ما كفاك اللي جرالي في غيابك من زمان
جيتني تحيي جروحن ماتت بوقت الرحيل
كنت لك صدرن يضمك كنت لك بحر الحنان
كنت لك مثل العلاج اللي يدوره العليل
كنت اشب فعرق قلبي فالحنايا على شان
تدفي ضلوعك وتهنى عينك ورمشن كحيل
كنت لك مثل السفينه شلتك لبر الامان
لين تاهت هالسفينه من سبايب ما تشيل
كنت لك سيفن يعزك يكسره ذل الهوان
كنت كلي لك فدا لك واعتذر كانه قليل
تدري انه هالعطاوي ما ضعف يومن ولان
لين رحت وصار بعدك شايبن عظمه هزيل
تدري اني من غيابك جالس فنفس المكان
تغفي عيوني واغني مع ابو بكر واصيل
يله مع الليل نسهر لين نوحيه الاذان
واطلب الله يمحي اللي اذكره في كل ليل
اتذكر كوخنا اللي يشبه السبعة جنان
واتذكر همس حكيك بين قال وبين قيل
زادت جروحي بشوفك انتهى وقتك وحان
موعدك ترحل وتترك باقي دموعي تسيل
ارجع لدربن مشيته قل لهم تراه كان
هذا هو اللي عشقني ثم ذبحته بالرحيل
