ..
عبوود : صح والله عندك حق ههههه .. خلاص ولايهمك انا بجيبها لك ..
راح اليوم الثاني صاحبي واستلم شهادتي وشهادته وشافه احمد وعلى طول سأله لما شافه ..
احمد : وين صاحبك عيل ؟ اشوفه ماوصل للحين عشان يستلم شهادته ..!
عبدالله : راحوا البلد هو واهله خلاص وقال لي استلم شهادته عنه ..
احمد : اهاا .. راحوا البلد هاا..؟ زين زين .. مصيره يجي واشوفه ماعليه ..
رجع عبدالله من المدرسه واعطاني الشهاده وخبرني باللي حصل ..
انا : شفت كيف انه يدورني دواره ..! كان معي حق لما قلتلك انت استلمها عني الشهاده ولا كان خلاص متكسر جسمي الحين ..
عبدالله : صح والله ههههه .. انت لو شفت عيونه كيف يدور عليك كان الشرر يتطاير منهم نعم هههههه ..
ضحكت انا وقلت : شفت كيف ..!؟.. الحمد لله اني مارحت ههههه ..
انتهى .. بقلمي
اخوكم / رايق البال
